Maatewoosi Wongeella 10:1-42
10 Yesuusi 12 rosaanosi isiwa woshshe, battete ayyaanna hajajjanno gede roorre uyinsa; hatto assinohu, battete ayyaanna fushshitanno gedeetinna baalunku gari dhibbanna xisso hursitanno gedeeti.
2 Tonaalamente soqqamaasine suˈmi aane nooho: Pheexiroosi yinihu Simooninna rodiisi Indiriyaasi; Zebidewoosi beetti Yaaqoobinna rodiisi Yohaannisi;
3 Filiphoosinna Bertelemewoosi; Toomaasinna qaraxaasinchu Maatewoosi; Ilfiyoosi beetti Yaaqoobinna Taadewoosi;
4 Laalaataanchu* Simooninna gedensoonni Yesuusa sayise uyihu Asqorootu Yihuda.
5 Yesuusi kuri 12 soqqamaasinesi togo yee hajaje soyinsa: “Daganniwa martinoonte; mittono Samaariyu katama hadhinoonte;
6 hatteentenni, Israeelete mine baino geˈreewiwa calla hadhe.
7 Martinanni woyite, ‘Gordu Gashshooti gambisino’ yitinanni dudubbe.
8 Dhiwantinore hurse, reyitinore kayisse, dhiigu amadinore hurse, agaaninte fushshe. Mulla adhitinoonnire mulla uuyye.
9 Qoraho culka woy birra woy camo wodhitinoonte;
10 hadhinanni woyite sinqe woy layinki uddano* woy layinki caamma woy layinki siqqicho adhitinoonte; loosannohura sagale hasiissannosina.
11 “Martinanni katami woy qachi baalunkura, sokkaˈne macciishshate malino mancho hasse; hakkiinni fultine hadhina geeshsha isiwa keeshshe.
12 Minira eˈinanni woyite mini manna keere haadhe.
13 Insa danchu garinni haadhuˈnero keeriˈne iillonsa; danchu garinni haaˈra gibbuˈnero kayinni keeriˈne kiˈnewa higo.
14 Mittu manchino kiˈne haaˈra woy yitinannire macciishsha giwiro, hakko mininni woy kataminni fultine hadhinanni woyite lekkaˈne buko gangaˈne.*
15 Halaale yeemmoˈnena, Yoote Barra hakko katamira Soddoomunna Gomooru kataminni roore kaajjado yoo yinanni.
16 “Kuneeti hiyyeeyyete mereero noo geˈreewi gede asse soyeemmoˈne; konnira, hamashshu gede busulla, lembooli gede jooguulle ikke.
17 Mannu yoote minira sayise aannoˈne; xaadu minnansarano halangetenni ganannoˈne; hakko daafira insa qorophe.
18 Qoleno ane daafira yitineenna gashshaanotenna mootoollate albira shiqishshannoˈne; hakkiicho insarano dagateno farcidhinanni.
19 Ikkollana sayisse uyitannoˈne woyite ma garinni coyiˈneemmo woy maa coyiˈneemmo yitine yaaddinoonte; coyidhinannire hatte saatera kullanniˈnena;
20 kiˈne widoonni coyiˈrannohu Anniˈne ayyaanaati ikkinnina, coyidhinanniri kiˈne calla diˈˈikkitinoonni.
21 Qoleno roduu rodoosi, annu beettosi reyote sayise aanno; ooso anninsaranna amansara finqiltanno, hattono shiishiishshannonsa.
22 Suˈmiˈyara yitineenna mannu baalu giwannoˈne; goofimarchu geeshsha kaajje uurrinohu* kayinni gatanno.
23 Mittu katamira waadduˈnero wole katama xooqqe; halaale kuleemmoˈnena, manchi Beetti daa geeshsha Israeelete katammanna qachuwa hadhine horo diguddinanni.
24 “Rosaanchu rosiisaanchosi, borojjichuno mootichasi dirooranno.
