1, 2. Hawaariya Yohaannisi borreessino garinni, Maganu iso banxeemmo gara leellishinonkehu hiittoonniiti?

 MITTU anni oososi rosiisa dandaannoti qara doogo isi umisi dancha lawishsha ikkate. Hawaariya Yohaannisi togo yee borreessino: “[Maganu] ninke balaxe baxinonkehura ninkeno banxeemmosi.” (1 Yoh. 4:19) Konni daafira Yihowa, banxeemmosi gede assannonkeha taalle nookki baxillesi leellishe lawishsha ikkinonke.

² Maganu ‘balaxe baxinonkehu’ hiittoonniiti? Hawaariya Phaawuloosi togo yiino: “Maganu cubbaataamma ikkine heeꞌneenna Kiristoosi ninke daafira reyanno gede asse baxannonketa leellishino.” (Rom. 5:8) Yihowa, bayira kakkalo qixxeesse yaano Beettosi ammana noonsa mannira wodote kakkalo asse oye, addu baxilli hiittoohoro leellishino. Yihowa umisi horo agure, baxillesi loosunni leellishino. Maganu assinonketi tini lowo danchumma, isiwa shinqe baxillesi afiꞌneemmo gedenna ninkeno iso banxeemmo gede faro fantinonke.—1 Yoh. 4:10.

3, 4. Yihowa banxeemmota leellinsheemmohu hiittoonniiti?

³ Yihowahu qaru akati baxilleho; hakko daafira, Yesuusi baalante hajajo giddo roortannoti hiittenneetiro xaꞌmino manchira aane  noore yee qolinohu mayiraatiro huwata dandiineemmo: “Maganokki Yihowa woꞌmu wodanikkinni, woꞌma lubbokkinni, woꞌma surrekkinninna woꞌma wolqakkinni baxi.” (Marq. 12:30) Yesuusi coyiꞌrino qaali, umihunni Magano baxa hasiissannonkehu wodaninkenni ikkinota huwachishannonke. Yihowa daratu wodaninni banxammosira dihasiꞌranno. Ikkollana, Yihowa woꞌma lubbonkenni, woꞌma surrenkenninna woꞌma wolqankenni baxa hasiissannonketano deꞌnoonke. Togo yaa, Magano wodaninkenni baxa calla guddannokkita leellishshannote. Magano wodaninkenni baxano agurranna, hendeemmonna assineemmo coyinni iso banxeemmota leellisha hasiissannonke. Masaalaanchu Mikkiyaasi borreessinonte gede, Yihowa ninkewiinni hasiꞌrannohu hatto assinammoraati.—Mikkiyaasi 6:8 nabbawi. a

⁴ Iimi Annanke addinta banxeemmota leellisha dandiineemmohu hiittoonniiti? Mittoreno gatisiꞌnummokki iso baxa hasiissannonke. Yesuusi yiinonte gede, wodaninkenni, hedonkenninna assineemmo coyi baalunkunni iso banxeemmota leellisha hasiissannonke. Sai birxichira, Yihowa oososira bayira baxillesi leellishinota shoole doogga ronsoommo. Xa qolle, ninke Yihowara noonke baxille lossiꞌranna konne baxillenke leellisha dandiineemmota shoole doogga laꞌno.

5. Yihowa assinonkere hendeemmo wote ninkeno maa assate kaꞌneemmo?

⁵ Mannu mitore aannohe wote maa assatto? Hakkoye uyihe mancho galatittokki digatatto. Qoleno, hakkonne uyinohe coye mulluri gede assite tugge agurittokki garunni horoonsiꞌratto. Rosaanchu Yaaqoobi togo yee borreessino: “Dancha eltonna guutu atooti baalunku alinni, iimi xawaabbi Anniwiinni dirranno; isi qole, bayichunni bayicho saꞌꞌanno caali gede disoorramanno.” (Yaq. 1:17) Yihowa duuchanka wote heeshshote heeꞌneemmonna hagiidhineemmo gede hasiisannonkere aannonke. Tini ninkeno iso banxeemmo gede assitannonketa diꞌꞌikkitino?

6. Isiraeele ayewoteno Yihowa atoote afiꞌrate maa assa hasiissinonsa?

⁶ Isiraeele lowo xibbe diro Yihowa maalaamittete ikko ayyaanaamittete hasiisannonsare batise oye baxillunni towaatannansa heedhino. (Marro 4:7, 8) Ikkollana, insa konne atoote afidhannohu Maganu Higgera hajajamansa agura hoogguro callaati; isi uyinonsa higge giddo mitte baattote aaninni “umi laalchi giddo dooraminoha” ganyite Yihowara shiqisha hasiissannota kultannote. (Wol. 23:19) Konni garinni Isiraeele, Yihowa baxillenna atoote mulluri gede assite laꞌannokkita leellishshanno.—Marro 8:7, 9-11 nabbawi; b Marro 8:8.

