Maarqoosi Wongeella 6:1-56
6 Hakkiinni kae ilamino gobba dayi; rosaanosino hoodesi daggu.
2 Isino Sambatu barra xaadu mine rosiisi; rosiisanna macciishshino manni giddo rooru dhagge assiꞌre togo yii: “Kuni manchi konne coye baala mama rosi? Isira tenne hayyonna maalale loosate dandoo uyinosihu ayeti?
3 Isi dihanaaxichaho? Amasi Maariyaami, roduuwisino Yaaqoobi, Yooseefi, Yihudanna Simooni diꞌꞌikkitino? Meya roduuwisino dininke ledo heeꞌranno?” Hakko daafira, isinni kainohunni gufidhu.
4 Yesuusi kayinni togo yiinsa: “Masaalaanchu gobbasira, fiixisiwanna minesi agurranna wolewa baalawa ayirranno.”
5 Konnira anga aanaho wore boode dhiwamino manna hursinota agurranna hakko wole maalale loosa didandiino.
6 Ammana noonsakki daafira lowo geeshsha maalaꞌli. Hakkunni gedensaanni isi, qooxeessaho noo qachuwa doyanni rosiisi.
7 Hakkiinni Yesuusi Tonaalamenka isiwa woshshe lame lame asse soyinsa; battete ayyaanna hajajjanno gede roorreno uyinsa.
8 Qoleno hadhanno woyite siqqo agurranna daabbo, ogoro hattono qoraho woxe* adhitannokki gede hajajinsa;
9 caamma wodhitanno gede, layinki uddano* kayinni adhitannokki* gede kulinsa.
10 Isi lede togo yiinsa: “Mitto mine eꞌiniro, hakko qacha agurtine fultina geeshsha hakko keeshshe.
11 Haaꞌrannoꞌneha woy kultinannire macciishshannoha hoogginiro, hakkiinni agurtine hadhinanni woyite qorowishsha ikkannonsa gede lekkaꞌne buko gangaꞌne.”
12 Insano fulte mannu maaro eanno gede sabbakku;
13 lowo agaaninteno fushshitu; hattono dhiwaminoha lowo manna zayite buurte hursitu.
14 Yesuusi suꞌmi lowo geeshsha egennamino daafira, Moote Heeroodiisi tenne macciishshi; hatte yannara mannu, “Cuuaanchu Yohaannisi reyotenni kaino; maalale loosa dandiinohu iseraati” yaanno.
15 Wolootu kayinni, “Eeliyaasiiti” yitanno. Mitootu qolte, “Albi masaalaano gedee masaalaanchooti” yitanno.
16 Heeroodiisi kayinni konne coye macciishshe, “Ani goowa mursiisummohu Yohaannisi reyotenni kaino” yii.
17 Heeroodiisi, rodiisi Filiphoosi galte Heeroodiyaadanni kainohunni, manna soye Yohaannisi sansalatetenni usursiise usuru minira eessino. Heeroodiisi hatto assinohu ise galtesi assiꞌrino daafiraati.
18 Korkaatuno Yohaannisi Heeroodiisi duucha woyite, “Rodiikki galte adhattora seeru difajjannohe” yaannosi.
19 Hakko daafira, Heeroodiyaada koma amaxxite Yohaannisi shaa hasidhino; ikkollana tenne assa didandiitino.
20 Heeroodiisi, Yohaannisi keeraanchonna qullaawa mancho ikkinota afino daafira iso waajjanno; mitturi kisannosikki gedeno agarisi. Heeroodiisi, Yohaannisi coyiꞌrannore macciishshanno woyite assannori baꞌꞌannosiha ikkirono, coyiꞌrannore kayinni macciishsha baxanno.
21 Ikkollana Heeroodiisi ilamino barra ayirrisara gashshootu roorroota, olantote hajajaanonna ayirradda Galiilu gobba manna jila jile woshshi; hatte yannara Heeroodiyaada injo afidhu.
22 Heeroodiyaada beetto dagge sirbite Heeroodiisinna ledosi itanni noo manna hagiirsiissu. Mooteno beetto, “Hasiꞌrittare baala xaꞌmie eemmohena” yiise.
23 Qoleno, “Gashshootiꞌya darati geeshsha ikkiro nafa xaꞌmiꞌrittare baala eemmohe” yee xaarise.
24 Konnira ise amasewa marte, “Maa xaꞌmiꞌro ikka?” yitu. Amaseno, “Cuuaanchu Yohaannisi umo xaꞌmiꞌri” yituse.
25 Ise hakkawoyintenni rakke mootenniwa marte, “Cuuaanchu Yohaannisi umo sayinete worte xaanni aattoera hasiꞌreemma” yite xaꞌmidhu.
26 Moote tennera lowo geeshsha dadillinoha ikkirono, xaarino xaaroranna wosinisira* yee xaꞌmidhinore hoꞌla dihasiꞌrino.
27 Konnira moote hakkawoyintenni agaraanchosi soye Yohaannisi umo abbanno gede hajaji. Agaraanchuno haꞌre usuru mine Yohaannisi goowa muri;
28 hakkiinni umo saanete wore abbe beettote uyi; beettono amasera uyitu.
