Maarqoosi Wongeella 12:1-44
-
Lubbo shitino loosaasine lawishsha (1-12)
-
‘Maganunniha Maganoho, Qeesaariha Qeesaarira’ (13-17)
-
Reyotenni kaꞌꞌate daafira xaꞌminoonni xaꞌmo (18-27)
-
Baalanta roortannota lame hajajo (28-34)
-
Kiristoosi Daawiti beettooti? (35-37a)
-
“Seeru rosiisaano qorophe” (37b-40)
-
Buxicho gunnitte tugginota lame saante (41-44)
12 Hakkiinni Yesuusi togo yee lawishshunni kulinsa: “Mittu manchi woyinete kaashsho kaasiꞌri; hatte woyine gaangeesse huxxa huxxi; hakkiicho woyine huuncinanni darga ume qixxeessi; hattono agarranni shae seekki; hakkiinni gate loossannorira guto oye wole gobba haꞌri.
2 Woyinete laalo gamba assinanni yanna iillituta, qeechasi abbanno gede mitto borojjicho gate loossannoriwa soyi.
3 Ikkollana insa borojjicho amadde gantuhu gedensaanni, mulla anganni haꞌrissu.
4 Tenne isi, insawa wole borojjicho soyi; insano iso gante umo facce shollishshu.
5 Xaano lede soyinoha shitu; hattono wole lowo manna soyenna mito gantu, mito shitu.
6 Xa gatinohu baxanno beettosiiti. Jeefote, ‘Beettoꞌya ayirrissanno’ yee iso insawa soyi.
7 Ikkollana gatu loosaasine insa insanaawa, ‘Ragiꞌrannohu isooti. Ragge ninketa ikkitanno gede amme iso shinona’ yitu.
8 Konnira insa amadde shite woyinete irshi giddonni fushshite tuggu.
9 Woyinete irshi anni massannoha lawannoꞌne?
10 Qullaawa Borro giddo togo yaannoha horonta dinabbabbinoonni? ‘Mine mintannori mishshe agurtino kinchi, qara xaawate kincho ikkino.
11 Kuni kinchi dayinohu Yihowawiinniiti; illenkerano maalalete.’”
12 Hatte yannara, lawishsha coyiꞌrinohu insa hede ikkinota affe amaddasira* hasidhu; ikkollana, manna waajjitino daafira agurte hadhu.
13 Hakkiinni, coyiꞌranno coyinni amaddasira yite mito Farisootanna Heeroodiisi manna isiwa sokku.
14 Kuni manni isiwa mare togo yii: “Rosiisaancho, ati halaalaancho ikkoottota, mannu naadahera yite mittoreno assattokkita, manna aana laꞌe mallaadattokkitanna Maganu doogo halaalunni rosiisattota anfoommo. Ikkina, Qeesaarira giwire aa hasiissannonkenso dihasiissannonke?*
15 Uyinonso agurro?” Yesuusino giddonsa bunshe afe togo yiinsa: “Mayira jiffinannie? Hanni mitte diinaare* abbitine leellishsheꞌꞌe.”
16 Insano abbitu; isino, “Tenne saante aana noo misile ayete? Aanaho borreessinoonni suꞌmino ayeho?” yiinsa. Insano, “Qeesaariho” yitu.
17 Hakkiinni Yesuusi, “Qeesaariha Qeesaarira, Maganunniha Maganoho uuyye” yiinsa. Insano coyiꞌrinore dhagge assidhu.
18 Reyiniro dikaꞌnanni yitanno Saduqooti dagge togo yite xaꞌmitusi:
19 “Rosiisaancho, Muse mittu manchi ooso ilikki reyiro rodiisi galtesi ragiꞌre rodiisira sircho sayisa hasiissannosita borreessinonke.
20 Mitto mine lamalu roduuwi no. Insa giddo bayiriidihu seenne adhe ooso kayinni ilikki reyi.
21 Layinkihuno, hatte mancho ragiꞌre ooso ilikki reyi; sayikkihuno hattonni ikkino.
22 Lamalunku sircho saꞌukki reyitu; insa baalu reyituhu gedensaanni manchono reyitu.
23 Ise lamalunku adhitino daafira, reyotenni kaꞌnanni woyite hiikkunnita ikkitanno?”
24 Yesuusi togo yiinsa: “Kiꞌne sodhinoonnihu Qullaawa Borrono Maganu wolqano affinoonnikki daafira diꞌꞌikkino?
25 Korkaatuno, reyotenni kaꞌnanni woyite labballu diadhitanno, seennuno mine diassiꞌranno; insa iimi sokkaasine gede ikkanno.