7. Yihowa banxeemmota leellishate noonkeha “muxxe coye” hiittoonni horoonsiꞌra dandiineemmo?

⁷ Ninkena? Yannankera, saadate woy gidu kakkalo shiqinsheemmokkiha ikkirono, noonkeha “muxxe coye” Maganoho uyine iso banxeemmota leellisha dandiineemmo. (Law. 3:9) Tenne assa dandiineemmoti mite doogga hiikkuriiti? Alamete deerrinnino ikko songonkera loonsanniha Mangistete looso woxunni kaaꞌla dandiineemmo. Noonke miinji ikki geeshshihano ikkiro, Yihowara noonke baxille leellinsheemmo doogga giddo mitte tenneeti. (2 Qor. 8:12) Ikkollana, Yihowara noonke baxille leellisha dandiineemmoti wole dooggano no.

8, 9. Yihowa coyiꞌrino qaale wonshannota addaxxa, iso baxate ledo mayi xaado afidhino? Lawishshunni kuli.

 ⁸ Yesuusi harunsaanosira, sagaletenna uddidhannorira yaaddannokki gedenna balaxxe Maganu Mangiste hasiꞌransa agurtannokki gede kulinonsata qaagi. Qoleno, Anninke mayi hasiissannonkero afinota coyiꞌrino. (Mat. 6:31-33) Yihowa konne qaalesi agadhannota addaxxineemmo deerri, iso mageeshshi geeshsha banxeemmoro leellishanno; korkaatuno baxillunna addaxxa xaado afiꞌrino coyeeti. Addaxxineemmokki mancho addinta banxeemmo yaa didandiineemmo. (Far. 143:8) Konni daafira ninkeneeto togo yine xaꞌma dandiineemmo: ‘Fushshiꞌreemmo mixonna heeꞌreemmo heeshsho Yihowa addinta baxeemmota leellishshanno? Barru baala asseemmori, isira hasiisannoere wonshate wolqa noosita addaxxeemmota leellishanno?’

⁹ Mayiki yinanni Kiristaanchi Yihowa baxannotanna addaxxannota leellishino. Isi anjesinni hanafe, wole gobba haꞌre Maganoho soqqama lowo geeshsha hasiꞌranno. Isi seenne adhe lame qaaqquulle ilinoha ikkirono, hatti hasattosi horonta dibaꞌino. Isinna maatesi, sabbakkannori roore hasiissanno gobbuwara haꞌre soqqamate daafira kultannota borronke aana fultinota batinye birxichuwanna rippoorte nabbabbuti, heeshshonsa shota assiꞌrate murcidhu. Minensa hirte shiimu minira heeꞌra hanaffu. Hakkiinnino, Mayiki loosanno looso ajishi hattono wolewa heeꞌre interneetetenni loosiisa dandaanno gara rosi. Maatesi baara widira hadhe lame diro hagiirrunni soqqantuhu gedensaanni, Mayiki togo yee coyiꞌrino: “Yesuusi Maatewoosi 6:33 aana coyiꞌrinori halaale ikkinota heeshshonkenni laꞌnoommo.”

10. Nugusu Daawiti assinonte gede, ninkeno Yihoware kulanno halaale hiincanke maaho kaaꞌlitannonke?

¹⁰ Mitu 3,000 diri albaanni Nugusu Daawiti gordo lae dhagge assiꞌrino. Isi togo yee borreessino: “Iimi Maganu ayirrinye coyiꞌranno, gorduno angasi looso duduwanno.” Hakkiinnino, Maganu Higge hayyonnita ikkitinota dhagge assiꞌre togo yiino: “Yihowa higge guutate, galagalle jawaante afiꞌnanni gede assitanno. Yihowa qaagiishshi ammaꞌninanniho, woꞌnaalshu noosikkiha hayyicha assanno.” Daawiti togo dhagge assiꞌre hiincasi maaho kaaꞌlitinosi? Isi lede togo yiino: “Goloꞌyanna Gatisaanchoꞌya Yihowa, afiiꞌya qaalinna wodaniꞌya hedo ate hagiirsiissannota ikkito.” Ee, Daawiti Yihowa ledo muli jaalooma kalaqiꞌrinoti dihuluullissannote.—Far. 19:1, 7, 14.

11. Maganu uyinonketa falakkinota Qullaawa Borro egenno isira noonke baxille leellishate horoonsiꞌra dandiineemmohu hiittoonniiti? (Umi misile lai.)

