1, 2. (a) Uulla Gannate ikkitanno wote afiꞌneemmohu maalaamittete atooti giddo ate roore quqquxannohehu hiikkonneeti? (Umi misile lai.) (b) Haaro alamera afiꞌneemmohu ayyaanaamittete atooti hiikkonneeti?

 “ADDU HEESHSHO.” Kuni qaali rooriidi roduuwinke uullate aana Gannatete afiꞌnannita hegere heeshsho heddanno gede assannonsa. Isinni hawaariya Phaawuloosi ‘hegere heeshshonna’ “addu heeshsho” xaadooshshe afidhinota coyiꞌrino. (1 Ximootewosi 6:12, 19 nabbawi. a) Xaa yannara, hegerenni hegere geeshsha geeddanno heeshsho agadhinanni heeꞌnoommo; tini qolte goofannokki hagiirrenna harshammo afiꞌneemmo gede assitannonke. Hatte yannara guuta ordunna surrete fayyimma hattono giddiidi salaame afiꞌne soodote kiiro baqqi yineemmo wote macciishshamannonkeri xa gudisame dileellannonke. (Isa. 35:5, 6) Hakkawote, banxeemmo manninna jaallanke ledo, hattono reyotenni kaino manninke ledo gamba yineemmo wote hagiidhineemmo gara hanni hedi! (Yoh. 5:28, 29; Looso 24:15) Qoleno, hakkawote sayinsete daafira, muuziiqu uduunne godoꞌla, biifado mine mina woy wole ogimma lende ronseemmo faro afiꞌneemmo.

 ² Tenne dancha coyibba afiꞌrate quqquxammeemmoha ikkirono, roore hagiirsiisannonkehu ayyaanaamittete atooteeti. Hakkawote Yihowa suꞌmi qullaawinotanna aliidimmasi ayirritinota afanke lowo geeshsha tashshi assitannonke! (Mat. 6:9, 10) Yihowara mannu oosoranna uullate noosihu hundi alaami woꞌmanni noota afanke baasa hagiirsiissannonke. Qoleno, galle honsanni guuta ikkineemmo wote Yihowawa shiqa mageeshshi geeshsha shota ikkitannoro heda dandaatto!—Far. 73:28; Yaq. 4:8.

3. Xaanni qixxaawa hasiissannonkehu maahooti?

³ Yesuusi “Maganu duuchankare dandaanno” yiino daafira konne atoote afiꞌneemmota dihuluullameemmo. (Mat. 19:25, 26) Ikkollana, haaro alamera hegerera heeꞌra hasiꞌnummoro hegere heeshsho “seekkine cuꞌmira” hasiissannonkehu xaati. Tenne busha alame goofimarchi daanno yanna hexxotenni agadhanna haaro alamera afiꞌneemmo heeshshora qixxaawate assa hasiissannonkere xaanni assa hasiissannonke. Tenne busha alamera heeꞌnenni konne assa dandiineemmohu hiittoonniiti?

4. Haaro alamera afiꞌneemmo heeshshora xaanni qixxaawa dandiineemmo gara lawishshunni kuli.

⁴ Maganu abbannote haaro alamera afiꞌneemmo heeshshora xaanni qixxaawa dandiineemmohu ma garinniiti? Lawishshaho, hanni wole gobba hadhe heeꞌrate kaoottohu gede assite hedi. Hatte heeshshora qixxaawa dandaattohu hiittoonniiti? Haꞌratto gobbara heeꞌranno manni coyiꞌranno afoo rosa hanafattoha ikkara dandaanno. Budensa rosano kaaꞌlitahera dandiitanno. Insa ittanno sagale giddo mite qamasse laꞌꞌattoha ikkara dandaanno. Qoleno, mito geeshshano ikkiro hatte gobbara noottohu gede ikkite heeꞌra hanafattora dandaatto. Korkaatuno hatte gobba haꞌritto gedensaanni heeꞌrattohu hakko garinniiti. Hatteente gede, haaro alamera afiꞌneemmo heeshshora qixxaawate, dandaaminke deerrinni hakko heeꞌnoommohu gede ikkine heeꞌrate woꞌnaalleemmo. Hanni konne assa dandiineemmo gara laꞌno.

