1, 2. Tiia worinonkehu ayeti? Tiiu noonke daafira galata hasiissannonkehu mayiraati?

 MAGANU YIHOWA mannu ooso mitto coye uminsanni doodhitanno gede doodhate dandoo oye kalaqino. Maganu umi labbaahuranna meyaatera hattono oosonsara garunni massagannohanna bushanna dancha bade kulannoha tiia uyinonsa. Garunni horoonsiꞌneemmoha ikkiro, tiiꞌꞌinke dancha ikkinore assineemmo gedenna bushare gimbeemmo gede kaaꞌlannonke. Konni daafira, Maganu ninkera tiia aasi baxannonketanna mannu baalunku danchare assara hasiꞌrannota leellishshannote.

² Yannankerano mannu oosora tiiu noonsa. (Roomu Sokka 2:14, 15⁠a nabbawi. a) Batinyu manni Qullaawu Maxaafiha amanyootu seera harunsannokkiha ikkirono, mitu manni kayinni duucha wote dancha ikkinore assanno, hattono bushare giwanno. Batinye manna tiiꞌꞌinsa quwa sae bushino coye assannokki gede hoolannonsa. Mittu manchirano tiiu nookkiha ikkoommero alame mageeshshi geeshsha roore  bushshannoro hanni hedi! Hatto ikkoommero xaatenni roortanno bunshe macciishshanke digattanno. Ee, Maganu mannu oosora tiia wore kalaqinohura lowo geeshsha galanteemmosi!

3. Tiiu Kiristaanu songora baasa kaaꞌlanno yineemmohu mayiraati?

³ Wolu manni gede ikkikkinni Yihowa soqqamaano tiiansa qajeelsiꞌra hasidhanno. Tiiansa Maganu Qaali giddo garanna gara ikkinokkiri, hattono danchu coyinna bushu coyi daafira kultanno seerubba ledo sumuu yaanno gede assidhanno. Dancha gede qajeelino tiiꞌꞌi Kiristaanu songora baasa kaaꞌlanno. Ikkollana, tiianke qajeelsiꞌratenna horoonsiꞌrate egenno calla diguddanno. Qullaawu Maxaafi danchu tiiꞌꞌi ammanatenna baxillu ledo xaado afiꞌrinota kulanno. Phaawuloosi togo yee borreessino: “Tenne hajajo hedo xalalu wodaninni, danchu tiiꞌꞌinninna doga nookki ammananni afiꞌnanni baxilli heeꞌrannonke gedeeti.” (1 Xim. 1:5) Tiianke qajeelsiꞌneemmohanna kulannonkere macciishshineemmoha ikkiro, Yihowara noonke baxillinna ammana lexxitanno. Tiianke horoonsiꞌneemmo gari ayyaanaamittetenni mageeshshi geeshsha lophinoommoro, wodaninke hiittoohoronna Yihowa hagiirsiisa hasiꞌneemmohu mageeshshi geeshshaatiro leellishanno. Ee, tiiꞌꞌinke ninke hiittoo mannaatiro leellishanno.

4. Tiianke qajeelsiꞌra dandiineemmohu hiittoonniiti?

⁴ Ikkina tiianke qajeelsiꞌra dandiineemmohu hiittoonniiti? Tenne assa dandiineemmoti qara doogga, Qullaawa Maxaafa huuccatto assiꞌne ganyine xiinxalla, nabbamboommore hiincanna ronsoommore loosunni leellishate. Egenno afiꞌratenninna higge rosatenni sainore assa hasiissannonke yaate. Qullaawa Maxaafa xiinxallineemmohu Yihowa ayimma, akattasinna isi maricho baxannoronna giwannoro albinni roore huwatateeti. Togo assinummoro tiiꞌꞌinke Maganu Yihowa hedo ledo sumuu yaanno. Tiianke qajeelsiꞌnummo kiiro hedonke albinni roore Yihowate gedeeta ikkitanni hadhanno.

5. Konni birxichira maricho ronseemmo?

⁵ Ikkirono togo yine hendammora dandiineemmo: Dancha gede qajeelino tiiꞌꞌinke mitto coye murreemmo yannara kaaꞌlannonkehu ma garinniiti? Roduuwinke tiiansa horoonsidhe doodhitino coye ayirrisa dandiineemmohu hiittoonniiti? Qoleno qajeelino tiiꞌꞌinke dancha looso albinni roore diinaggaambe loonseemmo gede kaaꞌlannonkehu hiittoonniiti? Tenne xaꞌmuwa wodanaho wodhine, hanni tiiꞌꞌinke aane noohu sasu coyira kaaꞌlannonke gara laꞌno; insano: (1) xagisiꞌneemmo yannara, (2) boohaarshahonna (3) soqqanshote.

