Maarqoosi Wongeella 8:1-38
8 Hatte yannara, galagale lowo manni Yesuusiwa gamba yii; insara ittannori dinonsa. Konnira Yesuusi rosaanosi woshshe togo yiinsa:
2 “Kuni manni ane ledo sase barra keeshshinohuranna itannori noonsakki daafira mararsinoe.
3 Hudiꞌre* heeꞌreenna qaensa haꞌrisummoro, doogo shaqqe uwanno; qoleno insa giddo mitu xeertotenni dagginoreeti.”
4 Rosaanosi kayinni togo yite qoltusi: “Kowiicho baddowa kageeshshi manna duushshitanno daabbo mamiinni abbineemmo?”
5 Hatte yannara isi, “Meꞌꞌe daabbo nooꞌne?” yee xaꞌminsa. Insano, “Lamala” yitu.
6 Isino manna uulla ofollanno gede hajaji. Hakkiinni lamalanta daabbo haaꞌre Magano galatihu gedensaanni, tuqissanno gede hiiqqaqqe rosaanosira uyi; insano mannaho tuqissu.
7 Boode shiimmaadda qulxuꞌme noonsatano maassiꞌre kae, mannaho tuqissanno gede kulinsa.
8 Hakkiinni mannu ite duuweenna gatino giggilo lamala jajjabba gimboola woꞌma gamba assitu.
9 Hakkiicho noohu 4,000 meddi yaanno labballooti. Hakkunni gedensaanni isi manna haꞌrisi.
10 Hakkawoyintenni Yesuusi rosaanosi ledo yowolo gidde, Dalmanuuta yinanni qoqqowo dayi.
11 Hakkiicho Farisootu dagge iso jiffe laꞌasira yite, iiminni malaate leellishannonsa gede xaꞌmidhanni isi ledo heewisantu.
12 Yesuusi tennera lowo geeshsha xissiisiꞌre foole tuge foolihu gedensaanni togo yii: “Tini ilama malaate hasidhannohu mayiraati? Halaale yeemmoꞌnena, tenne ilamara horonta malaate dileellinshanni.”
13 Hakkiinni insa agure haꞌre, galagale yowolo gidde baara widoonni sai.
14 Ikkollana insa habbe daabbo adhitukki hadhino daafira, yowolote giddo mitte daabbicho agurranna woluri dinonsa.
15 Yesuusino, “Farisootunna Heeroodiisi irsho qorophe” yee xawise kulinsa.
16 Insano daabbo adhitinokki daafira, insa insanaawa heewisantu.
17 Yesuusino tenne afe togo yiinsa: “Daabbo adhitinoonnikki daafira, heewisantinannihu mayiraati? Xaano coyi dileellinoꞌne? Dihuwattinoonni? Wodaniꞌne xaano dillaawe wodancha hoogella no?
18 ‘Ille heedheennaꞌne dilaꞌinanni? Macca heedheennaꞌne dimacciishshitinanni?’ Qulli diyaannoꞌne?
19 Onte daabbonni 5,000 labballo itisummo woyite, gatino giggilo meꞌꞌe gimboola woꞌmalla gamba assitini?” Insano, “Tonaalame” yitusi.
20 “Lamala daabbonni 4,000 labballo itisummo woyite, gatino giggilo meꞌꞌe jajjabba gimboola woꞌmalla kayissini?” Insano, “Lamala” yitusi.
21 Isino, “Xaano dihuwattinoonniyya?” yiinsa.
22 Hakkiinni Beetesaayida daggu. Hakkiicho mannu mitto ille ballino mancho isiwa haaꞌre daye, hursannosi gede huucciꞌri.
23 Yesuusino, ille ballino mancho anga amade haaꞌre qachu gobbaanni fushshi. Isi, manchu illera anjicho xuꞌi yiihu gedensaanni, angasi aanaho wore “Leellannoheri no?” yee xaꞌmisi.
24 Manchuno gotti yee lae, “Mannu leellannoe; ikkollana haꞌrantanni noo haqqe lawanno” yii.
25 Yesuusi xaano angasi manchu ille aana wori; manchuno xunse lai. Illesi faꞌniteenna baalankare lae bada dandii.
26 Konnira Yesuusi mancho, “Qacha martooti” yee minisira haꞌrisi.
27 Yesuusinna rosaanosi Filiphoosi Qiisaariya yinanni qachuwa hadhu; hadhanni doogote heedheenna isi rosaanosi, “Mannu ane ayeti yaannoe?” yee xaꞌminsa.
28 Insano “Mitu Cuuaancho Yohaannisiiti, mitu Eeliyaasiiti, wolootu kayinni masaalaanote giddonni mittoho yaannohe” yitusi.
29 Hakkiinni isi, “Kiꞌne ane ayeti yitinannieyya?” yee xaꞌminsa. Pheexiroosino, “Ati Kiristoosiiti” yee qolisi.
30 Hatte yannara Yesuusi isi ayimma daafira mittohono kultannokki gede seekke hajajinsa.
31 Qoleno manchi Beetti lowo qarra adhasi, hattono cimeeyyete, kakkalaanote roorrootinna seeru rosiisaano albaanni mishamasi, qoleno reyasinna sasu barri gedensaanni kaꞌꞌasi gattannokkita rosiisinsa.
32 Isi konne coye xawise kulinsa. Pheexiroosi kayinni, iso bade qacce fushshe seejjisi.
33 Hatte yannara Yesuusi rosaanosi caaqqi yee lae Pheexiroosi, “Sheexaane, muliꞌyanni hoꞌli! Ati mannu hedo ikkinnina Maganu hedo dihedatto” yee ufisi.
34 Hakkiinni Yesuusi manna rosaanosi ledo isiwa woshshe togo yiinsa: “Hoodeꞌya haꞌra hasiꞌrannohu aye manchino umosi kaado; qarru haqqasi duqqe agurikkinni hoodeꞌya dayo.
35 Heeshshosi* gatisiꞌra hasiꞌrannohu baalu huꞌnanno; aneranna danchu duduwira yee heeshshosi* huꞌnannohu baalu kayinni gatisiꞌranno.
36 Qoleno mittu manchi alame woꞌma isita assiꞌre, heeshshosi huꞌniro kayinni maa kaaꞌlitannosi?
37 Woy mittu manchi heeshshosi* gatisiꞌrate maa aa dandaanno?
38 Tenne fooranna* cubbaataame ilama giddo anenna qaaleꞌya fokkannoha baala, manchi Beettino Annisi ayirrinyinni qullaawa sokkaasine ledo daanno woyite fokkannosi.”
Lekkaalliidi Qaagiishshuwa
^ Woy “qatume.”
^ Woy “lubbosi.”
^ Woy “lubbosi.”
^ Woy “lubbosi.”
^ Woy “ammanantinokkinna.”