5, 6. Tiokiraasete biddishshira maahoyye yine gala rosanke haaro alamera afiꞌneemmo heeshshora qajeelsitannonkehu hiittoonniiti?

⁵ Haaro alamera Maganu aliidimma woꞌmunni woꞌma ayirritanno. Hatti alame, uminsa umonsa gashsha hasiꞌranno manni woꞌminote tenne Sheexaanu alamenni lowo geeshsha baxxitinote! Mitu manni Magano irkiꞌrikki uminsanni heeꞌra hasiꞌranno; ikkina tini mayi guma abbitino? Maganu biddishsha adha giwa shetto, umo lekkicho baꞌino heeshsho, wole agurina bao abbitino. (Erm. 10:23) Mannu ooso baalanti baxillu noote Yihowa aliidimmara maahoyye yite galtanno yanna halchineemmo!

⁶ Haaro alamera, uulla gannate assate, reyotenni kaino manna rosiisatenna Yihowara mannu oosora noosi alaami ledo sumuu yaannore assate kaaꞌlannonke biddishsha dirijjitesiwiinni afiꞌneemmo wote tashshi yaannonke. Ikkina hatte yannara hakkeeshshi geeshsha baxisannonkekki loosolla uyininke? Uyinanninke biddishsha harunsine asse yinanninkere assineemmo? Hakkiinni saꞌneno loosonke hagiirrunni loonseemmo? Ninke giddo rooriidi ee yine qolleemmoti dihulullissannote! Ikkina, xaa yannara tiokiraasete biddishshira ayewoteno hajajammanni heeꞌnoommo? Konne assineemmoha ikkiro, Yihowa gashshooti hunda afiꞌneemmote hegere heeshshora qixxaambanni heeꞌnoommo yaate.

7, 8. (a) Sumuu yaanna buusama rosa hasiissannonkehu mayiraati? (b) Mitu Kiristaanira hiikkoye haaro looso uyinoonninsa? (c) Haaro alamera uullate aana afiꞌneemmo heeshsho daafira huluullammeemmokki coyi maati?

⁷ Haaro alamera afiꞌneemmo heeshshora qixxaawate, xaa yannara Yihowa dirijjite uyitannonke biddishshira maahoyye yine gala calla ikkikkinni afiꞌnummo coyinni kassi yaanna sumuu yine loosa rosa hasiissannonke. Yannankera albisa ikkite loossannori ledo buusammeemmoha ikkiro, lawishshaho dirijjitete giddo haaro loosu qeecha uyinanninke wote kassi yineemmohanna hagiidhineemmoha ikkiro, haaro alamerano hattoo akati heeꞌrannonketa heda dandiineemmo. (Ibiraawuyaani 13:17 nabbawi. b) Hunda Hexxote Gobbara, Isiraeelete dagara uulla beenkoonnihu hixunniiti. (Zeh. 26:52- 56; Iya. 14:1, 2) Haaro alamera ninke mittu mittunku hiikko heeꞌneemmo gede assinanniro dianfoommo. Ikkirono, buusamme loonseemmoha ikkiro uullate aana heeꞌnummowano heeꞌnummoro Yihowa fajjo assa lowo hagiirre uyitannonke.

