Ilamoommahu Ingilizete gobbara Lendenete katamira lowo manni heeꞌrannohu Padingiteni yinanni qooxeessiraati. Heeꞌreemmahu amaꞌyanna sase bayiruuddu roduuwiꞌya ledooti. Anniꞌya agu araado nooha ikkino daafira duucha wote ninke ledo diheeꞌranno.

Anje heeꞌreenna amaꞌya hashshu kiiro huuccatto assiꞌreemma gede rosiissinoe. Faarsote maxaafa calla amadinohu Qullaawu Maxaafi nooe; konnira umiꞌyanni zeema fushshiꞌre faarseemma. Mitte hige wole maxaafa nabbawanni heeꞌre, “Gaꞌa yinanniri heeꞌrannokki yanna dagganno” yitanno hedo nabbawumma; hatti hedo surreꞌyara qaꞌmite gattino. Tini yaatto albillittete yanna daafira hedanni goxummakki galeemma gede assitinoe. ‘Heeshshote yaa tenne calla dilabbannoe. Kalaqamoommahu isi mayiraati?’ yee hedumma. Reya horo dihasiꞌroomma!

Hakkiinni digintete coyi daafira afa lowo geeshsha hasiꞌrumma. Reyitinore hasaawisate woꞌnaaleemma, rosu mini jaallaꞌya ledo waamma noowa haꞌreemma, hattono insa ledo bararraaqissanno filme laeemma. Tini hagiirsiissannoteno waajjishshannoteno.

Gari-baincho heeshsho heeꞌra hanafoommahu tonnu diriti heeꞌreeti. Sijaara aga hanafumma; hakkiinni mulenni araado amaddue. Yannate gedensaanni maariwaana aga hanafumma. Hakkiinni 11 diro ikkieta ago aga hanafumma. Ageemmari baxisannoekkiha ikkirono, dimbiniro ikkinannita kayinni baxissannohe. Muuziiqanna sirbano baxeemma. Dandaamie deerrinni wallo noowanna sirbinanni gallanni minira (hashshi kilawe) haꞌreemma. Hashsha mininni maaxame fule, soodikkinni maaxame higeemma. Layinki barra daafursannoe daafira duucha wote rosu minira dihaꞌreemma. Haꞌrummaro nafa, duucha wote rosu mereero ago ageemma.

Roso gudumma yannara, fonqoloho dancha guma diafiꞌroomma. Amaꞌya maaeela heeshsho heeꞌranni keeshshoommata affinokki daafira, tenne affuti lowo geeshsha hanqitu. Ise ledo giwammeenna mininni fule haꞌrumma. Hakkiinni mite yanna geeshsha Tooni yinanni jaaliꞌya ledo heeꞌrumma. Isi manni woxe mulqiꞌrannoho, jingilli assitanno dhagga hirannoho hattono finqilletenni lowo geeshsha egennaminoho. Mulenni godowe tonaa lewu diriti heeꞌre labbaa qaaqqo ilumma.

Umo Yihowa Farciꞌraasine ledo xaadoommahu, mine assiꞌrikkinni ooso ilino meentiranna qaaqquullinsara qixxeessinoonni mine heeꞌreeti. Qooxeessu gashshaano hakkiicho anerano galeemma mine uyitinoe. Lame Yihowa Farciꞌraasine duucha wote hakkiicho mito amuuwa daye hasaawisanno. Mitto barra anino insa ledo hasaawa hanafumma. Hakkawote Yihowa Farciꞌraasine kaphaanote yee ammansiisate hedoomma. Insa kayinni Qullaawa Maxaafa horoonsiꞌre xaꞌmeemma xaꞌmo baalate shaqqillunni xawise dawarinoe. Insa shaqqaddanna jooguulle ikkansa lowo geeshsha baxissinoe. Konnira insa ledo Qullaawa Maxaafa xiinxallate maahoyye yuumma.

Shiima yanna gedensaanni, Qullaawu Maxaafinni heeshshoꞌya soorrannore rosumma. Anjeꞌyanni hanafe reyo baasa waajjeemma. Xa kayinni Yesuusi kaote daafira rosiisinore afumma! (Yohaannisi 5:28, 29) Qoleno Maganu ane daafira hedannota rosumma. (1 Pheexiroosi 5:7) Roorenkanni Ermiyaasi 29:11 aana noo hedo lowo geeshsha hagiirsiissinoe; qummeeshshu togo yaanno: “‘Kiꞌnera hedeemmore ani egennoommo; hedoꞌyano . . . keerunnite ikkinnina bunshennita diꞌꞌikkitino.’” Albillitte gannate ikkitino uullara hegerera heeꞌra dandeemmata afumma.—Faarso 37:29.

