Filiphisiyusi Sokka 2:1-30
2 Konnira Kiristoosi ledo nooꞌne mittimmanni woloota jawaachisha, baxillunni sheshifachisha, ayyaanaamittete aante aana,* godowinta baxanna marara dandiitinanniha ikkiro,
2 guuta mittimmanna* mittu gari hedo nooꞌnere ikkitine hattono mitte hedonninna mittu gari baxillinni heedhine hagiirreꞌya woꞌma asseꞌꞌe.
3 Wolu manni kiꞌne roorannota joongillunni* hedde ikkinnina gibbotenni woy booꞌnatenni mitto coyeno assitinoonte;
4 mittu mittunku woleho woyyannore hedo ikkinnina, umisira woyyannore calla laoonke.
5 Kiristoosi Yesuusira nooti tini hedo kiꞌnerano heedhoꞌne;
6 isi Maganu daninni heeꞌrannoha ikkirono, Maganu ledo taalamate woꞌnaalara heda nafa dihedino.
7 Hatteentenni, isonooto mullicho asse borojjicho lawino; qoleno mancho ikkino.*
8 Hakkiinni saeno, mancho ikke dayi woyite* umosi heeshshi asse reyote geeshsha yaano qarru haqqi aana reyate geeshsha hajajamannoha ikkino.
9 Konninni kainohunni, Maganu roorino darga wore gotti gotti assinosi; suꞌma baala roorino suꞌmano shaqqillunni uyinosi;
10 hatto assinohu, iimanna uulla hattono baattote woroonni noori baalu Yesuusi suꞌminni guluphitanno gedeeti.
11 Qoleno, arrawu baalu Maganu Annu ayirrinyira Yesuusi Kiristoosi Mooticha ikkinota faajjete farciꞌranno gedeeti.
12 Konnira baxeemmo roduuwaꞌya, ani ledoꞌne noommo woyite calla ikkikkinni roorenka xa ledoꞌne noommokki woyiteno woꞌmante yannara hajajantinannire ikkitinoonninte gede waajjatenninna huxiꞌratenni gato afiꞌrate sharramme.
13 Korkaatuno, iso hagiirsiisanno coyira hasattonna wolqa oye loosoho kaꞌinanni gede jawaachishannoꞌnehu Maganoho.
14 Woꞌmanka woyite baalanka coye gunguntinikkinna heewisantinikki asse;
15 hatto ikkiro bushanna shokkashsho ilama mereero minshenna xuru nookkire fayyaaleeyye Maganu ooso ikkitinanni; tenne alamera xawaabba xawissannori gede waraꞌa yitine xabbinanni;
16 tenne assitinannihu heeshshote qaale seekkitine cuꞌmidhineeti. Hatto assitiniro, dodoommohunna daafure loosoommohu mulla beebba ikkinokkita huwateemmo daafira, Kiristoosi barra hagiidheemmo gede assannoere afiꞌreemmo.
17 Ammanaꞌne kakkayisseennaꞌne shiqishshinanni kakkalonna qullaawa soqqansho* aana agattote kakkalo gede ikke duꞌnamummoro nafa tashshi yaannoe; qoleno kiꞌne baalunku ledo hagiidheemmo.
18 Kiꞌnerano hakko garinni tashshi yooꞌne; ane ledono hagiidhe.
19 Kiꞌne duduwo macciishshe jawaateemmo gede, Mootichu Yesuusi fajjo ikkiro, mulenni Ximootewoosi kiꞌnewa soyate hedoommo.
20 Kiꞌne daafira addinta yaadannohu isi gedeehu dancha hedo noosihu wolu mittuno dinoe.
21 Wolootu baalu Yesuusi Kiristoosire ikkikkinni uminsa injo calla hasidhanno.
22 Isi kayinni annisi ledo loosanno beetti gede dancha duduwo halashshate looso ane ledo borojjichu gede ikke loose, ikkado ikkinota leellishino gara affinoonni.
23 Konnira, ani ikkeemmota afummohu gedensaanni iso rahe kiꞌnewa soyate hedoommo.
24 Isinni Mootichu fajjo ikkiro ani umiꞌya mulenni dayemmota dihuluullameemmo.
25 Xaara kayinni, hasiisannoere asse anera soqqamara sokkinoonnieha rodooꞌya, loosu miilaꞌyanna ledoꞌya olamannoha Afiroodiixu kiꞌnewa soya woyyitanno yee hedoommo;
26 isi kiꞌne baalanka qalli yiino; qoleno dhiwaminota macciishshitinoonnita afe lowo geeshsha yaadino.
27 Addinta isi dhiwame ree hooge gatino; ikkollana Maganu maarinosi; hige iso calla ikkikkinni dadillu aana dadillu lexxannoekki gede aneno maarinoe.
28 Konni daafira kiꞌne iso laꞌine wirro hagiidhitinanni gedenna ane yaaddono aaninni hawacci yitannoe gede ikkummota ikke iso rahe kiꞌnewa soyeemmo.
29 Bashsho Mootichu soqqamaano haadhinanni garinni isono lowo hagiirrinni haadhesi; qoleno woꞌmanka woyite isi gedee manna ayirrisse;
30 korkaatuno, isi kiꞌne muleꞌya heedhine kaaꞌla dandiitinoonniekki coye assaera yee, Kiristoosi loosi* daafira heeshshosi* sayise oye reyote geeshsha iille gatino.
Lekkaalliidi Qaagiishshuwa
^ Noo gedeenni tirriro, “ayyaana gutama.”
^ Woy “xaaddine mitte lubbo ikkitinenna.”
^ Woy “umoꞌne heeshshi assitine.”
^ Noo gedeenni tirriro, “mannu gedeeha ikke dayino.”
^ Noo gedeenni tirriro, “manchu daninni leelli woyite.”
^ Woy “mannaho soqqantinanni soqqansho.”
^ “Mootichu looso” yaano ikkitara dandiitanno.
^ Woy “lubbosi.”