25 Rosaanchu rosiisaanchisi gede, borojjichuno mootichisi gede ikkiro ikkannosi. Mannu minu anna Beˈˈeelzebuuli* yiiro, minisi manna isinni hakkiinni sainore diyaanno?
26 Hakko daafira insa waajjitinoonte; korkaatuno diwaminori baalu faˈnamasi digattanno; fojo ikkinori baaluno xawo fulasi digattanno.
27 Ani tunsote kuleemmoˈnere kiˈne xawaabbaho coyidhe; hashaanshe kulloonniˈnere minu guunxo fultine lallabbe.
28 Maala shitannore, lubbo* kayinni shaa dandiitannokkire waajjitinoonte; hatteentenni, lubbono maalano Gaannaamete* huna dandaannoha waajje.
29 Lame gurrae hirrannihu mitte saantera* diˈˈikkino? Ikkirono, insa giddonni mitte nafa Anniˈne afikki uulla diubbanno.
30 Kiˈnehu umiˈne dananchi baalu nafa kiirreenna nooho.
31 Konnira waajjitinoonte; kiˈne lowo gurrae roortinannina.
32 “Mannu albaanni rosaanchoˈya ikkinota coyiˈrannohura baalaho, anino iima heeˈranno Anniˈya albaanni isi rosaanchoˈya ikkinota coyiˈreemmo.
33 Mannu albaanni kaadannoeha kayinni, anino iima heeˈranno Anniˈya albaanni kaadeemmosi.
34 Uullate aanira keere haaˈre dawoommoha lawoonkeˈne; dawoommohu bise abbammoraati ikkinnina keere abbammora diˈˈikkino.
35 Ani dawoommohu labbaa beetto annisiwiinni, meya beetto amasewiinni, beettu beettono ballosewiinni badammoraati.
36 Manchoho minisi manni diina ikkannosi.
37 Anenni roorse annasi woy amasi baxannohu baalu aneha ikka didandaanno; qoleno anenni roorse labbaa beettosi woy meya beettosi baxannohu baalu aneha ikka didandaanno.
38 Qarru haqqasi duqqa hasiˈrannokkihunna hoodeˈya haˈrannokkihu baaluno aneha ikka didandaanno.
39 Lubbosi* gatisiˈrate woˈnaalannohu baalu huˈnanno; ane daafira yee lubbosi* hunannohu baalu kayinni wirro afiˈranno.
40 “Kiˈne haaˈrannohu baalu ane haaˈrannoho; ane haaˈrannohu baalu qole Soyinoeha haaˈranno.
41 Mitto masaalaancho, masaalaancho ikkino daafira haaˈranno manchi masaalaanchu afiˈranno baˈraaˈra afiˈranno; keeraancho mancho keeraanchimmasinni haaˈrannohuno keeraanchu manchi afiˈranno baˈraaˈra afiˈranno.
42 Halaale kuleemmoˈnena, kuri shiimmaaddu giddonni mittoho ane rosaancho ikkino daafira mitte birciqqo qiidino waa aannohu baalu, baˈraaˈra adhikkinni horo digatanno.”
Lekkaalliidi Qaagiishshuwa
^ Woy “Qenenaawichu.”
^ Woy “wole uddano.”
^ Lekkatenni buko gangaˈna, xaate halaale gudoommo yaate gedeeti.
^ Woy “kaajje uurrannohu.”
^ Agaanintete roorricha woy gashshaancho ikkinoha Sheexaane suˈminoonni suˈmaati.
^ Woy “heeshsho”; albillittete heeshsho hexxooti.
^ Yerusaalamete gobbaanni ishine giirranni bayichooti.
^ Noo gedeenni tirriro, “mitte asaariyoonera.” Shiima waaga afidhino saanteeti.
^ Woy “heeshshosi.”
^ Woy “heeshshosi.”
