Maarqoosi Wongeella 7:1-37
7 Hakkiinni Yerusaalametenni daggino Farisootinna mite seeru rosiisaano mulesi gamba yitu.
2 Insa Yesuusi rosaano giddo mitu battaabbino anganni yaano hayishshidhinokki anganni* sagale ittanna laꞌu.
3 (Farisootunna Ayihudootu baalu albi manni woga seekkite harunsitanno daafira, anga cigilete geeshsha hayishshidhukkinni sagale diꞌꞌittanno;
4 dikkote higganno woyiteno hayishshidhukkinni diꞌꞌittanno. Qoleno insara albi manniwiinni adhite seekkite harunsitannoti lowo woga noonsa; lawishshaho insa finiincho, maaqqenna camotenni seekkinoonni uduunne wayi giddo cuuꞌanno.)
5 Hakko daafira kuri Farisootinna seeru rosiisaano togo yite xaꞌmitusi: “Rosaanokki albi manni woga harunsa agurte sagale battaabbino anganni ittannohu mayiraati?”
6 Isino togo yiinsa: “Kiꞌne lawisiisaano, Isayyaasi kiꞌne daafira masaalinori garaho; togo yine borreessinoonni: ‘Kuni manni suumensanni ayirrisannoe; wodaninsa kayinni anewiinni lowo geeshsha xeertiꞌrino.
7 Mannu wodho rosiissannore ikkitino daafira, ane magansiꞌransa mulla haafaho.’
8 Maganu hajajo agurtine mannu woga seekkitine harunsitinanni.”
9 Ledeno togo yiinsa: “Kiꞌne wogaꞌne agadhate yitine Maganu hajajo diigate fullakkinoonnireeti.
10 Lawishshaho, Muse ‘Annakkinna amakki ayirrisi’ hattono ‘Annasi woy amasi xonannoha* shinona’ yiino.
11 Kiꞌne kayinni, ‘Mittu manchi annisira woy amasira “Kiꞌne kaaꞌleemmokki gede nooeri baalu qurbaanete (Maganoho uyinoonni kakkalo yaate)” yiiro,’
12 hakkunni gedensaanni annisira woy amasira mittoreno assara difajjitinanni.
13 Wolootaho sayissinanni wogaꞌnenni Maganu qaale diigginanni. Woleno togooha lowo coye assitinanni.”
14 Hakkiinni manna galagale isiwa woshshe togo yiinsa: “Baalunku ani coyiꞌreemmore macciishshe; macciishshitinannireno wodanche.
15 Gobbayidinni giddora eꞌꞌe mancho batteessara dandaannohu mittu coyino dino; mancho batteessannohu giddosinni fulannoreeti.”
16 * ——
17 Hakkiinni mannuwiinni baxxe minira eita rosaanosi lawishshu tiro xaꞌmitusi.
18 Isino togo yiinsa: “Kiꞌneno insa gede xaano dihuwattinoonni? Gobbayidinni giddora eꞌꞌe mancho batteessara dandaannori mitturino nookkita diaffinoonni?
19 Korkaatuno eannohu wodanisi giddora ikkikkinni godowisi giddoraati; hakkiinni fule bale eanno.” Konni garinni sagale baala battaabbinokkita xawise kuli.
20 Isi lede togo yii: “Mancho batteessannohu giddosinni fulannoreeti.
21 Lawishshaho, wodanu giddonni busha hedo: foorre,* mooru, shoo,
22 soorro, hafuurre, bunshe, doga, mancaꞌꞌa ikkito,* dhiibbe, xono, booꞌnanna gowwimma fultanno.
23 Kuni baalunku bushu coyi wodanu giddonni fule mancho batteessanno.”
24 Yesuusi hakkiinni kae Xiroosinna Sidooni qoqqowo haꞌri. Hakkiicho mittu minira ei; mittu manchino isi hakkiicho noota afara dihasiꞌrino; ikkollana isi noowa mannu afi.
25 Bayichonko shiima qaaqqose battete ayyaani amadinoti mitte mancho isi daafira macciishshite, dagge lekkasira ubbu.
26 Tini mancho Giriikittete; ise Siirofinqete daga mereero heedhannote;* ise qaaqqose amaddino agaaninte fushshannose gede wotto wortusi.
27 Yesuusi kayinni togo yiise: “Oosote sagale haaꞌne woshshu buttuliꞌra tuga gara ikkitinokki daafira, balaxxe ooso duubbona.”
28 Ise kayinni togo yite qoltusi: “Mootichaꞌya hattee woyite halaaleho; ikkollana woshshu buttuꞌlino ooso ittanna giggilinoha xinqiꞌre itannowe.”
29 Hatte yannara isi, “Hatto yootta daafira, qaaqqokki amaddino agaaninte fultinona haꞌri” yiise.
30 Konnira ise qaese higgu woyite, qaaqqose agaaninte fulteenna maꞌna goxxe noota affu.
31 Yesuusi Xiroosi qoqqowinni higiti, Sidoona widoonni hige Dikaapolisi* qoqqowo sae Galiilu Baara haꞌri.
32 Hakkiicho mitto macciweelonna babbicha mancho haadhe isiwa abbite, anga aanasi woranno gede huuccidhusi.
33 Isino konne mancho mannuwiinni bade qacce fushshi. Hakkiinni qubbesi lamente manchu maccara wore, anjicho tufihu gedensaanni, arrawosi amammadi.
34 Iima hige laꞌꞌanni lowo geeshsha foolihu gedensaanni, “Efaata” yiisi; hatto yaa “Faꞌnami” yaate.
35 Hakkawoyintenni maccasi faꞌnantu; babbano agure taashshe coyiꞌrannoha ikki.
36 Konne coye mittohono kultannokki gede hajajinsa; insa kayinni hige hige hajajinonsata agurte ledde ledde dudubbu.
37 Lowo geeshsha dhagge assidhino daafira togo yitu: “Assinori baalu danchaho. Wole agurina isi macciweelootu macciishshitanno gede, danqootu coyidhanno gede assanno.”
Lekkaalliidi Qaagiishshuwa
^ Ayihudete ammaꞌno woga garinni hayishshiꞌra hooga leellishshanno.
^ Woy “diqatannoha.”
^ Tini kiiro mite Qullaawu Maxaafi tirora nooha ikkirono, angatenni galchinoonnite hundite qara qara Giriikete Afii borrora dinoote.
^ Giriikete Afiinni, poorniya.
^ Woy “saalimale ikkito.”
^ Noo gedeenni tirriro, “Siirofinqittete.” Finqe gobbara ilantinota ikkitukki digattino.
^ Woy “Tonne Katamma Qoqqowo.”
