Saamueeli, Tereesanna Magidaaliini coyidhinori, mannu huuccatto assiꞌrannohu babbaxxino korkaatira ikkinotanna mitu manni huucciꞌrannohu roore gara ikkino coyira ikkinota leellishanno. Mitu manni huuccatto assiꞌrannohu woꞌma giddonsanniiti; mitu kayinni huucciꞌrannohu goowi alinniiti. Ikkollana, mannu huuccatto assiꞌrannohu rosu mine fonqolo saꞌꞌate, baxannoti ispoortete kilawe qeeltanno gede, maatensa heeshshora Maganu biddishsha afiꞌrate, woy wolu batinyu korkaatira ikkirono, huuccatto hasiissanno yee ammanannohu lowo miliyoone ikkanno manni no. Isinni mite xiinxallo leellishshanno garinni, ammaꞌno noonsakkihu mitu manni nafa ganye huucciꞌranno.

Atina huuccatto assiꞌratto? Hatto ikkiro, huucciꞌrattohu maahooti? Huuccatto assiꞌrate rosichi heeꞌriherono heeꞌrano hoogihero, togo yite hedattoha ikkara dandaanno: ‘Huuccatto assiꞌra isi kaaꞌlitannori no? Huuccatto macciishshannohu no?’ Mittu borreessaanchi, huuccatto “xaginaateho kaaꞌlanno coyi” gede calla ikkitinota xawisino. Mite xaggate fullahaanorano hattoo hedo noonsa; insa huuccatto “wole xagisiꞌnanni doogga” wido ikkitinota coyidhino. Ikkina huuccatto assiꞌranno manni mulla kaaꞌlannori nookkire assanni, woy huuccattonsa xagichu gede calla ikkite kaaꞌlitanni noonsa yaate?

Qullaawu Maxaafi huuccatto xagichu gede calla ikkitukkinni hakkiinni saꞌino horo afidhinota kulanno. Qoleno, gara ikkitino doogonninna gara ikkino coyira huucciꞌneemmoha ikkiro, huuccattonke macciishshannohu noota kulannonke. Tini yaatto addaho? Hanni tennera taje ikkannore laꞌno.