Luqaasi Wongeella 4:1-44
4 Hakkiinni Yesuusi qullaawu ayyaani woꞌmeennasi Yordaanoosinni higi; halalla heeꞌreenna qullaawu ayyaani massaginosi;
2 hakkiicho 40 barra keeshshi; Daawuloosino jifisi. Konni 40 barri giddo mittoreno itinokki daafira jeefote hudiꞌri.
3 Hatte yannara Daawuloosi togo yiisi: “Hanni ati Maganu beettootiro, kuni kinchi daabbo ikkanno gede hajaji.”
4 Yesuusi kayinni, “‘Manchu sagaletenni calla heeꞌra dihasiissannosi’ yine borreessinoonni” yee qolisi.
5 Daawuloosi Yesuusa mitto gotti yiino darga masse, uullate gashshoote baala lipheessu giddo leellishisi.
6 Hakkiinni togo yiisi: “Konni gashshooti baalu silxaanenna ayirrinyensa anera uyinoonnie; anino hasiꞌroommohura aa dandeemmo daafira atera eemmohe.
7 Konnira albaꞌyaanni mitte higge calla magansiꞌrittoero, kuni baalu ateha ikkanno.”
8 Yesuusino togo yee qolisi: “‘Maganokki Yihowa calla magansiꞌri; qullaawa soqqanshono isira calla shiqishiꞌri’ yine borreessinoonni.”
9 Hakkiinni iso Yerusaalamete katama masse qullaawu mini guunxora* uurrise togo yiisi: “Maganu beetto ikkoottoro, hanni kawiinni eela higge kubbite uwi;
10 korkaatuno togo yine borreessinoonni: ‘Isi agartannohe gede ate daafira sokkaasinesi hajajanno;’
11 hattono ‘Lekkakki kinchu gane gawajjannohekki gede, insa angansa woroonni worte irkisse kayissannohe.’”
12 Yesuusino qole, “‘Maganokki Yihowa jiffooti’ yinoonni” yiisi.
13 Daawuloosino fonqolo baala gudihu gedensaanni, wole injiitanno yanna afiꞌra geeshsha isiwiinni agure haꞌri.
14 Hakkiinni Yesuusi qullaawu ayyaani wolqa woꞌmiteennasi Galiila higi. Qooxeessaho noo gobba baalateno suꞌmisi danchatenni kai.
15 Qoleno xaadu minnansara rosiisi; mannu baaluno ayirrisisi.
16 Hakkiinni, lophino katama Naazireete haꞌri; bashshosinte gede Sambatu barra xaadu minira eꞌꞌe nabbawara kae uurri.
17 Konnira masaalaanchu Isayyaasi xaaxo uyinisi; isino xaaxo fane togo yine borreessinoonni bayicho afi:
18 “Yihowa ayyaani ane aana no; korkaatuno isi buxanete dancha duduwo duduweemmo gede buurinoe. Qafadantinori wolaphitannotanna ballitinori laꞌannota duduweemmo gede, kadantinore kadotenni fushsheemmo gede,
19 hattono Yihowaha eltote diro sabbakeemmo gede soyinoe.”
20 Hakkiinni xaaxo xaaxe soqqamaanchoho qole oye ofolli; xaadu mine noori baaluno iso kechi yite laꞌu.
21 Isino, “Kuni xa macciishshitinihu qullaawa borro qaali techo woꞌmino” yiinsa.
22 Baalunku isi daafira danchare coyidhu; wodana gaꞌlabbi assannoha dancha coye coyiꞌranno daafira dhagge assidhe, “Kuni Yooseefi beetto diꞌꞌikkino?” yitu.
23 Hatte yannara Yesuusi togo yiinsa: “‘Ati xagisaanchu, hanni umokki hursi’ yitine maammaakkinannieta afoommo. Qoleno, ‘Qifirinahoomi assootto yinanna macciishshinoommore kowiicho gobbakkirano assi’ yitinannie.”
24 Konnira togo yiinsa: “Halaale kuleemmoꞌnena, masaalaanchu gobbasira diayirranno.
25 Lawishshaho Eeliyaasi waro, sase dironna lee agana xeena gana hoogeenna uulla woꞌmate lowo hude ubbu yannara, Israeelete gobbara lowo gunnooti no.
26 Ikkollana Eeliyaasi, Sidoonu gobbara Saraphitaho heedhannote mitte gunnitte manchowa ikkinnina, kuri Israeelete meenti giddo mittenniwano disonkoonni.
27 Qoleno masaalaanchu Elsai yannara, Israeelete gobbara dhiigu dhibbi amadinohu lowo manni no; ikkollana, Sooriyu mancho Niꞌꞌimaani agurranna insa giddo mittuno dihurino.”*
28 Xaadu mine noori baalu konne coye macciishshite lowo geeshsha hanqitu;
29 hakkiinni kaꞌe mudditanni katamu gobbaanni fushshitusi; iso eela qolte tuggara hedde kataminsa noo ilaali qacce massitusi.
30 Isi kayinni mereeronsaanni hige fule haꞌri.
31 Hakkiinni Qifirinaahoomi katama Galiila dirri. Hakkiicho isi manna Sambatunni rosiisanno;
32 silxaane noosi manchi gede ikke coyiꞌranno daafira, rosiisino gara lowo geeshsha dhagge assidhu.
33 Hatte yannara, xaadu mine mittu battete ayyaani amadino manchi no; isino togo yaanni canci:
34 “Hiiꞌꞌi ane! Naazireetete Yesuusa, ninkera ate ledo mayi noonke? Hunattonkera dayitto? Ati ayetiro seekke afoommo; ati Qullaawa Maganu soqqamaanchooti.”
35 Yesuusi kayinni, “Sammi yii; manchuwiinni fuli” yee ufi. Bushu ayyaanino, mancho mannu albaanni tugihu gedensaanni gawajjisikki fuli.
36 Hatte yannara insa baalunku lowo geeshsha dhagge assidhe insa insanaawa togo yitu: “Ayiddeꞌya coyiꞌranno gara laꞌini? Battete ayyaanna wolqatenninna roorretenni hajajanno; insano hajajante fultanno!”
37 Konnira, Yesuusi duduwi qooxeessaho noo gobba baala tuqi.
38 Xaadu mininni fulihu gedensaanni, Simooni minira ei. Simooni ballo biso baasa iibbabbite shette no; insano, kaaꞌlannose gede huuccidhusi.
39 Hakkiinni Yesuusi mulese uurre heeshshi yee, iibbabbo ufi; iibbabbono agurtuse. Iseno hakkawoyintenni kaꞌe soqqantunsa.
40 Arrishsho eꞌuta, mannu addi addi dhibbi amadinore isiwa abbiꞌri. Isino mittu mittunkura angasi aanansa wore hursinsa.
41 Agaaninteno, “Ati Maganu Beettooti” yite raartanni lowo manniwiinni fultu. Isi kayinni ufinsa; insa Kiristoosi ikkinota affino daafira, coyidhannota hooli.
42 Soodo gute kae mannu nookkiwa haꞌri. Ikkollana, mannu hasanni isi noowa dayi. Insawiinni haꞌrannokki gedeno huuccidhusi.
43 Isi kayinni togo yiinsa: “Wole katammarano Maganu Gashshootiha dancha duduwo duduwa hasiissannoe; sonkoonniehuno iseraati.”
44 Konnira, Yihudunnite xaadu minna giddo sabbakanni haꞌri.
