Umi Qorontoosi 7:1-40
7 Sokka borreessitine xaꞌmitinoonnie xaꞌmora dawaro qoleemmona, mittu manchi meyata kisa* hoogiro woyyate;
2 ikkollana foorre* batidhino daafira, mittu mittunku manchira umisi galte heedhosi; mitte mittente meyaterano umise minaanni heeꞌrose.
3 Minaanni minaamasira hasiisannosere asso; minaamano hattonni minaannisera hasiisannosire assito.
4 Minaamara bisise aana silxaane dinose; silxaane noosihu minaannaseeti; hattonni, minaannira bisisi aana silxaane dinosi; silxaane nooseti minaamasiiti.
5 Huuccatto assiꞌrate hasaabbine wodhitinoonni yanna agurranna, wole woyite mimmitiꞌnera qakkinoonte; qoleno kiꞌneneeto qeeꞌla hooggineenna Sheexaanu jifannoꞌnekki gede galagaltine mitteenni heedhe.
6 Konne coye coyiꞌroommohu kayinni, assa dandiinannire ikkinota kulateeti ikkinnina hajajate diꞌꞌikkino.
7 Ikkollana mannu baalu ane gede ikke heeꞌroommero digiwoommo. Kayinni, mittu mittunkura Maganuwiinni afiꞌrinoti umisi elto noosi; mittoho mittu gariti, woleho kayi wolu gari elto noosi.
8 Adhantinokkirinna gunnootuno, ane gede ikkite heedhuro woyyannonsa yeemmo.
9 Insaneeto qeeꞌla hoogguro kayinni adhantona; yortotenni giiramantenni adhama woyyitanno.
10 Adhantinorira konne biddishsha eemmo; kayinni kuni biddishshi aneha ikkikki Mootichunniho; minaama minaannisewiinni baxxitoonke.
11 Baxxituro kayinni mine assidhukki heedho woy minaannise ledo araaranto; minaannino minaamasi agura dihasiissannosi.
12 Wolootaho qole togo yeemmo; hatto yeemmohu kayinni aneeti ikkinnina Mooticha diꞌꞌikkino: Mittu rodiira ammantinokki galte heedhusironna iseno ledosi heeꞌrate maahoyye yituro isi ise aguroonke;
13 qoleno mitte manchora ammaninokki minaanni heeꞌriseronna isi ledose heeꞌrate maahoyye yiiro ise iso agurtoonke.
14 Ammaninokki minaanni minaamasinni kainohunni keeraaꞌmino; ammantinokki minaamano ammanino minaannisenni kainohunni keeraaꞌmitino; hatto ikka hoogoommero oosoꞌne battaabbanno; xa kayinni insa qullaawootaho.
15 Ammaninokki minaanni woy minaama baxxa doodhiro baxxona; hatto ikkiro, ammanino rodii woy rodoo ammaninokkihu ledo heeꞌrate digadadamanno; korkaatuno Maganu woshshinoꞌnehu keerehooti.
16 Minaama, minaannakki gatisattaha ikkannona ma afootta? Minaanna, minaamakki gatisattoha ikkannona ma afootto?
17 Ikkihano ikkiro, mittu mittunku manchi Yihowa uyinosi qeechi garinninna Maganu woshshisi woyite noo garinni heeꞌrona. Songo baalateno konne biddishsha eemmo.
18 Barcime heeꞌre woshshaminohu no? Barciminokkihu gede ikkoonke. Barcimikki heeꞌre woshshaminohu no? Hatto ikkiro barcimoonke.
19 Barcima kaaꞌlitannori dino; barcima hoogano leddannori dino; qaru coyi Maganu hajajo wonshate.
20 Mittu mittunku manchi woshshami woyite noo gari ikkihano ikkiro, hakko garinni heeꞌrona.
21 Woshshamoottohu borojjichu heedheeti? Hatti yaachishshoonkehe; borojjimmatenni fula dandaatto faro noohero kayi, hatte faro horoonsiꞌri.
22 Borojjichu heeꞌre woshshaminohu Mootichu rosaanchi baalu, borojjimmatenni fulinoho Mootichu manchooti; woshshami woyite borojjicho ikkinokkihu baaluno Kiristoosi borojjichooti.