6. Duuchu roduuwi mayi hajo daafira xaꞌmo xaꞌmitanno?

⁶ Qullaawu Maxaafi busha assoote gimbeemmo gedenna inteemmonna angeemmo yannara quwa saꞌneemmokki gede jawaachishannonke. (Law. 23:20; 2 Qor. 7:1) Xissonna geedhimma gattannokkita ikkiturono, Qullaawu Maxaafi amaalera hajajamanke ordu fayyimma agadhateno mito geeshsha kaaꞌlitannonke. Mite gobbuwara mannu xiwamiro baadi xagga adhara woy hospitaale haꞌre xagisiꞌrara dandaanno. Lowo roduuwi duucha higge sinu biirora mite xagga adhate daafira sokka borreessitanno. Batinyu roduuwi, “Yihowara soqqamanno manchi togoo xagga adhiro garaho?” yite xaꞌmitanno.

7. Xiwamme xagisiꞌneemmo wote gara ikkinore doodha dandiineemmohu hiittoonniiti?

⁷ Sinu biirono ikkito songote cimeeyye, mittu rodii hiittoo xagicho adha hasiissannosiro xaꞌmiro nafa wossanate silxaane diafidhino. (Gal. 6:5) Ikkirono, gara ikkinore doodhanno gede kaaꞌlitara dandiitannota tenne hajo ledo xaado afidhinota Yihowa hedo kultasira dandiitanno. Lawishshaho, kuni Kiristaanchi “mundeetewiinni . . . xeertidhe” yitannota Qullaawu Maxaafi hajajo qaaga hasiissannosi. (Looso 15:29) Tini hajajo xiwamme xagisiꞌneemmo wote woꞌma mundee woy shoole qara qara mundeete kifilla adha hasiissannonkekkita xawisse kultannote. Mittu Kiristaanchi shoole qara qara mundeete kifillanni fultinota shiimmaadda mundeete beehachuwa adhate daafira wossaꞌnanno yannara nafa tini egenno tiiasi danchu  garinni horoonsiꞌranno gede kaaꞌlitasira dandiitanno. b Ikkina xagisiꞌneemmo wote gara ikkinore doodhineemmo gede kaaꞌlitannonketi wole Qullaawu Maxaafi amaale hiittenneeti?

8. Filiphisiyusi 4:5 fayyimma agadha lainohunni kaaꞌlitannonkehu hiittoonniiti?

⁸ Lawishsha 14:15 togo yitanno: “Balalu manchi kullisire baala ammananno; xiinxallu kayinni qaafosi baalanta seekke layiꞌranno.” Mitu xibbira xagichu nookkiha ikkara dandaanno. Konni daafira mannu tini xagga dhibba hursitannote yiino daafira calla adhineemmokki gede qoropha hasiissannonke. Phaawuloosi ayyaanunni togo yee borreessino: “Quwa saꞌinannikkire ikkitinoonniti manna baalaho leeltona.” (Fil. 4:5) Quwa saꞌneemmokkire ikkanke fayyimmanke agadhate yannanke gudinse uyine ayyaanaamittete coye mulaaginse agurreemmokki gede kaaꞌlitannonke. Heeshshonke giddo qaru coyi fayyimmanke agadha ikkituro, uminke daafira calla hendeemmore ikkineemmo. (Fil. 2:4) Wolu baalunku coyinni roore hasiisannohu ayyaanaamittete coyeeti; konni daafira quwa saꞌne fayyimmanke daafira yaada dihasiissannonke.—Filiphisiyusi 1:10 nabbawi. c

9. Roomu Sokka 14:13, 19 fayyimma agadhate daafira gara ikkinore assineemmo gede kaaꞌlitannonkehu hiittoonniiti? Songote giddo noo mittimma hunnammora dandiineemmohu ma assinummorooti?

⁹ Quwa saꞌꞌannokki Kiristaanchi wole manna isi hedo adhara dixixxiiwanno. Mitte Awuroppu gobbara heeꞌranno minaanninna minaama fayyimmate kaaꞌlitannote yite heddannota mite viitaamine woy sagale diinaggaabbe egensiissanni keeshshitino. Konni garinni, mito roduuwa hattee viitaamine adhanno gede ammansiissino; mitu kayinni tennera maahoyye diyiino. Gedensaanni hatti viitaamine yini gede kaaꞌlitukki gattino; konni daafira lowo roduuwi insara koffi yitino. Kuri minaanninna minaama mitte viitaamine woy sagale uminsara horoonsiꞌra dandiitanno. Ikkina fayyimma agadhate daafira yite songote mittimma hunansa garaho? Umi xibbi diro Roomaho heeꞌrino Kiristaani mite sagale itatenna mito barra ayirrisate daafira babbaxxitino hedo noonsa. Phaawuloosi insa mayyee amaalino? Togo yiinonsa: “Mittu manchi mitto barra woluwiinni roorinohu gede asse hedanno; wolu qole mittu barri wolu baalunku barri ledo taaloho yee hedanno; konnira mittu mittunku manchi woꞌmunni woꞌma ammaninore assona.” Wolu mannira guficho ikkannore assa dihasiissanno.—Rom. 14:5, 20; Roomu Sokka 14:13, 15, 19 nabbawi. d

