Maatewoosi Wongeella 12:1-50
-
Yesuusi “Sambatu Mootichaati” (1-8)
-
Anga laanshaawino manchi huri (9-14)
-
Maganu baxanno soqqamaancho (15-21)
-
Yesuusi qullaawu ayyaaninni agaaninte fushshi (22-30)
-
Gatona yinannikki cubbo (31, 32)
-
Haqqicho gumisenni bande anfanni (33-37)
-
Yoonaasi malaate (38-42)
-
Battete ayyaani galagale hige eanno woyite (43-45)
-
Yesuusi amanna roduuwa (46-50)
12 Hatte yannara Yesuusi Sambatunni gidu irshi giddoonni hige saˈˈanni no. Rosaanosino hudidhino daafira, shoye tattayisse ittu.
2 Farisootu tenne laˈe togo yitusi: “Lai rosaanokki Sambatunni seeru hoolinore assitanni no.”
3 Isino togo yiinsa: “Daawiti isinna ledosi noo manni hudiˈri woyite maa assinoro dinabbabbinoonni?
4 Isi Maganu minira eˈˈe, kakkalaano agurranna isino ledosi noorino ittara fajjinoonnikkiha qullaawa tima* diˈˈittino?
5 Woy kakkalaano Sambatunni qullaawu mini giddo loossanno woyite, Sambata ayirrisa hooggurono xaˈmantannokkita seeru giddo dinabbabbinoonni?
6 Ani kayinni kuleemmoˈnena, kowiicho noohu qullaawa mine rooreho.
7 Ikkollana, ‘Ani hasiˈreemmoti maarote ikkinnina kakkalo diˈˈikkitino’ yaa mayyaatero huwattinoonniha ikkoommero, huninori nookki manna busha diassitinanni.
8 Korkaatuno manchi Beetti Sambatu Mootichaati.”
9 Yesuusi hakkiinni haˈrihu gedensaanni xaadu mininsara ei;
10 hakkiicho mittu anga laanshaawino manchi no; insa Yesuusa busha assitanno faro hasidhanni, “Sambatunni hursa seeru fajjino?” yite xaˈmitusi.
11 Isino togo yiinsa: “Kiˈne giddo mitte geˈrecho noosi manchi geˈrechosi Sambatu barra balete giddo ubburo hakkiinni goshooshe fushshannokkihu nooni?
12 Ikkina mannu geˈrecho lowo geeshsha dirooranno? Hakko daafira Sambatunni dancha looso loosa fajjinoonni.”
13 Hakkiinni mancho, “Angakki diriirsi” yiisi. Manchuno angasi diriirsi; angasino hurte teˈee gede fayyo ikkitu.
14 Farisootu kayinni gobbara fulte, iso shitara gano gantu.
15 Yesuusino tenne afe hakkiinni agure haˈri. Lowo mannino hoodesi haˈri; isino dhiwantinore baala hursi;
16 ikkollana ayimmasi mittohono kultannokki gede qorowisiisinsa;
17 isi hatto assinohu masaalaanchu Isayyaasi widoonni togo yine coyiˈnoonniri woˈmanno gedeeti:
18 “Baxeemmohunna hagiirsiisannoehu* doodhoommo soqqamaanchiˈya kuneeti! Ayyaanaˈya isi aana dirriseemmo; isino taashsho maatiro dagate kulanno.
19 Isi digiwamanno, dicancanno, jajjabba dooggarano huurosi dimacciishshantanno.
20 Taashsho woˈmitanno gede assa geeshsha, cancanantino shomboqqo dihiiqqanno, xoara kaino heqichano dixoyissanno.
21 Ee, daga suˈmasi hexxitanno.”
22 Hakkunni gedensaanni mannu mitto agaaninte amaddinoha danqichanna ballicha mancho Yesuusiwa haaˈre abbi; isino hursisi; danqichu manchino coyiˈranna laˈˈa dandii.
23 Mannu baalu dhagge assiˈre: “Ayiddeˈya isi kuni Daawiti Beettootikka?” yii.
24 Farisootu tenne macciishshite, “Kuni manchi agaaninte fushshannohu agaanintete roorrichi Beˈˈeelizebuuli* wolqanniitilla” yitu.
25 Yesuusi giddonsata afe togo yiinsa: “Isi isiniiwa babbadamanno gashshooti baalu baˈˈanno; isi isiniiwa babbadamanno katami woy mini baaluno kaajje uurre diafanno.
26 Hatteente gede, Sheexaanu Sheexaane fushshannoha ikkiro isi isiniiwa babbadamino yaate; hatto ikkiro gashshootisi hiitto ikke kaajjanno?
27 Qoleno ani agaaninte fushsheemmohu Beˈˈeelizebuuli wolqanni ikkiro, oosoˈne* fushshitannohu aye wolqanniitiyya? Oosoˈne yoo yitannoˈnehu* iseraati.
