Layinki Qorontoosi 1:1-24
1 Maganu fajjonni Kiristoosi Yesuusi soqqamaasincho ikkoommohu ani Phaawuloosinna rodiinke Ximootewoosi, Qorontoosi katamira heedhannote Maganu songoranna Akaayya woꞌmaho heedhanno qullaawootira baalaho:
2 Maganu Anninkenna Mootichu Yesuusi Kiristoosi eltonna keeri kiꞌne ledo ikko.
3 Mararrotenna maarote Anni, shesho baalate Magani, Mootichinke Yesuusi Kiristoosi Maganinna Anni ayirro;
4 ninke Maganuwiinni afiꞌneemmo sheshonni,* duuchunku gari qarri* giddo noore sheshifachisha dandiineemmo gede, isi iillannonke qarri* baalunku giddo sheshifachishannonke.
5 Kiristoosira yine adhineemmo qarri batiꞌra ikkinonte gede, Kiristoosi widoonni afiꞌneemmo sheshono batiꞌrate.
6 Ninke qarrammeemmo woyite* kiꞌne sheshonna gato afidhinanni; ninke shesho afiꞌnummoro kayinni, ninkera iillino qarri iillannoꞌne woyite kaajjitinanni gede kaaꞌlitannoꞌne shesho afidhinanni.
7 Kiꞌne daafira noonke hexxo kaajjadote; korkaatuno, ninke ledo qarra gutantininte gede sheshono gutantinannita anfoommo.
8 Roduuwa, Iisiyu qoqqowira amadinonke qarra affinara hasiꞌneemmo. Wolqankera aleenni ikkino qarri amadinonke daafira, ganteemmo yine nafa dihendoommo.
9 Isinni, reyote yoo yinoonninkeha lawinonke. Kuni ikkinohu, umonke ikkikkinni reyitinore kayisanno Magano addaxxineemmo gedeeti.
10 Isi togoohu buutote qarrinni kainohunni reyine hoongoommore gatisinonke; qoleno gatisannonke; konni kaꞌano isi gatisannonketa hexxineemmo.
11 Kiꞌneno ninke daafira Magano eeggifattine huuccitine kaaꞌlitinankera dandiitinanni; hatto assaꞌne, ninke lowo manni huuccinonke huuccattonni Maganu elto afiꞌneenna lowo manni iso galatanno gede assitanno.
12 Ninke naaxxineemmohu konni coyinniiti: Alamete aana hakko iso kiꞌne mereero qullaambetenninna Maganuwiinni afiꞌnoommo sumbenni heeꞌnoommota tiiꞌꞌinke farciꞌranno; kuni ikkinohu kayinni Maganu eltonniiti ikkinnina alamete hayyonni diꞌꞌikkino.
13 Nabbawanna* huwata dandiitinannire ikkinnina wolere diborreessineemmoꞌne; albillitteno konne coye woꞌmunni woꞌma* huwattinanni yee hexxeemmo;
14 kiꞌne giddo mitu ninke kuꞌlitine naaxxa dandiitinannita huwattinoonninte gede, ninkeno mootichinke Yesuusi barra kiꞌnenni naaxxineemmo.
15 Konne coye buuxoommo daafira, layinkimeeshsho hagiidhitinanni gede* umo kiꞌnewa daammora hedoommo;
16 Meqedooniya haꞌreemmo woyite hakkaa hige kiꞌne lae saꞌꞌammora hedoommo; qoleno Meqedooniyunni higanni Yihuda haꞌreemmo woyiteno kiꞌnewa dayeenna geegiissitinaera hedoommo.
17 Konne coye hedoommohu mulla haafa yee lawiꞌne? Woy mitto coye assate hedeemmo woyite aneneeti injo calla hedanni, “Ee, ee” yee hakkiinni “Deeꞌni, deeꞌni” yeemmoha lawiꞌne?
18 Maganu ammanaminoha ikkinonte gede, ninke kiꞌnera coyiꞌneemmorino halaaleho. “Ee” yine kaꞌne “Deeꞌni” diyineemmo.
19 Ninke yaano ani, Silwaanoosinna* Ximootewoosi sabbankummoꞌnehu Maganu Beetti Yesuusi “Ee” yee kae “Deeꞌni” yaannoha diꞌꞌikkino; hatteentenni isi “Ee” yiinori woꞌmanka woyite “Ee” ikkanno.
20 Maganu uyino hexxo aye geeshsha batinye ikkiturono, isi widoonni “ee” ikkitino. Hakko daafira, ninke Maganoho ayirrinye uyineemmo gede isi widoonni Maganoho “Hamiiꞌni” yineemmo.
21 Ikkollana ninkeno kiꞌneno Kiristoosire ikkinoommota buuxisinonkehunna buurinonkehu Maganoho.
22 Qoleno isi sumuda sumudinonke; daanno coyira taje ikkannore* uyinonke; hakkuno, wodaninkera nooho qullaawa ayyaanaati.
23 Xaa geeshsha Qorontoosi dayommokkihu kiꞌne roore dadillitinannita giweeti; tini halaale ikkitinota Maganu afino.
24 Kaajjitine uurritinoonnihu umiꞌne ammananni ikkino daafira, ninke kiꞌne hagiirrira yine ledoꞌne loonseemmoreeti ikkinnina ammanaꞌnera mootooꞌmineemmore diꞌꞌikkinoommo.
Lekkaalliidi Qaagiishshuwa
^ Woy “jawaantenni.”
^ Woy “fonqoli.”
^ Woy “fonqoli.”
^ Woy “fonqolammeemmo woyite.”
^ “Wonanni seekkitine affinoonnirenna” yaano ikkitara dandiitanno.
^ Noo gedeenni tirriro, “goofimarchu geeshsha.”
^ “Lame higgine horo afidhinanni gede” yaano ikkitara dandiitanno.
^ Silaasino yinanni.
^ Woy “qawude.”