29 Rosaanosi tenne macciishshite, dagge reeshsha haadhe madaartu.
30 Soqqamaasine Yesuusi mule gamba yite assitinorenna rosiissinore baala kultusi.
31 Hakkiinni Yesuusi, “Kaꞌe callootinke mannu nookkiwa haꞌneenna hakkiicho shiima geeshsha fooliishshidhinannina” yiinsa. Hatto yiinohu, lowo manni daanninna haꞌranni noo daafira, sagale ittanno faro nafa hoogginohuraati.
32 Hakko daafira, hakkiinni kaꞌe yowolo giddite mannu nookki qooxeessa hadhu.
33 Ikkollana mannu insa hadhanna lai; lowo mannino hadhinota afe katamu baalunni fule, dodanni lekkatenni haꞌre balaxe sae agari.
34 Yesuusino yowolotenni dirranni heeꞌre, lowo manna lai; mannu allaalaanchu nookki geꞌreewi gede ikke noo daafira mararinsa. Hakkiinni lowore rosiisinsa.
35 Yanna hashshituta rosaanosi isiwa shiqqi yite togo yitu: “Heeꞌnoommohu baddowaati; yannano hashshitino.
36 Hakko daafira, qooxeessaho noo gaxarranna qachuwa haꞌre itannore hidhanno gede manna haꞌrisi.”
37 Yesuusi kayinni, “Itannore kiꞌne uuyyensa” yee qoli. Insano togo yitusi: “Haꞌne 200 diinaarenni* daabbo hirre itara mannaho uyinoni?”
38 Isino, “Meu timi nooꞌne? Hanni martine laꞌe!” yiinsa. Insano hadhe laꞌuhu gedensaanni, “Ontu timinna lame qulxuꞌmicho noonke” yitu.
39 Hakkiinni Yesuusi baalunku manni gaamo gaamo ikke hayissote aana ofollanno gede hajaji.
40 Konnira, mannu xibbe xibbenna ontawo ontawo ikke gaamote ofolli.
41 Hakkiinni ontenka timanna lamenta qulxuꞌmicho haaꞌre iima hige lae maassiꞌri. Timma hiiqqaqqe mannaho iillishshanno gede rosaanosira uyi; lamenta qulxuꞌmichono baalunkura beehi.
42 Baalunku itte duubbu;
43 hakkiinni intanna gatino giggilo qulxuꞌme agurranna 12 gimboola woꞌma gamba assitu.
44 Timma itinohu 5,000 labballooti.
45 Bayichonko Yesuusi manna haꞌrisa geeshsha, rosaanosi yowolo giddite Beetesaayidu widoonni noota baaru qacce iso balaxxe saꞌanno gede kulinsa.
46 Ikkollana isi manna haꞌrisihu gedensaanni huuccatto assiꞌrara ilaala haꞌri.
47 Hashshi woyite yowolo baaru mereero no; Yesuusi kayinni callisi moola baatto aana no.
48 Hatte yannara bubbe insawa higge bubbissanni noo daafira, laaqiꞌrate sharrantanna lae, hashsha shoolki agare* balla baaru aana lekkatenni haꞌranni insawa dayi; ikkollana isi sae haꞌrara hedinoha lawanno.
49 Insano baaru aana lekkatenni haꞌranna laꞌe, “Ayiddeꞌya kuuꞌꞌu daannorichi maati?” yite raartu.
50 Baalunku iso laꞌuti lowo geeshsha massu. Ikkollana isi bayichonko hasaawisinsa; qoleno, “Massinoonte! Aneetina waajjitinoonte” yiinsa.
51 Hakkiinni insa giddite noo yowolo giddita bubbe gabbi yitu. Hatte yannara insa lowo geeshsha dhagge assidhu;
52 dhagge assidhinohu Yesuusi timmatenni loosino maalale tiro huwattinokkihuraati; wodaninsa dillaawinohura xaano diwodanchitino.
53 Hakkiinni, baara tayisse saꞌe Gensereexi yinanni gobba daggu; yowolonsano hakko qooxeessira uurrisidhu.
54 Ikkollana yowolotenni dirritanni heedheenna mannu Yesuusa ikkinota afi.
55 Hatte yannara qachu baalunni dodante, dhiwantinore rerete dukke Yesuusi no yiniwa massitu.
56 Mannu, Yesuusi haꞌriwa baala qachuwate, katammatenna gaxarete dhiwantinore baala masse dikkote wori; insano uddanosi qacce calla kissara huuccidhusi. Kissinori baaluno dhibbinsanni hurtu.
Lekkaalliidi Qaagiishshuwa
^ Noo gedeenni tirriro, “Camo.”
^ Woy “wole uddano.”
^ Noo gedeenni tirriro, “lame uddano uddidhannokki gede.”
^ Woy “ledosi itanni noo mannira.”
^ Roomunnite birru saanteeti.
^ Tini yanna hashsha mite 9 saatenni kayisse 12 saate balla arrishsho fulta geeshsha
