Saamueeli, Tereesanna Magidaaliini coyidhinori, mannu huuccatto assiˈrannohu babbaxxino korkaatira ikkinotanna mitu manni huucciˈrannohu roore gara ikkino coyira ikkinota leellishanno. Mitu manni huuccatto assiˈrannohu woˈma giddonsanniiti; mitu kayinni huucciˈrannohu goowi alinniiti. Ikkollana, mannu huuccatto assiˈrannohu rosu mine fonqolo saˈˈate, baxannoti ispoortete kilawe qeeltanno gede, maatensa heeshshora Maganu biddishsha afiˈrate, woy wolu batinyu korkaatira ikkirono, huuccatto hasiissanno yee ammanannohu lowo miliyoone ikkanno manni no. Isinni mite xiinxallo leellishshanno garinni, ammaˈno noonsakkihu mitu manni nafa ganye huucciˈranno.

Atina huuccatto assiˈratto? Hatto ikkiro, huucciˈrattohu maahooti? Huuccatto assiˈrate rosichi heeˈriherono heeˈrano hoogihero, togo yite hedattoha ikkara dandaanno: ‘Huuccatto assiˈra isi kaaˈlitannori no? Huuccatto macciishshannohu no?’ Mittu borreessaanchi, huuccatto “xaginaateho kaaˈlanno coyi” gede calla ikkitinota xawisino. Mite xaggate fullahaanorano hattoo hedo noonsa; insa huuccatto “wole xagisiˈnanni doogga” wido ikkitinota coyidhino. Ikkina huuccatto assiˈranno manni mulla kaaˈlannori nookkire assanni, woy huuccattonsa xagichu gede calla ikkite kaaˈlitanni noonsa yaate?

Qullaawu Maxaafi huuccatto xagichu gede calla ikkitukkinni hakkiinni saˈino horo afidhinota kulanno. Qoleno, gara ikkitino doogonninna gara ikkino coyira huucciˈneemmoha ikkiro, huuccattonke macciishshannohu noota kulannonke. Tini yaatto addaho? Hanni tennera taje ikkannore laˈno.