Luqaasi Wongeella 6:1-49
-
Yesuusi, “Sambatu Mootichaati” (1-5)
-
Anga laanshaawino manchi huri (6-11)
-
Tonaalame soqqamaasine (12-16)
-
Yesuusi rosiisi, hattono hursi (17-19)
-
Hagiirrenna bayisibao (20-26)
-
Diina baxa (27-36)
-
Yoo yaa agurre (37-42)
-
Gumisenni anfanni (43-45)
-
Kinchu aana sanfoonni mine; bushshu aana sanfoonni mine (46-49)
6 Yesuusi Sambatunni gidu irshi giddoonni hige saꞌꞌanni heeꞌreenna, rosaanosi shoye tattayisse angatenni robbe ittu.
2 Hatte yannara mitu Farisooti, “Sambatunni seeru hoolinore assitinannihu mayiraati?” yitu.
3 Yesuusi kayinni togo yee qolinsa: “Daawiti, isinna ledosi noo manni hudiꞌri woyite maa assinoro horonta dinabbabbinoonni?
4 Isi Maganu minira eꞌꞌe, kakkalaano agurranna wolu mittuno itara fajjinoonnikkiha qullaawa tima* diꞌꞌitino? Ledosi noo mannirano diuyino?”
5 Hakkiinni, “Manchi Beetti Sambatu Mootichaati” yiinsa.
6 Wole Sambata xaadu minira eꞌꞌe rosiisi. Hakkiicho mittu qiniiticho anga laanshaawino manchi no.
7 Seeru rosiisaanonna Farisootu Yesuusa busha assa hasidhino daafira, Sambatunni hursannoronna teꞌee affara ille worte laꞌu.
8 Isi kayinni heddanni noore afe anga laanshaawino mancho, “Kaꞌe mereeroho uurri” yiisi. Manchuno kae hakkiicho uurri.
9 Hakkiinni Yesuusi togo yee xaꞌminsa: “Sambatunni fajjinoonnihu danchanso busha assate? Lubbo* gatisatenso hunate?”
10 Mulesi noo manna baala laihu gedensaanni mancho, “Angakki diriirsi” yiisi. Manchuno angasi diriirsi; angasino hurtu.
11 Insa kayinni hanqite giira kaxxite Yesuusa hiissitannoro maꞌlitu.
12 Mitto barra Yesuusi huuccatto assiꞌrara ilaala fule, hashsha woꞌma Magano huucciꞌranni gali.
13 Soodita rosaanosi woshshe, insa giddonni 12 doore soqqamaasine yee suꞌma fushshinsa; suꞌminsano aane nooho:
14 Pheexiroosi yee suꞌma fushshisihu Simooni, rodiisi Indiriyaasi, Yaaqoobi, Yohaannisi, Filiphoosi, Bertelemewoosi,
15 Maatewoosi, Toomaasi, Ilfiyoosi beetti Yaaqoobi, “laalaataanchu” yinihu Simooni,
16 Yaaqoobi beetti Yihudinna gedensoonni Yesuusa sayise hirihu Asqorootu Yihudaati.
17 Yesuusi insa ledo ilaalunni dirre taalashsho darga uurri; hakkiicho batinye rosaanosi no; qoleno isi coyiꞌrannore macciishsharanna dhibbinsanni hurara, Yihudu gobba baalatenni, Yerusaalametenni, hattono baaru qaccera noohu Xiroosinna Sidooni qoqqowinni dayinohu lowo manni no.
18 Battete ayyaanna waaddannonsari nafa hurtino.
19 Wolqa isiwiinni fulte baalanka hursitanni noo daafira, mannu baalu iso kisa hasiꞌrino.
20 Yesuusi rosaanosi widira hige lae togo yii:
“Kiꞌne buxane hagiirraammaho; Maganu Gashshooti kiꞌnehona.
21 “Kiꞌne xa hudidhinanniri hagiirraammaho; gedensoonni duubbinannina.
“Kiꞌne xa wiꞌlitinanniri hagiirraammaho; gedensoonni osoꞌlitinannina.
22 “Manchi Beettira yitineenna mannu giwiꞌnero, bohiꞌnero, mishiꞌneronna suꞌmaꞌne beebba bushatenni kayisanno yanna baalantera kiꞌne kayinni hagiirraammaho.
23 Hakko barra hagiidhe; tashshi yooꞌne! Korkaatuno gordoho afidhinanni baꞌraarshi lowoho; albi annuwansa masaalaanono hatto assidhinona.
24 “Kiꞌne dureeyyete kayinni aanneꞌe; albillitte afidhinanni qawaaxxo baala xaanni afidhinoonnina.
25 “Xa duubbinoonniri kiꞌnera aanneꞌe; gedensoonni hudidhinannina.
“Xa osoꞌlitinanniri kiꞌnera aanneꞌe; gedensoonni dadillitinanni, hattono wiꞌlitinannina.
