Luqaasi Wongeella 16:1-31
16 Hakkiinni Yesuusi rosaanosira togo yiinsa: “Mittu dureessu manchira mittu soqqamaanchi noosi; kuni soqqamaanchi jajjasi afimalse hunanni noota kullisi.
2 Konnira isi soqqamaanchosi woshshe togo yiisi: ‘Kuni ate daafira coyiꞌnanna macciishsheemmori maati? Konni kaꞌa jajjaꞌya towaata didandaattona, woxeꞌya borreessite amadootto mazgawa uue.’
3 Hakkiinni soqqamaanchu wodanisinni togo yee hedi: ‘Mootichiꞌya jajjasi towaateemmota hoolaeraati; hanni ma asso? Baatto looseemmokki gede wolqa dinoe; huucciꞌrammorano saaloommo.
4 Agari asseemmota afoommona! Loosunni hoollannie woyite mannu mininsara haaꞌrannoe gede mitore asseemmo.’
5 Hakkunni gedensaanni mootichisi asali noonsare mitto mittonka isiwa woshshe umiha, ‘Mootichiꞌyawiinni mageeshshire liqiiꞌrootto?’ yee xaꞌmi.
6 Manchuno, ‘2,200 litire* ejersu zayite’ yii. Soqqamaanchuno, ‘Kune tajete woraqatakki adhite ofolte rakke 1,100 litire* yite borreessi’ yiisi.
7 Hakkiinni wole mancho, ‘Ati mageeshshire liqiiꞌrootto?’ yii. Manchuno, ‘Xibbenna lamalawo kuntaala* sinde’ yii. Soqqamaanchuno, ‘Kune tajete woraqatakki adhite 136 kuntaala* yite borreessi’ yiisi.
8 Mootichisi, soqqamaanchu finqila ikkirono hayyotenni assinorira naadinosi; korkaatuno tenne alame* ooso yannansara heeꞌranno manni ledo noonsa aantenni xawaabbu oosonni roore hayyootaho.
9 “Qoleno kuleemmoꞌnena: Bunshete jironni jaalla kalaqidhe; hatto assitiniro bunshete jiro gooffanno woyite, insa hegere minira haadhannoꞌne.
10 Shiimu coyira ammanamino manchi lowo coyirano ammanaminoho; shiimu coyira ammanaminokkihu lowo coyirano diammanaminoho.
11 Konnira, bunshete jironni ammanantinoonnire ikkitinoonnita leellisha hoogginiro, halaalaancho jiro ayi ammaꞌne eeggo aannoꞌne?
12 Wolu manni jajjira ammanama hoogginiro, kiꞌnera hendoonnire ayi aannoꞌneyya?
13 Lamu mootichira borojjicho ikka dandaanno soqqamaanchi dino; mitto giwe mitto baxanno, woy mitto ayirrise mitto mishanno. Kawaanni Maganoho kaꞌaanni Jirote borojjicho ikka didandiitinanni.”
14 Woxe baxxanno Farisooti, coyiꞌrinore baalare macciishshite arrassitusi.
15 Hakkiinni Yesuusi togo yiinsa: “Kiꞌne mannu albaanni keeraano lawate woꞌnaaltinanni; Maganu kayinni wodaniꞌneta afino. Korkaatuno mannu albaanni ayirrado lawannori Maganu albaanni sholladoho.
16 “Muse Seerinna Masaalaano coyidhinori, Yohaannisi yanna geeshsha kullanna keeshshino; hatte yannanni kayinse Maganu Gashshootiha dancha duduwo dudumbanni heeꞌnoonni; duuchunku gari manni hakkira eate gaaramanni no.
17 Halaale yeemmoꞌnena, Seeru giddonni mitte fidale bicamme nafa woꞌmitukki gattante, iiminna uulla sairo woyyanno.
18 “Minaamasi fushshe haꞌrise wole adhannohu baalu soorranno; minaannise fushshe haꞌrisinota adhannohu baaluno soorrinoho.
19 “Duume xiillittenna shalaalatenni gannoonni uddano uddiꞌrannohu mittu dureessu manchi no; isi barru baala hagiidhanni qawaaxxiꞌre heeꞌranno.
20 Ikkollana mannu konni manchi xullichira abbe worannohu biso madiꞌre goofinohu mittu Alazzaari yinanni huucciꞌraanchi no;
21 isi dureessu manchi itanna giggilannore ite duuwara halchanno. Qoleno woshshu daye madasi laaxanno.
22 Yannate gedensaanni kuni huucciꞌraanchi reyenna sokkaasine haadhe massite Abirihaami qote* wortusi.
“Dureessu manchino reyenna madaarri.
23 Isi waammate* giddo buuto qarrame heeꞌre ale hige laꞌꞌanno woyite, xeertote nooha Abirihaaminna qotesi* nooha Alazzaari afi.
24 Hakkiinni qoonqosi naggi asse, ‘Annaꞌya Abirihaami, eeggatena mararie; kowiicho giirate buwani giddo fooggalanni noommona qubbichisi birxenni waa kise arrawoꞌya qiissanno gede Alazzaari soyie’ yii.
25 Abirihaami kayinni togo yii: ‘Beettoꞌya, ati heeshshokki diro dancha coye baala afidhe heeꞌroottota qaagi; Alazzaari kayinni qarru giddo heeꞌrino. Xa kayinni isi kowiicho fooliishshiꞌranna ati qarramatto.
26 Tenne baalano agurranna, ninkewiinni kiꞌnewa daa hasidhannori saꞌꞌa dandiitannokki gede, kiꞌnewiinnino ninkewa mannu daa dandaannokki gede, ninkenna kiꞌne mereero lowo boono worroonni.’
27 Hakkiinni dureessu manchi togo yii: ‘Anna, hatto ikkiro Alazzaari anniꞌya minira soyattora huucciꞌreemmohe;
28 ontu roduuwi nooena, insano konni qarru dargira dagge eꞌannokki gede seekke farciꞌronsana.’
29 Abirihaami kayinni, ‘Musenna Masaalaano noonsana insa yitannore macciishshitona’ yiisi.
30 Dureessu manchino, ‘Annaꞌya Abirihaami, deeꞌni dihattooti; mittu manchi reyotenni kae insawa mariro maaro eꞌanno.’
31 Abirihaami kayinni togo yiisi: ‘Musenna Masaalaano yitannore macciishshitannokkiha ikkiro, mittu manchi reyotenni kaeennano diammantanno.’”
Lekkaalliidi Qaagiishshuwa
^ Noo gedeenni tirriro, “100 baadoosi safaraancho.” Mittu baadoosi safaraanchi 22 litire ikkanno.
^ Noo gedeenni tirriro, “50 baadoosi safaraancho.” Mittu baadoosi safaraanchi 22 litire ikkanno.
^ Noo gedeenni tirriro, “100 qoroosi safaraancho.” Mittu qoroosi safaraanchi 220 litire ikkanno.
^ Noo gedeenni tirriro, “80 qoroosi safaraancho.”
^ Woy “konni diri.”
^ Noo gedeenni tirriro, “kikkiꞌlara, nyeenyera.” Tini baxxino ayirrinye afiꞌra leellishshannote.
^ Woy “Heedisi.” Mannu ooso baalate waamma xawisanno.
^ Tini baxxino ayirrinye afiꞌra leellishshannote.