¹¹ Yannankera Yihowa kalaqonna isira mannu oosora noosi alaami daafira lowo egenno afiꞌnoommohura maassammoommoreeti. Tini alame kaffi yiino roso ronsanni gede jawaachishshanno. Ikkollana, lowo mannira tuncu yiinonsari leellishannonte gede, togoo roso harunsa ammanankenna Maganoho noonke baxilli baꞌꞌanno gede assitanno. Qullaawu Maxaafi, egenno baxa calla ikkikkinni hayyonna wodanchano afiꞌra hasiissannonke gede kulanno. Hatto yaa, Maganu uyinonke egenno wolootaho ikko uminkera kaaꞌlanno garinni horoonsiꞌneemmo gara afa hasiissannonke yaate. (Law. 4:5-7) Maganu “fajjo duuchunku gari manni gatanno gedenna halaalunnita gara ikkitino egenno afiꞌranno gedeeti.” (1 Xim. 2:4) Manna baalaho Maganu Mangisteha dancha duduwo duduwatenna Maganoho mannu oosora noosiha bayira alaama mannu afanno gede kaaꞌlate diinaggaambeemmoha ikkiro, Yihowara noonke baxille leellinshanni heeꞌnoommo.—Faarso 66:16, 17 nabbawi. c

12. Mitte qaaqqo Yihowa uyinoseta ayyaanaamittete elto naaddannota leellishshinohu hiittoonniiti?

¹² Wole agurina qaaqquullu nafa, Yihowa qixxeessinota ayyaanaamittete qixxaawo naadde isira noonsa baxille leellisha dandiitanno. Shaneeni  11 diriti noo waro 10 diro ikkannose rodoose ledo “Maganoho Gala” yinanniha Qoqqowu Gambooshshe maatensa ledo hadhino. Gambooshshunnite mitte pirogiraame yannara qaaqquullu baalunku, bande worroonni basera ofoltanno gede koyinsi. Ise hakkawote lowo geeshsha waajjitinoha ikkirono, hadhe ofoltu. Hakkiinni baalunku qaaqquullira, Wedellu Xaꞌmanno Xaꞌmonna Mala Ikkitanno Dawaro yaanno maxaafa uyininsata lowo geeshsha hagiidhitino. Tini kaajja elto Shaneeni Magano Yihowa ma garinni laꞌanno gede assitinose? Ise togo yitino: “Yihowa addinta nooha ikkinotanna ane lowo geeshsha baxannoeta huwatoommahu hakkawoteeti.” Leddeno, “Bayiru Maganinke Yihowa togoota biifadonna guuta elto mulla aannonke daafira lowo geeshsha hagiidhinoommo!” yitino.

13, 14. Yihowa seejjannonke wote ma assa hasiissannonke? Mayira?

¹³ Qullaawu Maxaafi, “Annu baxanno beettosi seejjannonte gede, Yihowano baxanno manna seejjanno” yaanno. (Law. 3:12) Ikkina seejjinanninke yannara maa assa hasiissannonke? Hawaariya Phaawuloosi togo yee noore borreessino: “Seejjo umi qara hagiirsiissannota dilabbanno, hatteentenni dadillissanno.” Phaawuloosi hatto yaasi seejjo uyitanno horo ajishe laꞌꞌannota leellishshannota diꞌꞌikkitino. Isi lede togo yiino: “Gedensaanni higge kayinni, seejjotenni qajeelino mannira keeraanchimmanniha salaamete guma laaltannonsa.” (Ibi. 12:11) Yihowa banxeemmoha ikkiro, isi aannonke amaale macciishsha giwa woy hifatama dihasiissannonke. Mitu mannira tini qarra ikkitannonsa. Yihowara noonke baxilli togoo akata qeeꞌlate lowo geeshsha kaaꞌlannonke.

¹⁴ Milkiyaasi waro, batinyu Yihudooti Maganu amaale dimacciishshitanno. Insa Yihowa kakkalo shiqishate daafira fushshino higge affinoha ikkirono, tenne higge lashshi assitinohura Yihowa kaajjishe amaalinonsa. (Milkiyaasi 1:12, 13 nabbawi. d) Kuni assootinsa Yihowa albaanni mageeshshi geeshsha kabbaadete? Yihowa togo yiinonsa: “Kiꞌne aana rumo soyeemmo; qoleno atooteꞌne rumote qole soorreemmo. Ee, [hajajoꞌya] macciishshitinoonnikki daafira atooteꞌne rumote qole soorroommo.” (Mil. 2:1, 2) Addaho, Yihowa baxillunni aannonke amaale anfanni heeꞌnenni lashshi assa woy tenne rosicho assiꞌra, buutote qarra abbitara dandiitanno.

