Lophoommohu Kosta Rikaho soojjaatoonni Puwerto Limoni yinannihu malkate katamiraati. Anniꞌyanna amaꞌya sette ooso ilino; ani lamalkiho. Anninke reyinohu ani settu dirihu heeꞌreennaati. Hakkuyi gedensaanni amanke callase lossitinonke.

Anjenni kayise ispoorte a lowo geeshsha baxeemmo. Wedellichu heeꞌre, amaatere liige (boohaarate geeshshira calla godoꞌlitanno gaamo) giddo eꞌꞌe godoꞌla hanafummo. Mitu 20 dirihu heeꞌre amaatere liige giddo godoꞌlanni heeꞌreenna, Nikaraguwa gobbara pirofeeshinaale gaamo ledo godoꞌleemmo gede doorrie. Ikkollana, amaꞌya dhiwanni waadannose daafiranna ise towaateemmohu ane ikkoommo daafira, Nikaraguwa haꞌra dihasiꞌroommo. Hakko daafira hakkoye koyishsha giwummo. Gedensoonni Kosta Rikaho gobboomu gaamo ledo godoꞌlammora koyinsie; tini gaamo amaatere liige giddo godoꞌlitannore fille kalanqoonnite. Konne koyishsha maahoyye yee adhummo. Hakkiinni 1949nni 1952 geeshsha tenne gaamo giddo godoꞌloommo; hatte yannara Kubaho, Mekiskotenna Nikaraguwa gobbara godoꞌloommo. Hattee gaamo giddo dancha gede godoꞌleemmo; mitte hige isinni aante aantete 17 godoꞌle giddo mitte higeno soꞌrummokki godoꞌla dandoommo. Godoꞌle laꞌꞌara gamba yiino manni suꞌmaꞌya woshshanni koocanno woyite tashshi yaannoe!

Qoleno hakkawaro amanyoote baꞌino heeshsho heeꞌroommo; hatti xa gaabbissannoe. Baxeemmo jaalaꞌya mitte ikkiturono, duucha woyite wolu meenti ledono fooreemmo. Agono quwa sayise ageemmo. Mitto barra lowo geeshsha dimboommo daafira, soodo goxoommowiinni baqqi yeemmo woyite minira hiitto ikke dayoommoro nafa qaaga didandoommo! Qoleno kasaara (qumaare) gaꞌneemmo.

Hakko garinni heeꞌreenna, amaꞌya Yihowa Farciꞌraasincho ikkitu. Ise Qullaawu Maxaafire kultaera woꞌnaaltinoha ikkirono, ani ispoorte calla illachisheemmo daafira umi qara dimacciishshoommo. Barra sagalete saatera xawoho qajeelanni noommoha ikkiro, sagale nafa dileeltannoe! Godoꞌle calla hedeemmo. Ispoortete geeshsha baxeemmori woluri dino!

Ikkollana, 29 dirihu heeꞌre, godoꞌlete yannara kaase amadeemmo yaanni baasa gawajjamoommo. Hurummohu gedensaanni, pirofeeshinaale gaamo giddo godoꞌla aguroommo. Ikkirono, qooxeessinkera noote amaatere liige giddo godoꞌlitannore qajeelsate higoommo daafira ispoortete giddonni difuloommo.

Hakkiinni 1957nni, Yihowa Farciꞌraasineha mitto jawa gambooshshe haꞌreemmo gede koyinsie; hakkonne gambooshshe assinoonnihu alba ispoorte godoꞌleemmo istaadiyemeraati. Mare ofollanni heeꞌrenni, Yihowa Farciꞌraasine manna ayirrissannorenna godoꞌle laꞌꞌara gamba yaanno manniwiinni baxxitinore ikkitinota wodanchummo. Hakko gambooshshiwa laoommori Yihowa Farciꞌraasine ledo Qullaawa Maxaafa xiinxalleemmo gedenna gambooshshensa haꞌreemmo gede kakkayisinoe.

