Luqaasi Wongeella 20:1-47
20 Mitto barra Yesuusi qullaawu mini giddo manna rosiisanninna dancha duduwo duduwanni heeꞌreenna, kakkalaanote roorrootinna seeru rosiisaano cimeeyyete ledo dagge
2 togo yitusi: “Hanni kulinke, konne coye assattohu mayi silxaanenniiti? Tenne silxaane uyinohehu ayeti?”
3 Yesuusi qole togo yiinsa: “Anino mitte xaꞌmo xaꞌmeemmoꞌnena qolleꞌꞌe:
4 Yohaannisi manna cuuate silxaane afiꞌrinohu gordunniitinso mannuwiinniiti?”
5 Insa kayinni togo yitanni insa insanaawa hasaabbu: “‘Gordunniiti’ yinummoro, ‘Iso mayira ammana gibbiniyya?’ yaannonke.
6 ‘Mannuwiinniiti’ yinummoro kayinni baalunku manni Yohaannisi masaalaanchoho yee ammananno daafira, kinnatenni awwaalannonke.”
7 Konnira, ‘Mamiinniitiro dianfoommo’ yite qoltu.
8 Yesuusino, “Anino konne coye asseemmohu mayi silxaanenniitiro dikuleemmoꞌne” yiinsa.
9 Hakkiinni mannaho togo yee mitto lawishsha kuli: “Mittu manchi woyinete kaashsho kaasiꞌre gate loossannorira guto ee wole gobba haꞌre lowo yanna keeshshi.
10 Woyinete laalo gamba assinanni yanna iillituta, qeechasi sokkannosi gede borojjichosi gate loossannoriwa soyi. Gatu loosaasine kayinni borojjicho gantuhu gedensaanni mulla anganni qoltu.
11 Isi kayinni xaano wole borojjicho soyi. Insa hakkonne borojjichono gante shollishshe mulla anganni qoltu.
12 Xaano isi sayikki borojjicho fushshe soyi; hakkonne borojjichono madiissite fushshite tuggu.
13 Hatte yannara woyinete irshi anni togo yii: ‘Maa assummoro woyyate ikka? Xa baxeemmo beettoꞌya soyeemmo. Iso ayirrisa dihoogganno.’
14 Gatu loosaasine beetto laꞌuti insa insanaawa, ‘Ragiꞌrannohu konneeti. Ragge ninketa ikkitanno gede amme iso shinona’ yitu.
15 Konnira insa iso woyinete kaashshi giddonni goshooshshe fushshite shitu. Ikkina, woyinete irshi anni insa ma assannoha lawannoꞌne?
16 Isi daye gate loossannore shee woyinete irsha wolu mannira aanno.”
Mannu tenne macciishshiti, “Kuni horonta diꞌꞌikkannoreeti!” yii.
17 Yesuusino insa seekke laꞌꞌanni togo yii: “‘Mine mintannori mishshe agurtino kinchi qara xaawate kincho ikkino’ yine borreessinoonnihu mayyaateetiyya?
18 Konni kinchi aana uwannohu baalu lowo geeshsha madiꞌranno. Kuni kinchi aanasi uwannohu baalu kayinni cancanamanno.”
19 Seeru rosiisaanonna kakkalaanote roorrooti konne lawishsha coyiꞌrinohu insa hede ikkinota affe, hatte saatera amaddasira hasidhu.
20 Iso qottanni keeshshituhu gedensaanni, coyiꞌranno coyinni amaddasira yite woxe uyite, elo lawe shiqanno manna maaxxe isiwa sokku; hatto assitinohu iso gashshootehonna gobbate gashshaanchira sayisse uyitara yiteeti.
21 Sonkoonni manni togo yee xaꞌmisi: “Rosiisaancho, ati coyiꞌrattorinna rosiisattori halaale ikkinota hattono mallaadattokkitanna Maganu doogo halaalunni rosiisattota anfoommo.
