Umi Qorontoosi 6:1-20
6 Kiꞌne giddo wolu ledo giwaminohu, coyesi qullaawootunniwa massiꞌra agure yoote albira shiqe Magano ammaninokki manni albaanni hiitto kassasanno?
2 Qullaawootu alamete yoo yitannota diaffinoonni? Alamete yoo yitinanniha ikkina, shiimmaadda coye hiito tira hoogginanni?
3 Sokkaasinete nafa yoo yineemmota diaffinoonni? Ikkina xaa yannara kalaqamanno coyira yoo mayira diyitinanni?
4 Xaa yannara yoo yaa hasiissanno coyi kalaqamanno woyite songo mishshanno manna yoo yaara wortinanni?
5 Konne coye coyiꞌranni noommohu saaltinara yeeti. Halaalinta kiꞌne giddo roduuwasi araarsa dandaannohu mittu hayyichi nafa dino?
6 Mittu rodii wole rodoo kassase yoote minira massanno; hakko iso ammaninokki manni albira!
7 Mimmitiꞌne ledo kassasantine yoote minira haꞌraꞌne umise kiꞌnera saalaho. Hatteentenni kiꞌne miicantiniro diwoyyanno? Kiꞌne xagarriro diwoyyanno?
8 Kiꞌne kayinni hakko iso roduuwaꞌne miiccinanni, xagartinanni!
9 Bushuullu* Maganu Gashshoote ragidhannokkita diaffinoonni? Sodhinoonte.* Foortannori, kaphu maganna magansidhannori, soorritannori, labbaahu ledo foorate insaneeto sayisse uyitino labballi,* labbaahu ledo siimu xaadooshshe assitanno labballi,*
10 mooraano, hafuuraammu, dimbaano, xonantannorinna mulqidhannori Maganu Gashshoote diragidhanno.
11 Kiꞌne giddo mitu bashsho hattooreeti. Ikkollana Mootichu Yesuusi Kiristoosi suꞌminninna Maganinke ayyaaninni hayishshantine keeraaꞌmitinoonni, qullaawoota ikkitinoonni hattono keeraanote yaamantinoonni.
12 Baalankare fajjinoonnie; baalunkuri kayinni kaaꞌlannoha diꞌꞌikkino. Baalankare fajjinoonnie; ikkollana mittu coyino borojjicho assiꞌraera diwodheemmo.
13 Sagale godowunnite; godowuno sagalenniho; Maganu kayinni lamenka hunanno. Mannimma Mootichunnite ikkinnina foorrennita* diꞌꞌikkitino; Mootichu qole mannimmanniho.
14 Ikkollana Maganu wolqasinni Mooticha kayisinte gede ninkeno reyotenni kayisannonke.
15 Mannimmaꞌne Kiristoosi biso ikkitinota diaffinoonni? Kiristoosi biso haaꞌre foora mancho ledo mittoonsa hasiissannoeyyani? Horonta hatto assa dihasiissannoe!
16 Foora mancho ledo mittooꞌmannohu baalu ise ledo mitto biso ikkannota diaffinoonni? Korkaatuno Maganu, “Lamunku mitto maala ikkitanno” yiino.
17 Mootichu ledo mittimma afiꞌrinohu baalu kayinni isi ledo ayyaanunni mitto ikkanno.
18 Foorretewiinni xooqqe! Mittu manchi loosannohu wolu cubbi baalu mannimmasi gobbaanniiti; fooranno* manchi baalu kayinni umisi mannimma aana cubbo loosanni no.
19 Mannimmaꞌne, giddoꞌne noohu Maganuwiinni adhitinoonnihu qullaawu ayyaani galannoha qullaawa mine ikkitinota diaffinoonni? Qoleno kiꞌne umiꞌnere diꞌꞌikkitinoonni;
20 Maganu lowo waaginni woxxinoꞌnereeti. Hakko daafira, mannimmaꞌnenni Magano ayirrisse.
Lekkaalliidi Qaagiishshuwa
^ Woy “finqiltannori.”
^ Woy “Dogantinoonte.”
^ Labbaahu ledo foortanno woyite meyate gede ikkite shiqqanno labballo ikkitukki digattino.
^ Noo gedeenni tirriro, “labbaahu ledo goxxanno labballi.”
^ Giriikete Afiinni, poorniya. Kuni qaali, seerimale ikkinoha siimu xaadooshshe baalanka xawisannoho.
^ Giriikete Afiinni, poorniya. Kuni qaali, seerimale ikkinoha siimu xaadooshshe baalanka xawisannoho.
