Maarqoosi Wongeella 1:1-45
-
Cuuaanchu Yohaannisi sabbaki (1-8)
-
Yesuusi cuuami (9-11)
-
Yesuusa Sheexaanu jifisi (12, 13)
-
Yesuusi Galiilaho sabbaka hanafi (14, 15)
-
Yesuusi umi rosaanosi woshshi (16-20)
-
Yesuusi battete ayyaana fushshi (21-28)
-
Yesuusi Qifirinaahoomi lowo manna hursi (29-34)
-
Mannu nookkiwa haꞌre huuccatto assiꞌri (35-39)
-
Dhiigu amadino mancho hursi (40-45)
1 Maganu Beetti Yesuusi Kiristoosi daafira kulannohu danchu duduwi hanafannohu aane noo garinniiti:
2 Masaalaanchu Isayyaasi maxaafira togo yine borreessinoonni: “(Kuneeti doogokki qixxeessanno gede atera albaanni sokkaanchoꞌya soyeemmo.)
3 Mittu manchi halalla, ‘Yihowa* doogo qixxeesse! Dooggasino taashshe’ yaanni lallawanno.”
4 Cuuaanchu Yohaannisi halalla, Maganu cubbonsa gatona yaanno gede mannu maaro einota leellishate cuuamanno gede sabbakino.
5 Hatte yannara, baalante Yihudu gobba manninna Yerusaalamete heeꞌranno manni baalu isiwa dayi; isino, cubbonsa faajjete kultanna Yordaanoosi lagira cuuinsa.*
6 Yohaannisi gaalu ordanni gannoonni uddano uddiꞌranno; halloho gogunni seekkinoonni qawatto qodhanno; kanchafarenna dubbu malawo itanno.
7 Qoleno isi togo yaanni sabbakanno: “Ane gedensaanni ane rooru daanno; ani heeshshi yee caammisi meqeerricho* nafa tirate diꞌꞌikkoommoho.
8 Ani wayinni cuuoommoꞌne; isi kayinni qullaawu ayyaaninni cuuannoꞌne.”
9 Hatte yannara Yesuusi, Galiilu gobbara noohu Naazireetete kataminni dayenna Yohaannisi Yordaanoosi lagira cuuisi.
10 Bayichonko wayi giddonni fulanni heeꞌrenni, gordu faꞌnameenna qullaawu ayyaani lembooli gede ikke aanasi dirranna lai.
11 Hakkiinni gordunni, “Tashshi assattoehu baxeemmo Beettiꞌya ateeti” yitanno huuro daggu.
12 Bayichonko qullaawu ayyaani Yesuusa halallira haꞌranno gede kakkayisisi.
13 Isino halalla 40 barra keeshshi; hakkiicho Sheexaanu jifisi; heeꞌrinohuno moyichu ledooti; sokkaasine kayinni soqqantinosi.
14 Yohaannisi usuramihu gedensaanni, Yesuusi Maganunniha dancha duduwo sabbakara Galiila haꞌri;
15 togo yaanni sabbaki: “Masaalloonni yanna iillitino; Maganu Gashshootino gambisino. Maaro eꞌe; dancha duduwono ammanne.”
16 Galiilu baari muleenni hige saꞌꞌanni heeꞌre, Simooninna Simooni rodoo Indiriyaasi afi; insa qulxuꞌme woshshaaxxitannore ikkitino daafira, woshshaadonsa baaru giddo tugganni no.
17 Hakkiinni Yesuusi, “Ane hoode amme, ani manna woshshaaddinannire asseemmoꞌnena” yiinsa.
18 Insano, hakkawoyintenni woshshaadonsa agurte hoodesi hadhu.
19 Hakkiinni shiima geeshsha sae, Zebidewoosi beetti Yaaqoobinna rodiisi Yohaannisi yowolonsa giddo heedhe woshshaadonsa gophitanna lai;
20 isino hakkawoyintenni woshshinsa. Insano, annansa Zebidewoosi kiranyootu ledo yowolote giddo agurte harunsitusi.
21 Hakkiinni Qifirinaahoomi hadhu.
Sambatu eanni heeꞌreennanni xaadu minira haꞌre rosiisa hanafi.
22 Seeru rosiisaano gede ikkikkinni silxaane noosi manchi gede ikke rosiisinonsa daafira, rosiisino gara lowo geeshsha dhagge assidhu.