Yihowa Farciꞌraasine addinta baxxannoeta leellishshino. Umo gambooshshensa haꞌrumma yannara hakko noo manni faasiiqaho; hattono jaallate gedeeti! (Yohaannisi 13:34, 35) Insa alba beetekiristaanete xaadeemma manniwiinni lowo geeshsha baxxitinoreeti. Heeshshoꞌya gari dancha ikka hoogirono Yihowa Farciꞌraasine anga fante haadhinoe. Insa shiqqe hasaawissannoe, ille worte towaattannoe, hattono mitore assite kaaꞌlitannoe. Hatte yannara baxillaanchonna halaꞌlado maate miila ikkoommahu gede asse hedoomma.

Qullaawa Maxaafa xiinxallummati, Maganunniha amanyootu seera harunsate heeshshoꞌya biddi assiꞌra hasiissannoeta huwatumma. Sijaara aga agura shota diꞌꞌikkitinoe. Qoleno mitu muuziiqi maariwaana aga roore hasiꞌreemma gede assannoeta huwatoomma daafira, hattoo muuziiqa macciishsha agurumma. Dimba agura hasiꞌroommahura, dimbeemma gede assannoe bayicho lawishshaho hashshi kilawe haꞌra agurumma. Hattono xa heeꞌranni noomma heeshshora kaaꞌlitannoe jaalla hasiꞌra hanafumma.—Lawishsha 13:20.

Hatte yannara, Toonino Yihowa Farciꞌraasine ledo Qullaawa Maxaafa xiinxallanni no. Yihowa Farciꞌraasine xaꞌmanno xaꞌmora Qullaawu Maxaafinni dawaro qoltusita isino rosanni noohu halaale ikkinota ammani. Tooni heeshshosi biddi assiꞌrate lowore assino: finqillenna jaddo loosanno gede xixxiibbannosi jaalla, manni woxe mulqiꞌranna maariwaana aga facci asse agurino. Qoleno Yihowa woꞌmunni woꞌma hagiirsiisate, amanyoote baꞌino heeshshonke agurre qaaqqinke teese heeꞌranno qae kalaqiꞌra hasiissannonketa huwantummo. Konnira Tooni ledo 1982nni adhammummo.

Agarooshshu Shaenna Baqqi Yiiyye! a yinanni metseetera ani biddi assiꞌra hasiꞌreemma coye biddi assiꞌrino manni xagge amaddino birxichuwa hasiꞌre nabbawoomma yanna qulli yitannoe. Insa lawishshi baasa jawaachishinoe! Hexxo mudhummakkinni sharrameemma gede jawaante ikkinoe. Yihowa hexxo mure tuge agurannoekki gede ganye huucciꞌreemma. Tooninna ani Maaja 1982nni cuuamme Yihowa Farciꞌraasine ikkinummo.

Maganu Yihowa ledo jaalooma kalaqiꞌraꞌya heeshshoꞌya gatissinoe. Yihowa anenna Tooni qarru yanna baalantera irkisinonke. Hattoo yannara Yihowa addaxxa ronsoommo; qoleno isi duuchante yannara kaaꞌlinonke, hattono maatenkera hasiisannore wonshinonke.—Faarso 55:22.

Labbaa qaaqqinkenna meya qaaqqonke Yihowa afanno gede kaaꞌlaꞌya lowo geeshsha hagiirsiissannoe. Xa insa qaaqquullino Maganu daafira rosanni lophanni noota laꞌꞌaꞌyano hagiirsiissannoe.

Xaate albillittete yanna daafira woy reyote daafira yaadanni goxummakki digaleemma. Xa Tooninna ani lamalate kiiro babbaxxitinota Yihowa Farciꞌraasine songo haꞌne towaanteemmo. Roduuwinke ledo mannaho, Yesuusa ammanannota loosunni leellishannoha ikkiro hegere heeshsho afiꞌra dandaannota rosiinseemmo.