AANIIDI QOOLIHA COYI UMO | QULLAAWU MAXAAFI YAANNORE HUWATA DANDAATTO
Qullaawu Maxaafi Yaannore Huwata Maaho Kaaꞌlitanno?
“Qullaawu Maxaafi egennaminoho ammaꞌnote maxaafaati. Ikkollana wole gobba maxaafa ikkino daafira Chayinu mannira kaaꞌlannori dino.”—LIINI, CHAYINA.
“Umiꞌyati Hindete ammaꞌno maxaaffa yitannore nafa huwata dandoommokkihu Qullaawu Maxaafi yaannore hiitto ikke huwateemmo?”—AMITI, HINDE.
“Qullaawu Maxaafi biꞌree wari maxaafa ikkino daafira konne maxaafa ayirriseemma; qoleno isi geeshsha hiramannohu wolu maxaafi nookkita macciishshoomma. Ikkirono Qullaawu Maxaafi hiittoohoro afe diegennoomma.”—YUMIKO, JAAPPAANE.
Alamete aana noohu batinyu manni Qullaawa Maxaafa kaffi asse laꞌꞌanno. Ikkollana kuni manni Qullaawu Maxaafi mayi daafira kulannoro hakkeeshshi geeshsha afinori nookkiha ikkara dandaanno. Hakko iso Iisiyaho heeꞌrannohu lowo miliyoone ikkanno manni Qullaawu Maxaafi yaannore diafino; wole agurina Qullaawu Maxaafi halaꞌle noo gobbuwara heeꞌrannohu batinyu mannino tenne diafino.
Ati kayinni, ‘Qullaawu Maxaafi yaannore afummorono afano hoogummoro ma kaaꞌlannoe?’ yite hedattoha ikkara dandaanno. Qullaawu Maxaafi yaannore huwatakki aante noo kaaꞌlo uyitannohe:
-
Harshammonna hagiirre afiꞌrate
-
Maatete giddo kalaqamanno qarra tirate
-
Yaaddo dandee heeꞌrate
-
Mannu ledo noohe aante seekkiꞌrate
-
Woxe garunni horoonsiꞌrate
Hanni Jaappaanete heedhannote Yoshiko lawishsha laꞌno. Qullaawu Maxaafi mayi daafira kulannoro afa hasidhino daafira ise umisenni nabbawate kaꞌu. Tini maaho kaaꞌlituseyya? Ise togo yitino: “Qullaawu Maxaafi alaamu noo heeshsho heeꞌreemma gedenna konni kaꞌira hexxo heedhannoe gede kaaꞌlinoe.” Ledde togo yitino: “Xa bashsho gede waagu nooekkihu gede ikke dimacciishshamannoe.” Aleenni kullihu Amiti umisinni Qullaawu Maxaafi yaannore xiinxallino. Isi togo yiino: “Lowo geeshsha dhagge assiꞌrummo. Qullaawu Maxaafi manna baalaho kaaꞌlitanno amaale amadino.”
Qullaawu Maxaafi lowo miliyoone ikkanno manni heeshsho soorre biddi assino. Ikkina, atino Qullaawu Maxaafi yaannore xiinxallite kaaꞌlannohe gara mayira dilaꞌꞌatto?