28 Ani agaaninte fushsheemmohu Maganu ayyaaninni ikkiro kayinni, Maganu Gashshooti heddinikki kiˈnewa iillino yaate.
29 Mittu manchi balaxe wolqaataamo mancho usurikki hakko manchi minira eˈˈe jajjasi hiitto asse mulqiˈra dandaanno? Jajjasi mulqiˈra dandaannohu hatto assiro callaati.
30 Ane wido ikkannokkihu baalu giwannoeho; ane ledo gamba assannokkihu baalu qole fince hunanno.
31 “Konnira kuleemmoˈnena, mannaho loosanno cubbonna xonanno xono baala gatona yinanni; qullaawa ayyaana xonannoha kayinni gatona diyinanni.
32 Lawishshaho, manchi Beettira busha qaale coyiˈrannoha baala gatona yinanni; qullaawu ayyaanira busha qaale coyiˈrannoha baala kayinni tenne alamerano* daggannoterano gatona diyinanni.
33 “Haqqichoˈne dancha ikkituro dancha guma laaltanno; busha ikkituro kayinni busha guma laaltanno; korkaatuno haqqicho bande anfannihu gumisenniiti.
34 Kiˈne buutete ooso, bushuulle ikkitine heedhine dancha coye hiitto coyiˈra dandiitinanni? Korkaatuno afuu coyiˈrannohu wodanaho woˈminoreeti.
35 Danchu manchi cibbiˈrinohu danchu coyi giddonni danchare fushshanno; bushu manchi kayinni cibbiˈrinohu bushu coyi giddonni bushare fushshanno.
36 Halaale kuleemmoˈnena, mannu coyiˈrannohu mittu mittunku haafu qaalira Yoote Barra xaˈmamanno;
37 korkaatuno coyiˈrootto qaalinni keeraawatto, coyiˈrootto qaalinni cubbamatto.”
38 Hakkiinni seeru rosiisaanonna Farisootu giddo mitu, “Rosiisaancho, malaate leellishattonkera hasiˈneemmo” yitu.
39 Isino qole togo yiinsa: “Bushanna foora* ilama woˈmanka woyite malaate laˈˈa hasidhanno; ikkollana masaalaanchu Yoonaasi malaate agurranna wole malaate dileellinshanni.
40 Yoonaasi jawa qulxuˈmicho godowi giddo sase barranna sase hashsha keeshshinte gede, manchi Beettino waammate giddo sase barranna sase hashsha keeshshanno.
41 Nennewete manni Yoonaasi sabbakinore macciishshe maaro eino daafira, Yoote Barra tenne ilama ledo kae cubbishannonsa. Ikkollana kuneeti Yoonaasi rooru kowiicho no.
42 Wodiidi mootitte Salamooni hayyo macciishshitara baattote qaccenni kaˈe daggino daafira, Yoote Barra tenne ilama ledo kaˈe cubbishshannonsa; ikkollana kuneeti Salamooni rooru kowiicho no.
43 “Battete ayyaani mittu manchiwiinni fuliro fooliishshiˈrannowa hasiˈranni wayi nookki basera raataawanno; kayinni fooliishshiˈrannowa diafiˈranno.
44 Hakkiinni ‘Agure fulummo miniˈyawa higeemmo’ yaanno; higanno woyite, minu fano ikke, feyamamenna biife nooha afanno.
45 Hakkiinni haˈre isinni roore bushshinore wole lamala ayyaanna adhe daanno; insano eˈe hakko heedhanno; hakko manchiti gedensiidi heeshsho albitenni roore busha ikkitanno. Tenne busha ilamarano togoori iillannonsa.”
46 Isi mannaho coyiˈranni heeˈreenna, amasinna roduuwisi hasaawissasira hasidhe gobbaanni uurrite no.
47 Konnira mittu manchi, “Kune amakkinna roduuwikki hasaawisahera hasiˈre gobbaanni uurre no” yiisi.
48 Isino hakko manchira togo yee qoli: “Amaˈya ayeti? Roduuwiˈyano ayeooti?”
49 Hakkiinni angasi rosaanosi widira qole togo yii: “Amaˈyanna roduuwiˈya kuriiti.
50 Korkaatuno, iima heeˈranno Anniˈya fajjo wonshannohu baalu anera labbaa rodooˈyaati, meya rodooˈyaatinna amaˈyaati.”
Lekkaalliidi Qaagiishshuwa
^ Woy “Maganu albaanni shiqino tima.”
^ Woy “lubboˈya hagiidhitannohu.”
^ Sheexaane suˈminoonni suˈmaati.
^ Woy “harunsaanoˈne.”
^ Woy “sodhinoonnita kultannoˈnehu.”
^ Woy “konni dirirano.”
^ Woy “Maganoho ammanantinokki.”