10. Wolu roduuwi woyyannonke yite doodhitino coye ayirrisa hasiissannonkehu mayiraati? (Umi misile lai.)

¹⁰ Ammanate rodiinke mitte hajo daafira tiiꞌꞌisi  massageennasi wossaꞌnino coyi leella giwinkero, muddamme digaraho yaa woy hedinore aguranno gede xixxiiwa dihasiissannonke. Konni rodii tiiꞌꞌi miteekke “laafa” ikkinohura, rooru qajeelshi hasiisannoha ikkara woy mitu coyira danna sae qorophannoha ikkara dandaanno. (1 Qor. 8:11, 12) Qoleno, ninke uminke tiia Qullaawu Maxaafihu xintu seeri garinni lende qajeelsiꞌra hasiissannonkeha ikkara dandaanno daafira tiianke layiꞌra hasiissannonke. Fayyimma agadhanna wole hattoo hajo lainohunni woyyannonkere uminke doodhanna doorshinke abbannore dandaa hasiissannonke.

11, 12. Boohaarsha doodhineemmo wote hiittee Qullaawu Maxaafi amaale dea dihasiissannonke?

¹¹ Yihowa mannu ooso kalaqinohu boohaarre afiꞌnanni hagiirre afidhanno gede asseeti. Salamooni “osoꞌlate yanna no,” “sirbateno yanna no” yiino. (Mek. 3:4) Ikkollana baalunku boohaarshi danchaho, hagiirsiisannoho woy mannimma haaroonsannoho yaa diꞌꞌikkino. Qoleno boohaarranni lowo yanna huna hasiissannonke woy ganyine boohaara hasiissannonke yaano diꞌꞌikkino. Tiiꞌꞌinke dancha boohaarsha doodhineemmo gedenna konni boohaarshinni horo afiꞌneemmo gede kaaꞌlannonkehu hiittoonniiti?

¹² Qullaawa Borro “maalu looso” yaamantanno akattawiinni xeertiꞌra hasiissannonketa kultanno. Kuri giddo mitu “foorre, batte, mancaꞌꞌa amanyoote, kaphu maganna magansiꞌra, agaanintete looso, gibbo, gaance, hinaaso, hanqe boolaqiꞌra, heewisama, babbadama, halaaluwiinni baxxe fula, dhiibbe, dimba, quwa saino qeexaalanna woleno kuri labbannoreeti.” Phaawuloosi “togoo coyibba assitannori Maganu Mangiste diragidhanno” yee borreessino. (Gal. 5:19-21) Konni daafira ninkeneeto togo yine xaꞌma hasiissannonke: ‘Tiiꞌꞌiꞌya gibbo, heewo, sircho bade giwa woy finqille woꞌmitino ispoortewiinni xeertiꞌreemmo gede kulannoe? Teeda bainore leellishshanno, woy foorre, dimbanna agaanintete looso mitto qarrano afidhinokkihu gede assite shiqishshanno filme laeemmokki gede hoolannoe?’

13. Umi Ximootewosi 4:8 nna Lawishsha 13:20 aana noo amaale boohaarsha doodhineemmo wotira kaaꞌlitannonkehu hiittoonniiti?

¹³ Qullaawu Maxaafi boohaarsha lainohunni tiianke qajeelsiꞌrate kaaꞌlitannota xintu seerubbano amadino. Kuri giddo mittu, “Mannimmate guunte qajeelshi mito geeshsha kaaꞌlanno” yaannoho. (1 Xim. 4:8) Batinyu manni ispoorte ganyine loosa ordunna surrete fayyimmara kaaꞌlitannota ammananno. Ikkina ispoorte wolu manni ledo loosa hasiꞌneemmoha ikkiro kaꞌnummo manni baalu ledo loosa hasiissannonkeni? Lawishsha 13:20 togo yitanno: “Hayyootu ledo haꞌrannohu hayyicha ikkanno; balalootu ledo jaalooꞌmannohu kayinni qarru giddora eanno.” Ee, boohaarsha doodhineemmo yannara Qullaawu Maxaafinni qajeelino tiianke horoonsiꞌra hasiissannonke.