23 Hatte yannara xaadu minensa noohu mittu battete ayyaani amadino manchi togo yaanni canci:
24 “Naazireetete Yesuusa, ninkera ate ledo mayi noonke? Hunattonkera dayitto? Ati ayetiro seekke afoommo; ati Qullaawa Maganu soqqamaanchooti!”
25 Yesuusi kayinni, “Sammi yii; manchuwiinni fuli!” yee ufi.
26 Battete ayyaanino mancho tuge fittifachishihu gedensaanni lowo geeshsha raare isiwiinni fuli.
27 Hakko noo manni baalu dhagge assiꞌre insa insanaawa togo yaanni hasaawi: “Kuni ma garaati? Rosiisanno gari dhaggete! Battete ayyaanna nafa roorretenni hajajanno; insano hajajantannosi.”
28 Konnira, isi duduwi hakkawoyintenni Galiilu gobba woꞌmate raga baala iilli.
29 Xaadu mininni fultuhu gedensaanni, Yaaqoobinna Yohaannisi ledo Simooninna Indiriyaasi minira hadhu.
30 Hatte yannara Simooni ballo biso iibbabbite goxxe no; insano bayichonko ise dhiwante noota Yesuusira kultu.
31 Yesuusino ise noowa mare anga amade gotti assise. Iseno iibbabbo higgeennase kaꞌe soqqantunsa.
32 Arrishsho eꞌuhu gedensaanni hashsha, mannu dhiwantinorenna agaaninte amaddinore baala isiwa haaꞌre dayi;
33 katamu manni baaluno nafara gamba yee no.
34 Yesuusino addi addi dhibbi amadinonsaha lowo manna hursi; hattono lowo agaaninte fushshi; ikkollana, agaaninte isi Kiristoosi ikkinota affino daafira* coyidhannota hooli.
35 Yesuusi soodo tunse heeꞌreenna gute kae, mininni fule mannu nookkiwa haꞌre huuccatto assiꞌri.
36 Ikkollana Simooninna ledosi noori iso hixamanyite hassu;
37 iso affuhu gedensaanni, “Mannu baalu hasanni noohe” yitusi.
38 Yesuusi kayinni togo yiinsa: “Hakkiichono sabbakeemmo gede, kaꞌe qooxeessaho noota wole katamma haꞌnona; korkaatuno dayommohu iseraati.”
39 Hakkiinni isi xaadu minnansara sabbakanninna agaaninte fushshanni Galiilu gobba baala tuqi.
40 Hatte yannara mittu dhiigu dhibbi amadinosi manchino isiwa daye guluphe, “Hasiꞌrittoro hursattoera* dandaattowe” yee huucciꞌri.
41 Yesuusino lowo geeshsha marare angasi diriirse mancho amammade, “Hasiꞌreemmona huri!”* yiisi.
42 Manchuno bayichonko dhiigu dhibbi agureennasi huri.*
43 Hakkiinni Yesuusi mancho seekke qorowisiise bayichonko haꞌrisi;
44 togo yiisi: “Tenne mittohono kulattokki gede qorophi; kayinni hadhe ateneeto kakkalaanchoho leellishi; kakkalaano huroottota affanno gede Muse hajajino garinni keeraawate kakkalono shiqishi.”
45 Ikkollana manchu haꞌrihu gedensaanni, tenne daafira lowore hasaawi; duduwono bayicho baala tuqisi; hakkunni gedensaanni Yesuusi katama faajjete ea dandiinokki daafira katamu gobbaanni mannu nookkiwa keeshshi. Ikkollana, mannu ragu baalinni isiwa daa diagurino.
Lekkaalliidi Qaagiishshuwa
^ Tenne tirora, Giriikete Afiite Qullaawa Borro giddo “Yihowa” yinannihu Maganu suꞌmi 237 bayicho no; kuri bayichi giddo mittu konneeti.
^ Woy “lixisinsa.”
^ Woy “maasara.”
^ Woy “isi ewelumma affino daafira” yaano ikkitara dandiitanno.
^ Noo gedeenni tirriro, “keereensattoera.”
^ Noo gedeenni tirriro, “keeraawi.”
^ Noo gedeenni tirriro, “keeraawi.”
