Efessooni Sokka 6:1-24
6 Ooso, Mootichu fajjo ledo sumuu yaanno garinni anniꞌneranna amaꞌnera hajajamme; korkaatuno tini Maganu albaanni keeraanchimmate.
2 “Annakkinna amakki ayirrisi” yitannoti umi hajajo togo yaannoha hexxote qaale amaddino:
3 “Kunino seyannohe* gedenna dirikki uullate aana seedanno gedeeti.”
4 Annuwa, oosoꞌne caacceessitinoonte; hatteentenni Yihowa seejjonna amaalenni* lossensa.
5 Borojje, Kiristoosira hajajantinanni garinni uullate aana noo mootoollaꞌnerano ayirrinyunninna waajjatenni hattono woꞌmu wodaninni hajajammensa;
6 manna hagiirsiisatenna mulla leellamate yitine ikkikkinni, Kiristoosi borojji gede Maganu fajjo woꞌma lubboꞌnenni wonshitine hajajammensa.
7 Mannaho ikkikkinni Yihowara soqqantinannihu gede dancha giddonni soqqamme;
8 borojjichuno borojjicho ikkinokki manchino, mittu mittunku assannohu danchu coyi baalaho Yihowawiinni baꞌraarsha adhannota affinoonni.
9 Kiꞌne mootoollano, borojjiꞌnera hatto assensa; insanna kiꞌne Mootichi iima gordoho nootanna mallaadannokkiha ikkinota affinoonni daafira waajjishiishshinoontensa.
10 Hakkiinni saꞌuta, Mootichunna jawa wolqasinni jawaante afiꞌra agurtinannikki gede qaagiisseemmoꞌne.
11 Daawuloosi xagarro* ittisa dandiitinanni gede, Maganunniha olu uduunne baala uddidhe;
12 sharrammeemmohu mundeetenna maalu ledo ikkikkinni, gashshootu ledo, silxaannate ledo, tenne tunsichu alame gashshaano ledonna iimiidi basera noori busha ayyaanna olanto ledooti.
13 Bushu barri daanno woyite, gargadha dandiitinanni gedenna baalankare wonshitinihu gedensaanni, kaajjitine uurra dandiitinanni gede Maganu aannoha olu uduunne baala uddidhe.
14 Konni daafira, halaalu qawatto halliꞌnera qodhitine, hattono keeraanchimmannita gagasu uddano uddidhine kaajjitine uurre;
15 qoleno keerunniha dancha duduwo caammu gede lekkaꞌnera wodhitine qixxaabbine uurre.
16 Kore baalankano agurranna, wala yaannoha bushu maxxicho baalanka xoyissate kaaꞌlitannoꞌneta jawa ammanate wonqo wonqidhe.
17 Qoleno gatonnita umu gullee* wodhe; hattono ayyaanu bise yaano Maganu qaale adhe;
18 baalunku gari huuccattonninna eeggifatanni woꞌmanka woyite ayyaanunni huucciꞌra agurtinoonte. Konni garinni baqqi yitine heedhe; hattono qullaawoota baalaho woꞌmanka woyite eeggifattine huucce.
19 Qoleno danchu duduwita qullaawa fojo waajjummokki wolootaho kula dandeemmo gede, afooꞌya faneemmo woyite coyiꞌreemmore uyinannie gede anerano huucceꞌꞌe;
20 dancha duduwo duduwammora soyinoehu Maganoho; sansalatetenni usurame noommohuno iseraati; danchu duduwi daafira coyiꞌra hasiissannoe garinni, waajjummokkinni coyiꞌreemmo gede huucceꞌꞌe.
21 Ane daafiranna assanni noommori daafira kiꞌneno affinanni gede, banxeemmo rodiinkenna Mootichaho ammanamino soqqamaanchi Tikiqoosi baalankare kulannoꞌne.
22 Ikkine heeꞌnoommota affinaranna sheshifachishaꞌnera yee iso kiꞌnewa soyeemmo.
23 Maganu Anninkenna Mootichu Yesuusi Kiristoosi keerinna baxilli ammanate ledo roduuwaho iillo.
24 Mootichanke Yesuusi Kiristoosi baꞌꞌannokki baxillinni baxxannori baalu ledo elto ikkito.
Lekkaalliidi Qaagiishshuwa
^ Woy “qinaannohe.”
^ Woy “rosinni; biddishshinni.” Noo gedeenni tirriro, “hedosi giddonsa worre.”
^ Woy “gananno gano.”
^ Woy “helmeete.”
