Luqaasi Wongeella 10:1-42
10 Hakkunni gedensaanni Mootichu wole 70 rosaano doore, isi haꞌrara hedino katammanna darga baala balaxxe hadhanno gede lame lame asse soyi.
2 Hakkiinni togo yiinsa: “Gidu lowoho; gide midanno manni kayinni shiimaho. Konnira loosu Anni middannore soyanno gede huuccidhe.
3 Kuneeti hiyyeeyyete mereero noo geꞌreewi gede asse soyeemmoꞌnena hadhe!
4 Hadhinanni woyite woxe woy ogoro woy caamma adhitinoonte; hattono doogote uurritine mitto manchono keere haadhinoonte.*
5 Eꞌinanni mine baala balaxxine, ‘Keeru konni minira ikko’ yiiyye.
6 Hakko mine keere baxannohu heeꞌriro, keeriꞌne isi ledo heeꞌranno. Keere baxannohu hoogiro kayinni keeriꞌne kiꞌnewa higanno.
7 Loosanno manchira daafurisi gumi hasiisannosina uyitinoꞌnere ittinanninna agginanni hakko mine keeshshe. Minunni mine tartinoonte.
8 “Qoleno martinanni katami baalunkura mannu haaꞌriꞌnero uyiniꞌnere itte;
9 hakko heeꞌrannoha dhiwamino manna hurse; hattono ‘Maganu Gashshooti kiꞌnewa gamba yiino’ yitine kulle.
10 Ikkollana martinanni katami baalaho mannu haaꞌra giwiꞌnero, doogga fultine togo yiiyye:
11 ‘Lekkankera noota katamiꞌne buko nafa gangaꞌnine haꞌneemmo. Ikkollana Maganu Gashshooti gambisinota affe.’
12 Kuleemmoꞌnena, Yoote Barra Soddoomunni roore hakko katamira kaajjado yoo yinanni.
13 “Koraaziini, atera aanneꞌe! Beetesaayida, atera aanneꞌe! Kiꞌnewa loonsoonni maalale Xiroosinna Sidooni katammara loonsoonniha ikkoommero, xiddu uddano uddidhenna buluuloho ofolte biꞌre biꞌre maaro eꞌe kaꞌino.
14 Hakko daafira, yoo yinanni woyite Xiroosinna Sidooni katammanni roore kiꞌnera kaajjado yoo yinanniꞌne.
15 Atino Qifirinaahoomi, gotti yite gordu geeshsha iillattaha lawihe? Deeꞌni waamma* dirratta!
16 “Kiꞌne yitinannire macciishshannohu baalu ani yeemmore macciishshanno. Kiꞌne giwannohu baalu aneno giwanno. Qoleno ane giwannohu baalu soyinoehano giwanno.”
17 Hakkiinni lamalawunku hagiidhitanni higge, “Mooticha, suꞌmikkinni agaaninte nafawe hajajantunke” yitu.
18 Hatte yannara isi togo yiinsa: “Sheexaanu banqote gede gordunni uwanna laoommo.
19 Kuneeti hamasonna idda kaddinanni gede hattono diinu wolqa baala qeeltinanni gede silxaane oommoꞌne; gawajjannoꞌneri mitturino diheeꞌranno.
20 Ikkollana, busha ayyaanna hajajantinoꞌne daafira hagiidhitinoonte; hatteentenni suꞌmaꞌne gordoho borreessinoonni daafira hagiidhe.”
21 Yesuusi hatte saatera qullaawu ayyaaninni lowo geeshsha hagiidhe togo yii: “Gordunna baattote Mooticha Annaꞌya, tenne coyibba hayyootahonna egennaammaho daheessite, qaaqquulleho xawisootto daafira mannu albaanni guwisiꞌreemmohe. Ee Anna, tini ate fajjooti.
22 Anniꞌya baalanka coye anera uyinoe; Anna agurranna Beettu ayetiro afinohu dino; Beetto agurranna Annu ayetirono afinohu dino; qoleno Beettu baxe Annu daafira rosiisinosiha agurranna Anna afa dandaannohu dino.”
