Umi Qorontoosi 10:1-33
10 Roduuwa, annuwanke baala gomichu woroonni hadhinotanna baalunku baaru giddoonni saꞌinota qaagginara hasiꞌreemmo;
2 insa baalunku Muse harunsite gomichunninna baarunni cuuantino;
3 qoleno baalunku mittu garita ayyaanaamittete sagale ittino;
4 hattono baalunku mittu gariha ayyaanaamo waa aggino. Agginohuno ledonsa haꞌranni noohu ayyaanaamu kinchinniiti; hakku kinchino Kiristoosira lawishshaho.*
5 Ikkollana Maganu insa giddonni lowo manninni hagiidhinokki daafira halalla waxaaxxino.
6 Insa gawajjanno coye halchituhu gede, ninkeno hattoore halchineemmokki gede kuni coyi ninkera qorowishsha ikkinonke.
7 “Mannu itaranna agara ofolli. Hakkiinni sirbara kai” yine borreessinoonni garinni insa giddonni mitu assitunte gede, kiꞌneno kaphu maganna magansidhinannire ikkitinoonte.
8 Insa giddo mitu mitu foorteenna* mereerinsanni 23,000 manni mittu barrinni waxaaxi gede, ninkeno foorroonke.*
9 Insa giddonni mitu mitu Yihowa jiffeenna hamasu idde gudino; ninkeno iso jinfoonke.
10 Insa giddonni mitu gungunteenna Maganu sokkaasinchi* huninonsa; kiꞌneno gunguntinannire ikkitinoonte.
11 Kuni coyi insara iillinohu ninkera lawishsha ikkaraati; borreessinoonnihuno konni diri goofimarchira heeꞌnoommorira ninkera qorowishsha ikkankeraati.
12 Konnira, uurre nooha lawannosihu uwannokki gede qoropho.
13 Manna baalaho iillanno fonqolo agurranna baxxino fonqoli diꞌꞌillinoꞌne. Ikkollana Maganu ammanaminoho; isi duqqa dandiitinannikki fonqoli iillaꞌnera wore dilaꞌꞌanno; hatteentenni fonqolu iillannoꞌne woyite kaajjitine saꞌꞌa dandiitinanni gede fultinanni furcho qixxeessannoꞌne.
14 Konnira roduuwaꞌya, kaphu maganna magansiꞌratewiinni xooqqe.
15 Konne coye coyiꞌranni noommohu wodanchanno manniraati; coyiꞌranni noommori halaalehoronna teꞌee kiꞌnenni yiiyye.
16 Magano galante galatu finiinchinni angeemmo woyite Kiristoosi mundee gutammanni heeꞌnoommoha diꞌꞌikkino? Qoleno tima hiiqqine inteemmo woyite Kiristoosi maala gutammanni diheeꞌnoommo?
17 Timu mitto ikkino daafira, ninke batinye ikkinummorono mitto bisooti; korkaatuno baalunku qamanseemmohu konne mitto timaati.
18 Hanni Israeelete manna* hedde: Kakkalloonnire ittannori kakkalote darginni beeqqitannore diꞌꞌikkitino?
19 Hatto yaaꞌya mayyaate? Kaphu magannara kakkalloonniri woy kaphu maganna umise kaaꞌlitannori no yaateni?
20 Deeꞌni; daga kakkaltannohu agaaninteteeti ikkinnina Maganoho diꞌꞌikkino yaanni noommo; agaanintete ledo gutantinarano dihasiꞌreemmo.
21 Yihowa finiinchinninna agaanintete finiinchinni aga didandiitinanni; qoleno, “Yihowa sagalenna” agaanintete sagale ita didandiitinanni.
22 Hatto assineemmohu ‘Yihowa hinaasiisateetini?’ Ninke isinni roore jawaatoota ikkinoommoni?
23 Baalanka coye fajjinoonni; baalunku coyi kayinni kaaꞌlanno yaa diꞌꞌikkino. Baalanka coye fajjinoonni; baalunku coyi kayinni dhaawanno yaa diꞌꞌikkino.
24 Mittu mittunku manchi woꞌmanka woyite wolu injo ikkinnina umisi injo hasiꞌroonke.
25 Tiiꞌꞌiꞌnenni kainohunni huluullantine hiikkiinni dayinoho yitine xaꞌmitinikki maalu dikkonni hirroonnire baala itte;
26 korkaatuno “baattonna giddose noori baalu Yihowaho.”
27 Ammaninokki manchi koyiseennaꞌne maahoyye yitine hadhiniro, tiiꞌꞌiꞌnenni kainohunni huluullantine hiikkiinni dayinoho yitine xaꞌmitinikki albaꞌneenni shiqinore baala itte.
28 Ikkollana mittu manchi, “Kuni kakkalote gorrinoonni maalaati” yiiꞌnero, hakkuyi manchiranna tiiaho yitine ittinoonte.
29 Hatto yoommohu kiꞌne tiiꞌꞌi daafira ikkikkinni wolu manchi tiiꞌꞌi daafiraati. Baxummore assate qoosso nooeha ikkirono, konninni kainohunni wolu manchi tiiꞌꞌi busha assaera dihasiꞌreemmo.
30 Magano galaxxe iteemmoha ikkiro, iso galaxxoommo coyira mayira arrassameemmo?
31 Hakko daafira, ittinanninna agginanni woyite woy wole aye coye assitinanni woyite baalankare Maganu ayirrinyira asse.
32 Ayihudootahono, Giriikootahono, Maganu songorano guficho ikkitinannikki gede qorophe;
33 ani lowo manni gatara hasiꞌreemmo daafira umiꞌya injo agure insa injo hasiꞌre, asseemmo coyi baalunkunni manna baala hagiirsiisate woꞌnaaleemmo; kiꞌneno hatto asse.
Lekkaalliidi Qaagiishshuwa
^ Woy “hakku kinchi Kiristoosiiti.”
^ Kuni qaali, seerimale ikkinoha siimu xaadooshshe baalanka xawisannoho.
^ Kuni qaali, seerimale ikkinoha siimu xaadooshshe baalanka xawisannoho.
^ Noo gedeenni tirriro, “hunannohu.”
^ Noo gedeenni tirriro, “maalu Israeele.”