14. Mitte maate Roomu Sokka 14:2-4 aana nooha xintu seera harunsitinohu hiittoonniiti?

¹⁴ Kiristiyaninna Daaniyela yinanni minaanninna minaamara lame naggi yitino ooso noonsa. Kiristiyaani togo yiino: “Maatete Magansiꞌra assiꞌneemmo hashsha boohaarshu daafira kayinse hasaambummo. Mitu boohaarshi dancha ikkinotanna mitu kayinni dancha ikkinokkita hasaambe sumuu yinummo. Dancha jaallaati yinanniri hiittooreeti? Qaaqqonke mitootu Yihowa Farciꞌraasine ikkitino wedellooti rosu mine fooliishshote yannara ise digaraho yite heddanno coye assitanna laꞌinota kultunke. Hakkawote iseno insa gede ikka yortino. Ninke baalunkura tiiu noonketanna maa assa hasiissannonkeronna hiittoo manni ledo hosa hasiissannonkero doodhate konne tiianke horoonsiꞌra hasiissannonketa hasaambummo.”—Roomu Sokka 14:2, 3 nabbawi; e Rom. 14:4.

15. Boohaarate hendeemmo yannara Maatewoosi 6:33 qaaga kaaꞌlitannonkehu hiittoonniiti?

 ¹⁵ Boohaartanni mageeshshi yanna sayisatto? Ayyaanaamittete coye lawishshaho, songote gambooshshe, qanchu soqqanshonna gillete xiinxallo balaxisiisattonso, boohaarsha roorsatto? Heeshshokki giddo balaxisiisatto coyibba hiikkuriiti? Yesuusi togo yiino: “Balaxxine Maganu Mangistenna keeraanchimmasi hasiꞌraꞌne agurtinoonte, wole coyibba baala uyinanniꞌnena.” (Mat. 6:33) Tiiꞌꞌikki Yesuusi uyino amaale ledo sumuu yaanno coye balaxisiisatto gede kulannohe?

16. Tiiꞌꞌinke sabbankeemmo gede jawaachishannonkehu hiittoonniiti?

¹⁶ Qajeelino tiiꞌꞌi gara ikkinokkire assineemmokki gede qorowisiisannonkeha calla ikkikkinni, dancha looso loonseemmo gedeno kakkayisannonke. Danchu loosi giddo qara ikkinohu minunni mine haꞌne sabbakatenna sabbakate yine fulloommokki yannara farciꞌrate. Phaawuloosira tiiꞌꞌisi hatto assanno gede jawaachishinosi. Isi togo yee borreessino: “Sabbakate giddeetu nooe. Isinni dancha duduwo sabbaka hoogummoro anera bayissibao!” (1 Qor. 9:16) Isi lawishsha harunsinummoro tiiꞌꞌinke gara ikkino coye assinanni heeꞌnoommota kule jawaachishannonke. Qoleno, dancha duduwo dudumbeemmoha ikkiro, macciishshannonke manni tiiꞌꞌino danchurira kakkaꞌꞌanno gede assineemmo. Phaawuloosi togo yiino: “Halaalu xawanno gede assine, Maganu albaanni mannu baalunku tiia baxisanno garinni ninkeneeto ikkadda assine shiqinsheemmo.”—2 Qor. 4:2.

17. Mitte wedellitte rodoo tiiꞌꞌise kulinosere assitinohu hiittoonniiti?

¹⁷ Jakuliini 16 diriti noo waro, rosu mine kalaqamu sayinse (bayoloje) rossino. Hatte yannara suutu soorro daafira rosiinsanna macciishshitino. Ise togo yitino: “Tiiꞌꞌiꞌya bashsho gede kifilete konni hasaawira karsameemma gede difajjinoe. Suutu soorro daafira rosiinsoonni rosi diadhaminoe. Rosiisaanchiꞌyawa shiqe suutu soorro daafira nooe hedo kulummasi. Hakkawote isi hanqa agure, kifileꞌya rosaano baalate albaanni uurre kalaqamu daafira kuleemmansa gede koyisie.” Jakuliini Qullaawu Maxaafinni qajeelino tiiꞌꞌise kulinosere macciishshite assitinohura lowo geeshsha tashshi yiinose. Ateno tiiꞌꞌikki gara ikkinore assatto gede kakkayisannohe?

18. Danchunna garunni massaganno tiiꞌꞌi hasiissannonkehu mayiraati?

¹⁸ Yihowa fushshino seerinna isi hedo ledo sumuu yee heeꞌrate mixiꞌra lowo geeshsha kaajja coyeeti! Tenne assate tiiu lowo geeshsha kaaꞌlankera dandaanno. Maganu Qaale ganyine xiinxalline, nabbamboommore hiincinenna loosunni leellishate sharramme tiianke qajeelsiꞌra dandiineemmo. Hatto assinummoro, tiiꞌꞌinke garunni massagannonkeha ikkanno!