23 Kiꞌne lowo waaginni woxxinoonnireetina, mannu borojje ikka agurre.
24 Roduuwa, mittu mittunku manchi woshshami woyite noo gari ikkihano ikkiro, Maganu albaanni hakko garinni heeꞌrona.
25 Adhantinokkiri* daafira Mootichu hajajinoeri dino; ikkollana, Mootichu maaronni kainohunni ammanamino manchi gede ikke, ani umiꞌya hedo coyiꞌreemmo.
26 Hakko daafira xaa yannara noo qarra hendiro, mittu manchi noo garinni heeꞌriro woyya lawannoe.
27 Galte adhootto? Hatto ikkiro babbaxxe heeꞌrate heddooti. Galte dinooheho? Hatto ikkiro galte hasidhooti.
28 Ikkollana adhittorono cubbo diꞌꞌikkannohe. Seemono* mine assidhuro cubbo diꞌꞌikkannose. Ikkollana adhantannore lowo qarri amadannonsa.* Ane halcho kayinni konni qarrinni gattinanni gedeeti.
29 Qoleno roduuwa, gattino yanna harancho ikkitinota kuleemmoꞌne. Konnira xaate minaama noonsari noonsakkiri gede ikkito;
30 wiꞌlitannori wiꞌlitannokkiri gede, hagiidhitannori hagiidhitannokkiri gede, hidhitannori mitturino noonsakkiri gede,
31 hattono alame horoonsidhannori, ise gudisse horoonsidhannokkiri gede ikkito; korkaatuno tenne alame ikkito soorrantanni no.
32 Konnira yaaddo gattinara hasiꞌreemmo. Adhinokki manchi Mooticha hagiirsiisanno gara hedanni Mootichu coyi daafira yaadanno.
33 Adhino manchi kayinni minaamasi hagiirsiisanno gara hedanni alamete coyira yaadanno;
34 konnira wodanisi bebbeehamino. Qoleno mine assidhinokki manchono ikko seemo mannimmasennino ikko ayyaanisenni qullaawa ikkitanno gede Mootichu coyi daafira yaaddanno. Mine assidhino mancho kayinni, minaannase hagiirsiissanno gara heddanni alamete coyira yaaddanno.
35 Ikkollana hatto yoommohu kiꞌne kaaꞌlammora yeeti ikkinnina furro fuuqqo hoꞌlammoꞌnera diꞌꞌikkino; hatteentenni, gara ikkinore assitinanni gedenna hedoꞌne billaallitukki woꞌmanka woyite Mootichaho woꞌmu wodaninni soqqantinanni gede kakkayisammoꞌnera yeeti.
36 Ikkollana mittu manchi seenne adhikki* amanyootunni heeꞌra dandaannokkiha lawisiro, hattono anjicho egemminohanna* adha hasiꞌrannoha ikkiro hasiꞌrinore assona; tini cubbo diꞌꞌikkitannosi. Togoo manni adhona.
37 Ikkollana mittu manchi wodanisinni murciꞌrironna adha hasiissannosikkiha lawisiro, hattono isonooto qeeꞌla dandiironna seenne adhikki heeꞌrate* wodanisinni hediro dancha assanno.
38 Konnira adhannohu* baalu dancha assanno; adhannokkihu baalu qole roore dancha assanno.
39 Minaama minaannise lubbotenni noo geeshsha usurantinote. Minaannise reyiro* kayinni Mooticha ammaninohalla ikkiro baxxuhura assiꞌra dandiitanno.
40 Ane hedo gede ikkiro kayinni, noo gedeenni heedhuro roore hagiirraame ikkitanno; qoleno, anerano Maganu ayyaani nooeta seekke afoommo.
Lekkaalliidi Qaagiishshuwa
^ Bushare hende kisate.
^ Giriikete Afiinni, poorniya. Kuni qaali, seerimale ikkinoha siimu xaadooshshe baalanka xawisannoho.
^ Noo gedeenni tirriro, “Seemootu.”
^ Giriikete qaali, seenne adhinokki labbaahano mine assidhinokki meyatano xawisanno.
^ Noo gedeenni tirriro, “adhantannorira maalinsa aana lowo qarri iillanno.”
^ Noo gedeenni tirriro, “seeminatesi agadhe.”
^ Noo gedeenni tirriro, “wedellimmatenni hufe noo yanna sainohanna.”
^ Noo gedeenni tirriro, “seeminatesi agadhe heeꞌrate.”
^ Noo gedeenni tirriro, “seeminatesi galtesira aannohu.”
^ Noo gedeenni tirriro, “goxiro.”
