Maatewoosi Wongeella 13:1-58
-
MAGANU GASHSHOOTIRE KULTANNO LAWISHSHUWA (1-52)
-
Wixa wixanno mancho (1-9)
-
Yesuusi lawishshunni rosiisinohu mayiraati? (10-17)
-
Wixa wixanno manchi lawishshi tiro (18-23)
-
Sindenna boddoono (24-30)
-
Lenteetu gumanna irsho (31-33)
-
Lawishshunni coyiꞌrasi masaalo woꞌmitanno gede assitino (34, 35)
-
Sindetenna boddoonu lawishshi tiro (36-43)
-
Maanxoonni jironna dancha ayirrado uduunnicho (44-46)
-
Woshshaado (47-50)
-
Haaronna akkala uduunnicho (51, 52)
-
-
Gobbasi manni Yesuusa giwi (53-58)
13 Hakko barra Yesuusi mininni fule haˈre baaru qaccera ofolli.
2 Lowo mannino isiwa dayi; isino yowolo gidde ofolli; hakka woyite mannu baalu baaru qaccera uurre no.
3 Hakkiinni isi togo yee lowo coye lawishshunni kulinsa: “Mittu manchi wixa wixiˈrara fuli.
4 Wixanni heeˈreenna mitu wixi doogote qaccera uwi; hakkiinni cea dagge xinqite ittu.
5 Wolu wixi qole gari bushshi nookkiwa kinnaame baattora uwi; baatto lowo bushshi nookkita giddo tula ikkitino daafira wixu mulenni muri.
6 Arrishsho fultuta kayinni qoori; qoleno rumushsho afiˈrinokki daafira mooli.
7 Mitu wixi utu mereero uwi; utuno lophe qalxe amadi.
8 Wolu wixi kayinni danchu bushshira uwi; gumano laali; mittu 100, mittu 60, mittu 30 ero laali.
9 Macca noohu macciishsho.”
10 Hakkiinni rosaanosi dagge, “Lawishshunni kulattonsahu mayiraati?” yitusi.
11 Isino togo yee qoli: “Kiˈnera gordu Gashshootita qullaawa fojo huwatate dandoo uyinoonniˈne; insara kayinni diuyinoonninsa.
12 Noosihura baalaho lendannisi; woˈmeno duˈnamannosi; noosikkihura baalaho kayinni hakkonne noosinka haaˈne hoollanni.
13 Korkaatuno insa laˈurono laˈannohu mulla beebbaati; macciishshiturono macciishshitannohu mulla beebbaati; insa diwodanchitanno.
14 Qoleno togo yitannoti Isayyaasi masaalo insa aana woˈmitanni no: ‘Macciishshate woyite macciishshitinanni, kayinni horonta diwodanchitinanni; laˈˈate woyite laˈinanni, kayinni horonta dibuuxxinanni.
15 Korkaatuno kuni manni wodana dillaawino; maccansanni macciishshinore dune hunanno; illensano ximbiiˈlino; hatto ikka hoogoommero illensanni laˈe, maccansanni macciishshite, wodaninsannino wodanchite anewa higgeenna hurseemmonsahu baino.’
16 “Kiˈne kayinni, illeˈne laˈanno daafiranna maccaˈne macciishshitanno daafira hagiirraammaho.
17 Halaale yeemmoˈnena, batinye masaalaanonna keeraano kiˈne laˈinanni heedhinoonnire laˈˈate halchitino; kayinni dilaˈino; qoleno insa kiˈne macciishshitinanni heedhinoonnire macciishshate halchitino; kayinni dimacciishshitino.
18 “Xa wixa wixiˈri manchi lawishshi tiro maatiro macciishshe.
19 Mittu manchi gordu Gashshooti qaale macciishshe wodanchannokkiha ikkiro, bushu daye wodanisira winxoonni wixa hawulukanno; doogote qaccera winxoonni wixi konneeti.
