Luqaasi Wongeella 9:1-62
-
Tonaalame soqqamaasinera soqqanshote daafira biddishsha uyinsa (1-6)
-
Heeroodiisi gurchaawi (7-9)
-
Yesuusi 5,000 manna itisi (10-17)
-
Pheexiroosi, ‘Ati Maganu Buurino Mooteeti’ yiisi (18-20)
-
Yesuusi reyannota coyiꞌri (21, 22)
-
Addu rosaano (23-27)
-
Yesuusi maalaletenni soorrami (28-36)
-
Agaaninte amaddino qaaqqi huri (37-43a)
-
Yesuusi xaano reyannota coyiꞌri (43b-45)
-
Rosaano, ‘Ninke giddo roorannohu ayeti?’ yite heewisantu (46-48)
-
Giwannonkekkihu baalu ninke ledoho (49, 50)
-
Samaariyu qachira heeꞌranno manni Yesuusa giwi (51-56)
-
Yesuusi hoode haꞌra (57-62)
9 Hakkiinni Tonaalamenta soqqamaasinesi mitteenni woshshe, agaaninte baala hajajjanno gedenna dhiwantinore hursitanno gede wolqanna roorre uyinsa.
2 Qoleno Maganu Gashshootire sabbakkanno gedenna dhiwantinore hursitanno gede soyinsa;
3 togo yiinsa: “Hadhinanni woyite mittoreno adhitinoonte; siqqo woy ogoro woy daabbo woy woxe* woy layinki uddano adhitinoonte.
4 Ikkollana martinanniwa baalawa mittu minira eꞌiniro, katamunni fultine hadhina geeshsha hakko keeshshe.
5 Martinanniwa baalawa mannu haaꞌra giwiꞌnero hakko kataminni fultine hadhinanni woyite, qorowishsha ikkannonsa gede lekkaꞌne buko gangaꞌne.”
6 Hakkiinni insa kaꞌe, martuwa baalawa dancha duduwo dudubbanninna dhiwantinore hursitanni qachunni qacha hadhanni qoqqowo woꞌma tuqqu.
7 Hatte yannara Galiilu gashshaanchi Heeroodiisi* ikkinore baala macciishshi; mitu manni Yohaannisi reyotenni kaino yaanni noo daafira, isi lowo geeshsha gurchaawi.
8 Mitootu Eeliyaasi galagale dayino; wolootu qolte albi masaalaano giddo mittu reyotenni kaino yitanno.
9 Heeroodiisino togo yii: “Yohaannisi umo mursiisoommo. Isi daafira duuchare yinanna macciishsheemmohu isi kuni ayetiyya?” Hakko daafira, iso laꞌꞌara hasiꞌri.
10 Soqqamaasine higguti assitinore baala Yesuusira kultu. Isino Beetesaayida yinanni katama calluwansa haaꞌre haꞌri.
11 Ikkollana mannu tenne afe hoodesi haꞌri. Yesuusino manna hagiidhe haaꞌre Maganu Gashshootire kulinsa; dhiwantinoreno hursi.
12 Yanna hawarrituta Tonaalamunku isiwa shiqqi yite togo yitusi: “Heeꞌnoommohu baddowaati; hakko daafira mannu qooxeessaho noo qachuwanna gaxarra haꞌre galannowanna itannore hasiꞌranno gede haꞌrisi.”
13 Isi kayinni, “Ittannore kiꞌne uuyyensa” yiinsa. Insano togo yitusi: “Haꞌne konni baalu mannira ikkitanno sagale hirrummoro ikkinnina onte daabbonna lame qulxuꞌme agurranna woluri dinonke.”
14 Hakkiicho 5,000 meddi yaanno labballi no. Yesuusi kayinni rosaanosi, “Mannu ontawo ontawo ikke gaamame ofollanno gede asse” yiinsa.
15 Insano Yesuusi yiinonsa garinni baalanka manna ofollanno gede assitu.
16 Hakkiinni ontenka timanna lamenta qulxuꞌmicho haaꞌre iima hige lae maassiꞌri. Hiiqqaqqe mannaho iillishshanno gede rosaanosira uyi.
17 Konnira baalunku itte duubbu; ittanna gatino giggilono 12 gimboola gamba assitu.
18 Mitto barra Yesuusi callisi huuccatto assiꞌranni heeꞌreenna rosaannosi isiwa daggu; isino “Mannu ane ayeti yaannoe?” yee xaꞌminsa.