Rosoommoha batinye Qullaawu Maxaafi roso lowo geeshsha baxoommo. Lawishshaho, Yesuusi rosaanosi goofimarchu barra Maganu Mangisteha dancha duduwo alame woꞌmate dudubbannota masaalino. (Maatewoosi 24:14) Qoleno addu Kiristaani sabbakannohu woxeho yee ikkinokkita rosoommo. Yesuusi “Calla adhitinoonnire calla uuyye” yiino.—Maatewoosi 10:8.

Qullaawa Maxaafa xiinxalleemmo yannara, Qullaawu Maxaafi yaannorenna Yihowa Farciꞌraasine assitannore heewisiiseemmo. Insa Maganu Mangisteha dancha duduwo alame woꞌmate iillishate sharrantanno gari dhagge ikkinoe. Qoleno Yesuusi hajajinonte gede insa shaqqadda ikkitinota wodanchoommo. Konni daafira Yesuusi Maarqoosi 10:21 aana “Hoodeꞌya amo!” yee coyiꞌrino qaale nabbawummoti, Yihowa Farciꞌraasincho ikka hasiꞌrummo.

Ikkollana, rosoommore bayichonko loosu aana hosiisa didandoommo. Lawishshaho, lowo diro “kaayyo afidhino” kiiroꞌyanni lamalate kiiro lotore mudhanni keeshshoommo. Ikkollana, Qullaawa Maxaafa xiinxallanni Maganu ‘“Dancha Kaayyooti” yinanni magano’ magansidhannore hanqinotanna hafuuraamma giwannota huwatummo. (Isayaasi 65:11; Qolasiyaasi Sokka 3:5) Hakko daafira, kasaara gaꞌna agurate murciꞌrummo. Lotore mudha agurummohu gedensaanni umi Sambatira “kaayyo afidhino” kiiroꞌya qeeltu! Hatte lamalara godoꞌla hoogoommo daafira mannu qacifatinoe; qoleno wirro godoꞌla hanafeemmo gede xixxiiwinoe; ani kayinni giwoommo. Hakkuyi kawa layinkita kasaara gaꞌne diegennoommo.

Yihowa Farciꞌraasinehu mittu jawu gambooshshiwa cuuamummo barranni wolu fonqoli tuncu yiie. (Efesooni Sokka 4:24) Hakko hashsha galeemmo hoteele higeemmo woyite, albi jaalaꞌya xullote uurrite agarte nooe. Ise “Saami, amo mitteenni boohaarrona” yitue. Ani kayinni bayichonko “Deeꞌni!” yuummo. Ani xaate Qullaawu Maxaafi seeri garinni heeꞌreemmota kulummose. (1 Qorontoosi 6:18) Hakkiinni ise masse, “Mayyiitto?” yitue. Ise Qullaawu Maxaafi foorrete daafira coyiꞌrannore mishshe coyidhuhu gedensaanni, jaaloomanke agurroonke yite wotto wortue. Ani kayinni minira eꞌꞌe saanqa cufiꞌrummo. Hakkawaro 1958nni Yihowa Farciꞌraasincho ikkummo barrinni kayise Yihowara ammaname heeꞌroommota hedeemmo woyite tashshi yaannoe.

Qullaawu Maxaafi seeri garinni heeꞌraꞌyanni afiꞌroommo atoote borreessoommoro mitto maxaafa ikkannoha lawannoe! Batinye addu jaalla nooe; qoleno harshammonna addu hagiirre afiꞌroommo; afiꞌroommo atooti giddo kuri gamaholla.

Xaano hige ispoorte baxeemmo; ikkirono xa heeshshoꞌya giddo balaxisiiseemmori wolereeti. Ispoorte maccaha ikkeemmo gedenna jiro afiꞌreemmo gede assitinoe; kayinni kuni coyi digeedino. Ikkollana, Maganu ledo nooe jaaloominna roduuwiꞌya ledo nooe baxilli hegerera heeꞌrannoho. Qullaawu Maxaafi togo yaanno: “Alamenna alamete halcho saꞌanno; Maganu hedinore assannohu kayinni hegere geeshsha heeꞌranno.” (1 Yohaannisi 2:17) Xa Maganu Yihowanna mannisi geeshsha baxeemmori woluri dino!