⁸ Maganu Mangiste gashshooti hunda heeꞌra lowo ayirrinye ikkitinota anfoommo daafira, Yihowa dirijjite ledo buusamatenna uyinanninke looso baalanka loosate murciꞌneemmo. Yanna lexxitanni hadhanno wote hige loonseemmo loosi soorramara dandaanno. Lawishshaho, alba Ameerikaho Beeteelete soqqantannori mitu roduuwi qanchoho soqqantanno gede assineenna xaa yannara wolu garite woꞌma yanna soqqansho giddo bae atoote afidhe hagiidhitanni no. Alba addi addi bayicho hadhanni songuwa towaattanno roduuwi qolte, diru akkallenni woy wolu korkaatinni kainohunni xa baxxitino suwisaano ikkite soqqantanno gede gaamantino. Kassi yaa ronseemmoha, kaaꞌlo afiꞌrate Magano huucciꞌneemmoha, hattono isira soqqamate dandiinummore baala assineemmoha ikkiro, tenne qarrissannote goofimarchu yannara nafa hagiirrenna lowo atoote afiꞌneemmo. (Lawishsha 10:22 nabbawi. c) Albillittena? Haaro alamera hiittoo qooxeessira heeꞌneemmoro xa hendoommoha ikkara dandaanno; ikkollana, ninke hendoommowa ikkikkinni wolewa heeꞌnammora gaammankera dandiinanni. Hakkawote heeꞌnummowano heeꞌnummoro, qoleno uyinanninke loosi ikkihano ikkiro, hagiirrinke lowoha ikkannotanna kassi yineemmota dihuluullammeemmo.—Neh. 8:10.

9, 10. (a) Haaro alamera cinca hasiissannonke gede assannori maa ikkara dandaanno? (b) Cincineemmore ikkinoommota leellisha dandiineemmohu hiittoonniiti?

⁹ Haaro alamera, cinca hasiissannonke woti heeꞌrara dandaanno. Lawishshaho, mitu manni reyotenni kaeenna fiixinsanna jaallansa hagiidhitanna laꞌnammora dandiineemmo. Hakkawote ninke kayinni shiiꞌnoommo manni kaꞌꞌanno yanna cincatenni agadha hasiissannonkeha ikkara dandaanno. Hattoo wote, wolootu ledo hagiidhinanni cincine agadhineemmo? (Rom. 12:15) Yihowa coyiꞌrino qaali woꞌmanno yanna xa cincine agadha rosanke, hakkawoteno cincineemmore ikkineemmo gede kaaꞌlitannonke.—Mek. 7:8.

¹⁰ Halaale huwantoommo gara taashshinanni wote cincankeno, haaro alamera afiꞌneemmo heeshshora qixxaawate kaaꞌlitannonke. Yannankera Qullaawu Maxaafi halaale huwantoommo gara dirimu dirimunni biddi assinanni wote huwatate woꞌnaalleemmo? Hattono cincineemmo? Hatto ikkiro, haaro alamera Yihowa mannu ooso ma assitara hasiꞌrannoro yannate kiiro biddishsha aanno wote cinca qarra diꞌꞌikkitannonke.—Law. 4:18; Yoh. 16:12.

11. Yihowa xaa yannara mannu ledo hiittoonni heeꞌnammora rosiisanni noonke? Tini haaro alamera kaaꞌlitannonkehu ma garinniiti?

¹¹ Haaro alamera afiꞌneemmo heeshsho qixxaambe agadhineemmo gede kaaꞌlannonkehu wolu akati gatona yaate. Kiristoosihu Kumu Diri Gashshooti yannara, keeraanono finqilaasineno guuntete xeꞌnenni keeraaꞌmate yanna hasiissannonsa. (Looso 24:15) Hatte yannara mimmitu ledo baxillunni mitteenni heeꞌra dandiineemmo? Xaa yannara mulla gatona yaa ronseemmohanna mimmituwiinni godowa xeertiꞌra agurreemmoha ikkiro, hatte yannara konne assa shota ikkitannonke.—Qol. 3:12; Qolasiyaasi 3:13, 14 nabbawi. d