22 Ikkina, Qeesaarira giwire aa hasiissannonkenso dihasiissannonke?”*
23 Isi kayinni xagarronsa afe togo yiinsa:
24 “Hanni mitte diinaare* abbitine leellishsheꞌꞌe; tenne saante aana noo misile ayete? Aanaho borreessinoonni suꞌmino ayeho?” Insano, “Qeesaariho” yitu.
25 Isino, “Hatto ikkiro Qeesaariha Qeesaarira, Maganunniha Maganoho uuyye” yiinsa.
26 Insa coyiꞌrino coyinni mannu albaanni amaddasira didandiitino; hatteentenni qolino dawaro dhagge assidhe sammi yitu.
27 Ikkollana reyiniro dikaꞌnanni yitannori mitu Saduqooti isiwa dagge togo yite xaꞌmitusi:
28 “Rosiisaancho, Muse ‘Mittu manchi ooso ilikkinni reyiro, rodiisi galtesi ragiꞌre rodiisira sircho sayisa hasiissannosi’ yee borreessinonke.
29 Mitto mine lamalu roduuwi no. Insa giddo bayiriidihu seenne adhe ooso kayinni ilikkinni reyi.
30 Layinkihuno
31 sayikkihuno hatte mancho ragidhu. Lamalunku ise ragidhe ooso kayinni iltukkinni reyitu.
32 Jeefote manchono reyitu.
33 Ise lamalunku adhitino daafira, reyotenni kaꞌnanni woyite hiikkunni minaama ikkitanno?”
34 Yesuusino togo yiinsa: “Tenne alame* ooso adhitannonna adhantanno;
35 dagganno alamera heeꞌranna reyotenni kaꞌꞌa maltinonsari kayinni diadhitanno, hattono diadhantanno.
36 Isinni insa reya didandiitanno; qoleno sokkaasinete gede ikkitanno; insa reyotenni kaꞌanno daafira Maganu ooso ikkitanno.
37 Ikkollana Muse nafa citu daafira kultanno xaggera Yihowa, ‘Abirihaami Magano, Yisaaqi Maganonna Yaaqoobi Magano’ yii woyite, reyitinori kaꞌannota egensiisino.
38 Isi lubbote noori Maganooti ikkinnina reyitinori Magano diꞌꞌikkino; korkaatuno baalunku isi illera lubbote nooreeti.”
39 Seeru rosiisaano giddo mitu “Rosiisaancho, dancha coye coyiꞌrootto” yitu.
40 Hakkunni gedensaanni worbe iso mitte xaꞌmono xaꞌma dandiinohu dino.
41 Hakkiinni isi togo yee xaꞌminsa: “Mannu Kiristoosi, Daawiti beettooti hiitto yaanno?
42 Korkaatuno Daawiti umisi Faarsote maxaafira togo yiino: ‘Yihowa Mootichiꞌyara, “Diinnakki lekkakkira woroonni qolammo geeshsha
43 qiniiteꞌyaanni ofolli” yiino.’
44 Daawiti iso mooticha yiina isi hiitto ikke beettosi ikkannoyya?”
45 Mannu baalu macciishshanni heeꞌreenna isi rosaanosi togo yii:
46 “Seeru rosiisaano qorophe; insa seeda uddano uddidhe dowanna gudumaaleho* mannu ayirrise keere haaꞌrannonsata baxxanno; qoleno insa xaadu minnara albaanni* ofollanna jilu mine ayirrado darga ofolla baxxanno;
47 gunnootu mine* mulqitanno hattono leellamate yite huuccatto seedissanno. Insa wolu manninni roore qorichishantanno.”
Lekkaalliidi Qaagiishshuwa
^ Woy “garahonso digaraho?”
^ Roomunnite birru saanteeti.
^ Woy “konni diri.”
^ Woy “dikkote.”
^ Woy “dancha bayicho.”
^ Woy “jajja.”