26 Reyotenni kaꞌꞌate daafira kayinni, Muse maxaafi giddo citu daafira kultanno xaggera Maganu Muse, ‘Ani Abirihaami Maganooti, Yisaaqi Maganootinna Yaaqoobi Maganooti’ yiinota dinabbabbinoonni?
27 Isi lubbote noori Maganooti ikkinnina reyitinori Magano diꞌꞌikkino. Kiꞌne lowo geeshsha sodhinoonni.”
28 Seeru rosiisaano giddonni mittu daye heewisantanna macciishshanni no; isi, Yesuusi dancha dawaro qolinonsata afe, “Hajajo baalate giddo umiti* hiittenneeti?” yee xaꞌmisi.
29 Yesuusi togo yee qoli: “Umi hajajo togo yitannote: ‘Israeeli macciishshi, Maganinke Yihowa mitto Yihowaati;
30 Maganokki Yihowa woꞌmu wodanikkinni, woꞌma lubbokkinni, woꞌma hedokkinninna* woꞌma wolqakkinni baxi.’
31 Layinki hajajo, ‘Olliichokki* umikki gede assite baxi’ yitannote. Kuri roortannoti wole hajajo dino.”
32 Seeru rosiisaanchino togo yiisi: “Rosiisaancho, coyiꞌroottori halaaleho; ‘Maganu mittoho; iso agurranna wolu Magani dino’;
33 iso woꞌmu wodaninni, woꞌma hedonninna woꞌma wolqanni baxa, hattono olliicho meessi gede asse baxa, woꞌmunni woꞌma shilqinshe shiqinshanni kakkalonna wole kakkalo baala lowo geeshsha roorete.”
34 Hatte yannara Yesuusi kuni manchi wodanchatenni qolinota lae togo yiisi: “Ati Maganu Gashshootiwiinni dixeertiꞌroottoho.” Hakkunni gedensaanni kayinni, worbe Yesuusa xaꞌmo xaꞌminohu dino.
35 Ikkollana, Yesuusi qullaawu mini giddo rosiisanni heeꞌre togo yii: “Seeru rosiisaano Kiristoosi Daawiti beettooti hiitto yitanno?
36 Daawiti umisi qullaawu ayyaaninni, ‘Yihowa Mootichiꞌyara, “Diinnakki lekkakkira woroonni qolammo geeshsha qiniiteꞌyaanni ofolli” yiinosi’ yee coyiꞌrino.
37 Daawiti umisi Mooticha yiina, isi hiitto beettosi ikkannoyya?”
Hatte yannara isi coyiꞌrannore lowo manni hagiidhe macciishshanni no.
38 Hakkiinni rosiisanni heeꞌre togo yii: “Seeru rosiisaano qorophe; insa seeda uddano uddidhe dowanna gudumaaleho* mannu ayirrise keere haaꞌransara hasidhanno;
39 xaadu minnara albaanni* ofollanna jilu mine ayirrado darga ofolla baxxanno.
40 Gunnootu mine* mulqitanno; hattono leellamate yite huuccatto seedissanno. Insa wolu manninni roore qorichishantanno.”
41 Isi woxe tunganni saaxinera* xaawate ofolle lowo manni saaxinete woxe tuganno gara lai; batinye dureeyyeno lowo saante tugganni no.
42 Hatte yannara mitte buxicho gunnitte mancho dagge, shiima waaga afidhinota lame shiimmaadda saante* tuggu.
43 Konnira Yesuusi rosaanosi isiwa woshshe togo yiinsa: “Halaale yeemmoꞌnena, tini buxicho gunnitte woxe tunganni saaxinera woxe tugi manni baalunkunni roorsite uyitino.
44 Korkaatuno, wolu manni baalu ikke gatinonsahu aaninni uyino; ise kayinni buxxe heedhenni noosere baala mittoreno gatisidhukki tayisse uyitino.”
Lekkaalliidi Qaagiishshuwa
^ Woy “usurtasira.”
^ Woy “garahonso digaraho?”
^ Roomunnite birru saanteeti.
^ Woy “roore.”
^ Woy “woꞌma surrekkinninna.”
^ “Olliicho” yine tirroonnihu Giriikete Afii qaali, qachu manna calla ikkikkinni manna baala xawisannoha ikkara dandaanno.
^ Woy “dikkote.”
^ Woy “dancha bayicho.”
^ Woy “jajja.”
^ Woy “uduunnichira.”
^ Noo gedeenni tirriro, “lame leptene.” Lame leptene mitte kuwaadiraanseeti.