12. Albillitte afiꞌrate agadhine heeꞌnoommo coyibbanna xa heeꞌneemmo heeshsho mereero noo xaadooshshe kuli.

¹² Haaro alame eꞌnummo gedensaanni, hasiꞌnoommo coye baalanka hasiꞌnummo yannara afiꞌneemmo yaa ikka hoogara dandaanno. Hatte yannarano noonkere naandeemmorenna noonke coyinni kassi yineemmore ikka hasiissannonke. Yihowa xaa yannara heedhankera amaalanni noonke akatta hakkawoteno leellisha hasiissannonke. Haaro alamera heeꞌnoommohu gede ikkine heeꞌra rosanke, hegere geeshsha kaaꞌlitannonke akatta lossiꞌneemmo gede assitannonke. Konni  garinni, “dagganno alame” addunnita ikkitinota addinta ammanneemmota buuxinseemmo. (Ibi. 2:5; 11:1) Hakkiinni saeno, hatte yannara uullate aana woꞌmitanno keeraanchimma lowo geeshsha quqquxamme agadhinanni heeꞌnoommota leellinsheemmo. Ee, tini Maganu abbannote haaro alamera afiꞌneemmote hegere heeshshora qixxaawate kaaꞌlitannonke.

13. Haaro alamera wolu baalunku coyinni balaxisiinseemmo coyi maati?

¹³ Hanni albillitte afiꞌneemmote addu heeshshora qixxaawa dandiineemmota wole doogo laꞌno. Haaro alamera uullate aana falakkino sagalenna wole maalaamittete coyibba afiꞌneemmo hexxo noonkeha ikkirono, roore hagiirre afiꞌneemmohu ayyaanaamittete hasattonke woꞌmitanno woteeti. (Mat. 5:3) Hatte yannarano heeshshonke giddo wolu baalunku coyinni ayyaanaamittete coyibba balaxisiinseemmo; qoleno, Yihowara soqqama hagiirsiissannonketa leellinsheemmo. (Far. 37:4) Xaanni ayyaanaamittete coyibba balaxisiinseemmoha ikkiro, albillitte afiꞌneemmote addu heeshshora qixxaambanni heeꞌnoommo yaate.—Maatewoosi 6:19-21 nabbawi. e

14. Wedellootu hegere heeshshora qixxaabbanno gede kaaꞌlitannoti ayyaanaamitte mixo hiikkuriiti?

¹⁴ Ayyaanaamittete loosinni afiꞌneemmo hagiirri lexxanno gede assiꞌra dandiineemmohu hiittoonniiti? Tenne assa dandiineemmoti mitte doogo ayyaanaamitte mixo fushshiꞌrate. Wedellicha ikkittoronna heeshshokkinni Yihowara soqqamate heddanni noottoha ikkiro, addi addite woꞌma yanna soqqansho daafira kultanno borro nabbabbe hakkuri giddo mayira mitte mixo difushshiꞌratto? f Woꞌma yanna soqqansho giddo lowo diro keeshshitino roduuwa amaaꞌla dandaatto. Yihowara woꞌma yanna soqqansho giddo eꞌe soqqamattoha ikkiro, haaro alamera soqqamatto soqqanshora qixxaabbanni nootto yaate; qoleno xa afiꞌratto qajeelshinna woꞌnaalshi hakkawotira kaaꞌlannohe.

15. Maganu Mangiste halashshaano hiittee ayyaanaamitte mixo fushshiꞌra dandiitanno?

¹⁵ Maganu Mangistere dudumbeemmore ikkinoommo daafira, hiittee ayyaanaamitte mixo fushshiꞌra dandiineemmo? Lawishshaho, soqqanshote kaaꞌlitannota haaro ogimma rosa mixo assiꞌra dandiineemmo. Woy Qullaawu Maxaafita xintu seerubbanna tenne seerubba heeshshonke giddo harunsineemmo gara albinni roore huwatate sharrama dandiineemmo. Mannaho nabbawatenna lallawo shiqishate dandoonke woy gambooshshu yannara coyiꞌneemmo assaawe roore woyyeessiꞌrate mixiꞌra dandiineemmo. Fushshiꞌra dandiineemmota wole mixono hedattora dandaatto. Ee, ayyaanaamitte  mixo fushshiꞌrakki ayyaanaamittete coyira diinaggaawatto gedenna haaro alamera afiꞌratto heeshshora qixxaawatto gede kaaꞌlitannohe.