19 Insano togo yite qoltu: “Mitootu Cuuaancho Yohaannisiiti; wolootu Eeliyaasiiti; wolootu qolte albi masaalaano giddonni mittu reyotenni kaino yitanno.”
20 Hakkiinni Yesuusi, “Kiꞌne ane ayeti yitinannieyya?” yiinsa. Pheexiroosi, “Ati Maganu Buurino Mooteeti” yee qoli.
21 Hakkiinni isi tenne mittohono kultannokki gede seekke hajajinsa;
22 qoleno isi togo yii: “Manchi Beetti lowo qarra adhasi, hattono cimeeyyete, kakkalaanote roorrootinna seeru rosiisaano albaanni mishamasi qoleno reyasinna sasu barri gedensaanni kaꞌꞌasi digattanno.”
23 Hakkiinni baalunkura togo yiinsa: “Hoodeꞌya haꞌra hasiꞌrannohu aye manchino umosi kaado; barru baala qarru haqqasi duqqe agurikkinni hoodeꞌya dayo.
24 Heeshshosi* gatisiꞌra hasiꞌrannohu baalu huꞌnanno; anera yee heeshshosi* huꞌnannohu baalu kayinni gatisiꞌranno.
25 Qoleno mittu manchi alame woꞌma isita assiꞌre, heeshshosi huꞌniro woy gawajjiro kayinni maa kaaꞌlitannosi?
26 Anenna qaaleꞌya fokkannoha baala manchi Beetti umisi ayirrinyinni, Annisi ayirrinyinninna qullaawa sokkaasine ayirrinyinni daanno woyite fokkannosi.
27 Halaale kuleemmoꞌnena, kowiicho uurritinori giddo mitu Maganu Gashshoote laꞌa geeshsha horonta direyitanno.”*
28 Yesuusi hatto yiihunni mitu settu barri gedensaanni, Pheexiroosi, Yohaannisinna Yaaqoobi haaꞌre huuccatto assiꞌrara ilaala fuli.
29 Isi huuccatto assiꞌranni heeꞌreenna danisi soorrame wole ikki; uddanosino waajjidhe bilicci yitu.
30 Hatte yannara lamu manchi yaano Musenna Eeliyaasi isi ledo hasaabbanni no.
31 Insano ayirrinyunni leelte, Yerusaalamete ikkara noorenna tenne alame agure haꞌranno gara hasaabbu.
32 Hakkawoyite, Pheexiroosinna ledosi noori goxxe no; woꞌmunni woꞌma baqqi yituti kayinni Yesuusi ayirrinyenna ledosi uurre nooha lame manna laꞌu.
33 Kuni lamunku manchi Yesuusiwiinni baxxite hadhanni heedheenna Pheexiroosi iso togo yii: “Rosiisaancho, kowiicho heeꞌra ninkera danchate. Hakko daafira, sase dunkaana mitto atera, mitto Musera, mitto Eeliyaasira qanseemmo.” Ikkollana coyiꞌranni noori isinkura dileellinosi.
34 Pheexiroosi tenne coyiꞌranni heeꞌreenna gomichu daye guggushshinsa. Gomichu guggushshinsata waajjitu.
35 Hakkiinni gomichu giddonni, “Doodhoommo Beettiꞌya konneeti; isi yaannota macciishshe” yitanno huuro daggu.
36 Tini huuro macciishshantu woyite Yesuusi callisi nooha laꞌu. Ikkollana insa sammi yitu; hatte yannara laꞌinore mittohono dikultino.
37 Layinki soodo ilaalunni dirrituta, lowo manni Yesuusi ledo xaadi.
38 Hatte yannara mannu mereerinni mittu manchi qoonqosi naggi asse togo yii: “Rosiisaancho, afiꞌroommo mittootina qaaqqoꞌya kaaꞌlattosi* gede huucciꞌreemmohe.
39 Bushu ayyaani amade hedeweelcho raarshiishannosi; uulla tuge haambiishshanni fittifachishannosi; qoleno biso madiisse kae lowo geeshsha shetisikki diagurannosi.
40 Rosaanokki fushshitanno gede huucciꞌroommo; insa kayinni didandiitino.”
41 Yesuusi togo yee qoli: “Ammana nooꞌnekkirinna shokkashsho ilama, kiꞌne ledo mageeshshi geeshsha keeshsha hasiissaeraati? Kiꞌne cince heeꞌreemmohu mageeshshi geeshshaati? Hanni beetto anewa abbi.”