23 Hakkiinni rosaanosi callootinsa heedheenna alba insawa hige togo yiinsa: “Kiꞌne laꞌinanni heedhinoonnire laꞌannori hagiirraammaho.
24 Halaale yeemmoꞌnena, batinye masaalaanonna mootoolla kiꞌne laꞌinanni heedhinoonnire laꞌꞌate halchitino; kayinni dilaꞌino; qoleno insa kiꞌne macciishshitinanni heedhinoonnire macciishshate halchitino; kayinni dimacciishshitino.”
25 Mittu Seeru egennaami jife laꞌꞌasira yee, kae togo yii: “Rosiisaancho, hegere heeshsho ragiꞌrate ma assa hasiissannoe?”
26 Yesuusino, “Seeru giddo mayinella borreessinoonni? Atino ma garinni huwatootto?” yiisi.
27 Manchuno togo yee qoli: “‘Maganokki Yihowa woꞌmu wodanikkinni, woꞌma lubbokkinni, woꞌma wolqakkinninna woꞌma hedokkinni baxi’; hattono ‘Olliichokki* umikki gede assite baxi.’”
28 Yesuusino togo yiisi: “Dawarokki garaho; woꞌmanka woyite hatto assi; heeshshono afiꞌrattona.”
29 Ikkollana manchu isonoo seekkiꞌranni Yesuusa, “Olliichiꞌya ayeti?” yee xaꞌmi.
30 Yesuusino togo yee qoli: “Mittu manchi Yerusaalametenni kae Iyyaarko haꞌranni heeꞌreenna, mulqiꞌraano amadde noosire baala mulqidhe, gante foolu callu nooha tugge hadhu.
31 Hedeweelcho mittu kakkalaanchi hatte doogo widoonni hige dirranni heeꞌre, hakko mancho lae shawwu yee sai.
32 Mittu Leewaawichino hakkira iilliti mancho lae shawwu yee sai.
33 Mittu Samaarichi kayinni hattee doogo widoonni haꞌranni, manchu noowa iilliti lae lowo geeshsha mararisi.
34 Hakko daafira, isi manchunniwa shiqqi yee madasira zayitenna woyine dune hoccunni usurisi. Hakkiinni harrichisira wore wosinu galanno minira masse towaatisi.
35 Layinki barra lame diinaare* fushshe wosinu galanno mini annira oye togo yii: ‘Konne mancho towaatisi; iso towaatate kawiinni saino woxe fushshittoro higeemmo woyite baateemmohena.’
36 Kuri sasunku giddo mulqiꞌraano gante tuggu manchira olliicho ikkinosihu hiikkonne lawannohe?”
37 Manchuno, “Marare* kaaꞌlisiho” yii. Yesuusino, “Atino hadhe hatto assi” yiisi.
38 Hadhanni heedheenna Yesuusi mitto qacha ei. Hakkiicho mitte Maarta yinanni mancho minese wosinsidhusi.
39 Isera Maariyaami yinanni rodoo noose; Maariyaami Mootichu lekka mule ofolte isi coyiꞌrannore* macciishshitanni no.
40 Maarta kayinni loosu batiꞌreennase kabbi facci yitanni no. Konnira ise Yesuusiwa shiqqi yite togo yitu: “Mooticha, rodooꞌya looso anera calla worte agurtanna sammi yite laꞌꞌatto? Dagge kaaꞌlitannoe gede kulissise.”
41 Mootichuno togo yee qolise: “Maarta, Maarta, ati lowo coyira yaaddanni qarrantanni nootta.
42 Hasiisannori shiimareetilla woy mittoreetilla. Maariyaami danchare* doodhitino; konne coye isewiinni haaꞌne dihoollanni.”
Lekkaalliidi Qaagiishshuwa
^ Woy “mitto manchono hanqaffine keere haadhinoonte.”
^ Woy “Heedisi.” Mannu ooso baalate waamma xawisanno.
^ “Olliicho” yine tirroonnihu Giriikete Afii qaali, qachu manna calla ikkikkinni manna baalano kulate horoonsiꞌnanniho.
^ Roomunnite birru saanteeti.
^ Woy “maare.”
^ Noo gedeenni tirriro, “qaalesi.”
^ Woy “baalanka coye roorinore.”