16. Yihowara soqqamate geeshsha ikkitanno heeshsho dino yineemmohu mayiraati?

¹⁶ Maganu abbannote haaro alamera heeꞌrate qixxaambanni heeꞌnoommo daafira woyyitino heeshsho saꞌe baꞌanni noonke yaateni? Deeꞌni! Yihowara soqqama roortannoti wole woyyitino heeshsho horonta dino. Isira soqqammeemmohu giddaambe woy bayira qarra saꞌꞌate yine calla diꞌꞌikkino. Kalaqammoommohu isira soqqammanni heeꞌnammoraati; togoo heeshsho taalle nookki hagiirre uyitannote. Yihowa biddishsha afiꞌnanni baꞌꞌannokki baxillisi giddo heeꞌra, isiweelo heeshshowiinni iiminna uulla geeshsha xeertidhinote. (Faarso 63:1, 3 nabbawi; g Far. 63:2) Yihowara woꞌmu wodaninni soqqamme afiꞌnanniha ayyaanaamittete atoote afiꞌrate haaro alame dagga geeshsha agadha dihasiissannonke; korkaatuno konne atoote xaanni afiꞌra dandiineemmo! Isinni mitu roduuwinke togoo atoote lowo diro mixxitanni keeshshitino; ee, kageeshshi geeshsha hagiirsiissannoti wolu gari heeshsho nookkita heeshshonkenni laꞌnoommo.—Far. 1:1-3; Isa. 58:13, 14.

17. Gannatete heeꞌneemmo wote uminke halchonna boohaarsha ma garinni laꞌneemmo?

¹⁷ Maganu abbannote haaro alamera, gama yanna uminke halcho wonshiꞌratenna boohaarate horoonsiꞌra dandiineemmo. Yihowa baxisannonkere assinenna gara ikkino boohaarsha boohaarre hagiidhinammora hasiꞌrannokkiha ikkoommero, tenne hasatto wore kalaqannonkeni? (Mek. 2:24) Yihowa hakkawote “heeshshote kalaqami baalunku hasatto” wonshanno. (Far. 145:16) Xaa yannarano boohaaranna dancha yanna sayisa dandiineemmo; ikkirono, tenne coyibbanni roore hagiidhineemmohu Yihowa ledo noonke jaalooma balaxisiinseemmoha ikkirooti. Gannate ikkitino uullara heeꞌneemmo woteno coyi hattooti. Konni daafira, xaanni uminke hasattonni roore balanxe Maganu Mangiste hasiꞌrankenna Yihowa soqqamaasine afidhanni noohu ayyaanaamittete atooti aana illachishanke busullete!—Mat. 6:33.

18. Gannatete afiꞌneemmote hegere heeshshora qixxaambanni heeꞌnoommota leellisha dandiineemmohu hiittoonniiti?

¹⁸ Gannate ikkitino uullara heeꞌneemmo wote, horonta afiꞌne egenninoommokki hagiirre afiꞌneemmo. Addu heeshsho afiꞌrate lowo hasatto noonketa leellishate xaanni hattee heeshshora qixxaambo. Yihowa heedhankera amaalanni noonke akatta lossiꞌno, hattono dancha duduwo diinaggaambe sabbanke hagiirre afiꞌno. Heeshshonke giddo ayyaanaamittete coyibba balaxisiisa hagiirsiissannonketa leellinsho. Ee, Yihowa yiinori woꞌmannota ammanne, haaro alamera afiꞌneemmo heeshshora xaanni qixxaambo!