42 Ikkollana beettu Yesuusiwa shiqqi yaanni heeꞌreenna agaaninte uulla tugge fittifachishshusi. Yesuusi kayinni battete ayyaana ufe beetto hursi; hakkiinni annaho qole uyi.
43 Insa baalunku Maganunnita jawa wolqa dhagge assidhu.
Mannu baalu Yesuusi assinore baala dhaggeeffatanni heeꞌreenna, isi rosaanosi togo yii:
44 “Konne kuleemmoꞌne coye seekkitine macciishshe; habbinoonte; manchi Beetto mannu angara sayinse uyinanni.”
45 Ikkollana coyiꞌrinori dileellinonsa. Isinni wodanchitannokki gede coyi goꞌlinonsa; tenne daafira kayinni xaꞌma waajjitino.
46 Hakkunni gedensaanni, “Ninke giddo roorannohu ayeti?” yitanni insa insanaawa heewisantu.
47 Yesuusi wodaninsanni heddanni noore afe, mitto shiima qaaqqo haaꞌre mulesi uurrise,
48 togo yiinsa: “Konne qaaqqo suꞌmiꞌyanni haaꞌrannohu baalu aneno haaꞌranno; ane haaꞌrannohu baalu soyinoehano haaꞌranno. Korkaatuno kiꞌne baalunku giddo isonooto woriidiha asse laꞌꞌannohu woꞌmunkura aliidiho.”
49 Yohaannisi togo yii: “Rosiisaancho, mittu manchi suꞌmikkinni agaaninte fushshanna anfoommo; ikkollana ninke ledo ate harunsannokki daafira hoolate woꞌnaalloommo.”
50 Yesuusi kayinni togo yiisi: “Giwannoꞌnekkihu baalu kiꞌne ledoha ikkino daafira hoolate woꞌnaaltinoonte.”
51 Yesuusi iimira haꞌranno barri gambisita* Yerusaalame haꞌrara murciꞌre kai.
52 Hakko daafira isi balaxe rosaanosi soyi; insano hasiisannosire qixxeessitara mitto Samaariyu qacha martu.
53 Mannu kayinni isi Yerusaalame haꞌrara murciꞌrinota afino daafira haaꞌra giwisi.
54 Rosaanosi Yaaqoobinna Yohaannisi konne coye affuti, “Mooticha, giira iiminni dirrite konne manna shakki assite guddanno gede hajanjammora hasiꞌrattoni?” yitusi.
55 Yesuusi kayinni caaqqi yee lae ufinsa.
56 Konnira agurte wole qacha hadhu.
57 Hadhanni heedheenna doogo mittu manchi, “Haꞌrattowa baala hoodekki haꞌreemmo” yiisi.
58 Yesuusi kayinni togo yiisi: “Yeedaalate bale noonsa; iimi cearano minu noonsa; manchi Beettira kayinni umo worannowi nafa dinosi.”
59 Hakkiinni Yesuusi wole mancho, “Hoodeꞌya amo” yiisi. Manchu kayinni, “Mooticha, balaxe haꞌre annaꞌya madaadheemmona fajjie” yiisi.
60 Ikkollana Yesuusi togo yiisi: “Reyitinore reyitinori madaadhitona, ati kayinni hadhe baalankawa Maganu Gashshootire duduwi.”
61 Wolu manchi qole “Mooticha, hoodekki haꞌreemmo; balaxe kayinni miniꞌya manna keerunni yee dayemmona fajjie” yiisi.
62 Yesuusino togo yiisi: “Hawuudhanni kado amade heeꞌre badhera hige laꞌꞌanno manchi Maganu Gashshootira malinoha diꞌꞌikkino.”
Lekkaalliidi Qaagiishshuwa
^ Noo gedeenni tirriro, “birra.” Birra yinanni siwiila tumme seekkinoonni woxeeti.
^ Heeroodiisi Antiphaasiiti.
^ Woy “lubbosi.”
^ Woy “Lubbosi.”
^ Noo gedeenni tirriro, “reyo diqamassanno.”
^ Noo gedeenni tirriro, “laꞌꞌattosi gede.”
^ Noo gedeenni tirriro, “barri woꞌmita.”
