AANIIDI QOOLIHA COYI UMO | REYOTE GEDENSAANNI HEESHSHO NOONI?
Reyino Mannira Hexxo Noonsata Huluullammeemmokkihu Mayiraati?
Reyino manni kaꞌꞌanno yee heda gowwimmateni? Hawaariya Phaawuloosi hatto yee dihedino. Isi ayyaanunni togo yee borreessino: “Kiristoosi hexxinoommohu tenne heeshshora calla ikkiro, wolu manni baalunkunni roore mararsineemmoreeti. Ikkollana, Kiristoosi reyitinorira bayira ikke reyotenni kaino.” (1 Qorontoosi 15:19, 20) Phaawuloosi reyino manni kaꞌꞌannota dihuluullamino. Yesuusi kao reyitinori kaꞌꞌansa gattannokkita leellishshanno tajeeti. a (Hawaariyaatete Looso 17:31) Hegere heeshsho heeꞌrate umo reyotenni kainohu Yesuusa ikkino daafira, Phaawuloosi iso ‘bayiraho’ yiino. Yesuusi reyotenni kaꞌꞌate umiha ikkiro, reyotenni kaꞌꞌannohu wolu mannino no yaate.
Iyyoobi Magano, “Angakki loosono sinsinnaawatto” yiino.—Iyyoobi 14:14, 15
Kaote hexxo huluullammeemmokki gede assannonkeri wolurino no. Yihowa halaalu Maganooti. “Maganu . . . kapha didandaanno.” (Tito 1:2) Yihowa kaphe diegennino, konni kaꞌano dikaphanno. Isi kaote hexxo uyihu gedensaanni, hattono tenne hexxo wonsha dandaannota leellishe kae coyiꞌrino qaale wonshikki gatannoni? Horonta digatanno!
Yihowa mannu reyotenni kaꞌꞌanno qixxaawo qixxeessinohu mayiraati? Manna baxannohuraati. Iyyoobi, “Mittu manchi reyiro, galagale lubbote heeꞌranno?” yee xaꞌmino. Hakkiinni togo yiino: “Ati woshshattoe, ani qoleemmohe. Angakki loosono sinsinnaawatto.” (Iyyoobi 14:14, 15) Iyyoobi baxillaanchu iimi Annisi iso reyotenni kayisate quqquxamannota seekke afino. Maganu soorraminoni? “Ani Yihowati; disoorrameemmoho.” (Milkiyaasi 3:6) Maganu reyino manni reyotenni kae fayyimma afiꞌre hagiidhanni heeꞌranna laꞌꞌa xaano sinsinnaawanno. Tini baxillaanchu anni woy ama shiirino qaaqqonsa layiꞌrate halchannohu gedeeti. Maganu kayinni, hasiꞌrinore baala assate wolqa noosi daafira mannuwiinni baxxinoho.—Faarso 135:6.
Reyo bushate bushaati, Maganu kayinni mala qixxeessino
Yihowa shiidhe manchittinori lowo geeshsha hagiidhitanno gede assara Yesuusira wolqa aannosi. Yesuusi reyitinore kayisa hasiꞌranno? Isi Alaazaari reyotenni kayisara albaanni, Alaazaari roduuwinna jaalla xissiisidhe wiꞌlitanno gara lae isino “wiꞌlino.” (Yohaannisi 11:35) Isi wole wote afidhinoha mitto qaaqqo shiidhinote Nayini katamira heedhanno manchonni xaadi. Yesuusi “lowo geeshsha mararese, ‘Aguri wiꞌlitootina’” yiise. Isi bayichonko qaaqqose reyotenni kayisino. (Luqaasi 7:13) Konni daafira, Yesuusi reyonna xisso manna lowo geeshsha gawajjitannota afino. Isi albillitte alame woꞌmate aana mannaho dadillensa hagiirreho qole soorranno wote tashshi yaannosi!
Xissiisannori tuncu yee egenninohe? Reyo malu nookki qarra labbahera dandiitanno. Ikkollana, Maganu Beettisi widoonni reyitinore kayisanno daafira reyote malu no. Maganu atino konne mala illekkinni laꞌꞌattora hasiꞌranno. Isi albillitte shiirootto manninni xaadde insa ledo hagiidhatora hasiꞌranno. Hegerera ikkanno soma mitteenni fushshidhinanna leellohe, hakkawote babbaxxate yinanniri higeno diheeꞌranno!
Sai birxichira kullihu Layeneli togo yiino: “Yannate gedensaanni, kao noota rosummo. Umi qara kuni rosi adhama giwinoe daafira tenne kulinoe mancho diammanoommo. Ikkollana, kuni Qullaawu Maxaafi giddo noore ikkinota buuxummoti tini hexxo adda ikkitinota afummo! Galagale ahaahiꞌyanni xaadeemmo yanna quqquxxannoe.”
Tenne hajo daafira ledde afa hasiꞌratto? Yihowa Farciꞌraasine reyino manni kaꞌꞌannota huluullantannokkihu mayiraatiro Qullaawu Maxaafikki giddonni kultahera hasidhanno. b