15. Yannankera halaꞌlitinota hiittee hedo hooꞌla hasiissannonke?

¹⁵ Tini anera calla yitannotinna umonsa calla baxxanno ilama, amaale adha agurina macciishsha nafa dibaxxanno. Amaale woy seejjo adhitannore labbannori nafa, konne assitannohu xiixantanniiti. Ikkollana Kiristaana ‘tini alame quxxansara wodha hasiissannonsakki’ gede amaalloonninsa. Hatteentenni, “guuta Maganu fajjo” huwatanna harunsa hasiissannonke. (Rom.  12:2) Yihowa dirijjitesi widoonni, hasiissannonke amaale hasiissannonke yannara aannonke; lawishshaho labbaahunna meyaate mereero hiittoo aante heedhankera hasiissannoro, jaalla doodhineemmo garanna boohaarshu daafira kultanno amaale uyinoonninke. Konne biddishsha maahoyye yine adhinenna harunsine, Yihowa galanteemmorenna iso addinta banxeemmore ikkinoommota leellinsheemmo.—Yoh. 14:31; Rom. 6:17.

16, 17. (a) Mitto coye assate kaꞌneemmo wote Yihowa fajjo maatiro heda hasiissannonkehu mayiraati? (b) Isiraeele Yihowara baxillunna ammana xeꞌinonsata leellishshinohu hiittoonniiti?

¹⁶ Qaaqquullu gawajjannori noota laꞌanno wote, rakke anninsawanna amansawa xooqqanno. Lophitanni hadhanno wote kayinni, insaneeto roore addaxxitanno; hattono uminsa doorsha doodhitanno. Tini qolte gikki yitanni noota leellishshannote. Ikkollana, anninsanna amansa ledo muli jaaloomi noonsa ooso, lophitu gedensaannino mitto coye assitara albaanni insa amaaꞌlitanno. Ayyaanaamitteteno coyi hattooti. Yihowa qullaawu ayyaanisinni, “hasatto heedhannonke gedenna loosoho kakkaꞌneemmo gede wolqa” aannonke. Ikkollana, mitto coye Yihowa fajjo maatiro hendummokki uminkenni assineemmoha ikkiro, tini Yihowa addaxxanna baxillu xeinonketa leellishshanno.—Fil. 2:13.

¹⁷ Saamueeli diro Isiraeele Filisxeemete ledo olante baasa qeelantino. Hakkawote tenne Maganu dagara kaaꞌlonna agarooshshu lowo geeshsha hasiisinonsa. Insa ma assituyya? Togo yitino: “Ninke ledo ikkanno gedenna baarigaarranke anganni gatisannonke gede, Yihowaha gondooru taawoota Seelonni haaꞌne haꞌno.” Hakkiinni mayi ikkiyya? “Lowo manni goofi; Isiraeelete widinni 30,000 lekkatenni haꞌre olamanno wottaaddari reyi. Maganu taawootino qafadami.” (1 Sam. 4:2-4, 10, 11) Isiraeele taawoota haadhe hadhino daafira Yihowa kaaꞌlo hasidhinoha lawara dandaanno. Ikkollana, insa Yihowa biddishsha afiꞌrate woꞌnaala agurte uminsa hedo harunsitino; tini baasa gawajjitinonsa.—Lawishsha 14:12 nabbawi. e

18. Qullaawu Maxaafi Yihowa addaxxate daafira maa rosiisannonke?

¹⁸ Faarsaanchu togo yee borreessasi gara ikkitino dooꞌꞌo noosita leellishshanno: “Magano hexxotenni agadheemmo; korkaatuno iso Bayiru Gatisaanchiꞌya gede asse guwisiꞌreemmosi. Maganoꞌya, hexxo mudhoommo. Ate qaageemmohu iseraati.” (Far. 42:5, 6) Tini Yihowa lowo geeshsha baxannota leellishshannote! Atina, iima heeꞌranno Annanke togo assite baxatto woy addaxxatto? Tenne xaꞌmora ee yite qolattoha ikkiro nafa, aante noote Qullaawu Maxaafi hedo garinni Maganoho noohe ammana lossiꞌra hasiissannoheha ikkara dandaanno: “Woꞌmu wodanikkinni Yihowa addaxxi; umikki wodancha irkidhooti. Doogokki duuchantera iso afi, isi qole hodhaanchokki suwashsho assannohe.”—Law. 3:5, 6.

19. Yihowa baxattota leellisha hasiꞌrattohu hiitte doogganniiti?

¹⁹ Yihowa ninke balaxe baxe iso baxa dandiineemmo gara leellishinonke. Konne Yihowaha kaajja lawishsha ayewoteno deꞌnoonke. Hattono, Yihowa ‘woꞌmu wodaninkenni, woꞌma lubbonkenni, woꞌma surrenkenninna woꞌma wolqankenni banxeemmota’ albinni roore leellinsho.—Marq. 12:30.