26 “Mannu baalu kiꞌne daafira danchare coyiꞌranno yanna baalantera kiꞌnera aanneꞌe; albi annuwansano kaphu masaalaanora hatto assitinona.
27 “Kiꞌne macciishshitinannirira kuleemmoꞌnena: Baarigaarraꞌne baxa, gibbannoꞌnerira danchare assa,
28 runtannoꞌnere maassiꞌra, hattono xontannoꞌnerira huuccatto assa agurtinoonte.
29 Mitto baqqaalla qawaadannohehura layinkihano qolisi; kootekki adhannohu shamisekkino adhona aguri.
30 Xaꞌmiꞌrannohehura baalaho uyi; jajjakki adhannohu qolannohe gede xaꞌmidhooti.
31 “Qoleno, mannu kiꞌnera assaꞌnera hasidhinannire baala kiꞌneno insara assensa.
32 “Baxxannoꞌnere calla baxxiniro, galantanniꞌne gede assannori mayi no? Cubbaataammu nafa baxxannonsare baxxanno.
33 Danchare assitannoꞌnerira calla danchare assitiniro, galantanniꞌne gede assannori mayi no? Cubbaataammu nafa hatto assitanno.
34 Qoleno, qoltannonke yitine heddinannirira calla liqiissitiniro* galantanniꞌne gede assannori mayi no? Cubbaataammu nafa uyitu geeshshire qolte adhate yite cubbaataammaho liqiissitanno.
35 Kiꞌne kayinni baarigaarraꞌne baxanna danchare assa agurtinoonte; hattono mittoreno qollanninke yitine agadhitinikki liqiisse; hatto assitiniro, lowo baraarsha afidhinanni; iimi Maganirano ooso ikkitinanni.
36 Anniꞌne maarannoha ikkinonte gede, kiꞌneno woꞌmanka woyite maartinannire ikke.
37 “Qoleno, wolootaho yoo yaa agurre; kiꞌnerano horonta yoo diyinanniꞌne; woloota misha agurre; kiꞌneno horonta diminshanniꞌne. Woꞌmanka woyite gatona yiiyye;* kiꞌnerano gatona yinanniꞌne.*
38 Mannaho uuyye; insano uyitannoꞌne. Uddano qoꞌlitineenna xiibbenna qasse woꞌme duꞌnamanna danchu safaraasinchinni safarte uyitannoꞌne. Safartinanni safaraanchinni safarte qoltannoꞌne.”
39 Hakkiinni togo yee mitto lawishsha kulinsa: “Ballichu ballicha massaga dandaannoni? Hatto assiro lamunku mimmito haadhe balete ubbanno.
40 Rosaanchu rosiisaanchosi dirooranno; ikkollana seekke rosinohu baalu rosiisaanchisi gedeeha ikkanno.
41 Ikkina, ate illera noo heelliicho laittokki rodiikki illera noo ishincho mayira laꞌꞌatto?
42 Ate illera noo heelliicho laittokki rodookki, ‘Rodooꞌya, illekkira noo ishincho fushsheemmohe’ hiitto yaatto? Ati lawisiisaanchu! Balaxxe ate illera noo heelliicho fushshiꞌri; hakkiinni rodiikki illera noo ishincho fushshate xunsite laꞌꞌa dandaatto.
43 “Dancha haqqicho busha guma dilaaltanno; busha haqqicho dancha guma dilaaltanno.
44 Mitte mittenta haqqicho gumisenni bande anfanni. Lawishshaho, mannu utu aaninni balasete laalo dixinqiꞌranno; woy utaamu citi giddonni woyinete laalo dixinqiꞌranno.
45 Danchu manchi wodanisira cibbiꞌrinohu danchu coyi giddonni danchare fushshanno; bushu manchi kayinni cibbiꞌrinohu bushu coyi giddonni bushare fushshanno; korkaatuno, afiisi coyiꞌrannohu wodanisira woꞌminoreeti.
46 “Ikkina ani yeemmore assitinikki, ‘Mooticha! Mooticha!’ yitinanniehu mayiraati?
47 Anewa daannohunna qaaleꞌya macciishshe wonshannohu baalu aye lawannoro kuleemmoꞌne:
48 Isi, mine miꞌnara giddo qole seekke ume kinchu aana safiꞌrino mancho lawanno. Gedensoonni lolahu dayita lagu daye mine gani; ikkollana dancha gede assine minnoonniha ikkino daafira minu dishafamino.
49 Qaaleꞌya macciishshe wonshannokkihu baalu kayinni, giddo qole seekke umikki mine bushshu aana miꞌnino mancho lawanno; lagu daye ganita, minu bayichonko toate yinannikkita toeenna haaꞌnannire hoongi.”
Lekkaalliidi Qaagiishshuwa
^ Woy “Maganu albaanni shiqino tima.”
^ Woy “heeshsho.”
^ Qallo nookki liqooti.
^ Woy “mulla agurre.”
^ Woy “mulla agurranniꞌnena.”