20 Kinnaame baattora winxi wixi qaale macciishshe bayichonko hagiidhe adhanno manchooti.
21 Ikkollana qaalu wodanisira rumuxxannokki daafira, shiima yannalla keeshshanno; qaalunni kainohunni qarru woy dartu iillannosi woyite bayichonko gufiˈranno.
22 Utu mereero winxi wixi qaale macciishshanno manchooti; ikkollana tenne alame* yaaddonna jironniti dogate wolqa qaale qalxite amaddanno daafira gumiweele gatanno.
23 Danchu bushshira winxi wixi qaale macciishshe wodanchanno manchooti; gumano laalanno; mittu 100, mittu 60, mittu 30 ero laalanno.”
24 Hakkiinni isi togo yee wole lawishsha kulinsa: “Gordu Gashshooti gatesi dancha wixa wixiˈrino manchi gedeeti.
25 Mannu goxe heeˈreenna diinisi daye sindete giddo boddoono wixe haˈri.
26 Sinde lophite laaltuta boddoonuno leelli.
27 Konnira qaete anni borojjooti isiwa dagge togo yitusi: ‘Mooticha, gatekki didancha wixalla wixiˈritto? Boddoonu mamiinni dayiho?’
28 Isino ‘Diinu assinote’ yiinsa. Borojjootuno ‘Haˈne xinqine hoollammora hasiˈratto?’ yitusi.
29 Isino togo yiinsa: ‘Deeˈni, boddoono xinqitinanni woyite sindeno ledo buqqissinanni yee waajjoommona heeˈrona agurre.
30 Mindanni yanna iillita geeshsha ledo lophona; midote yannara middannorira togo yee kuleemmonsa: Balaxxine, giirranni gede boddoono xinqitine gamba assitine nadala nadala assitine usurre; hakkiinni sinde gamba assitine gootaariˈyara worre.’”
31 Qoleno isi togo yee wole lawishsha kulinsa: “Gordu Gashshooti mittu manchi masse gatesi wixiˈrinohu lenteetu* gumi gedeeti.
32 Lenteetu gumi baalunku guminni roore shiima ikkirono, lophanno woyite akaakilte baala roore haqqicho ikkanno; hakko daafira iimi cea dagge sinnasi aana caaˈlitanno.”
33 Isi xaano togo yee wole lawishsha kulinsa: “Gordu Gashshooti mitte mancho lixe gudisante fulta geeshsha sase jajjabba safaraancho ikkitanno bullee ledo karsiissino irsho gedeeti.”
34 Yesuusi gamba yiino mannira konne baalanka coye lawishshunni kulinsa. Isinni, lawishshiweelo dikulannonsa;
35 isi hatto assinohu masaalaanchu widoonni togo yine coyiˈnoonniri woˈmanno gedeeti: “Coyiˈreemmore lawishshunni coyiˈreemmo; safotenni* kayise dahaawinore duduweemmo.”
36 Hakkiinni Yesuusi gamba yiino manna haˈrisihu gedensaanni minira ei. Rosaanosino isiwa dagge, “Gate fulino boddooni lawishsha xawisinke” yitu.
37 Isino qole togo yii: “Dancha wixa wixihu manchi Beettooti;
38 gatu alamete. Danchu wixi gordu Gashshooti oosooti; boddoonu kayinni bushu oosooti;
39 boddoono wixi diini Daawuloosiiti. Mido alamete* gumulooti; middannori sokkaasinete.
40 Hakko daafira, boddoono gamba assine giirate tunganninte gede, alamete* gumulorano hatto ikkanno.
41 Manchi Beetti sokkaasinesi soyanno; insa guficho ikkanno coye baalanna bunshe assanno manna Gashshootisi giddonni xinqite fushshitanno;
42 qoleno goolu giirara tugganno; insano hakkiicho wiˈlitanno; hattono hinko gaˈmidhanno.
43 Hatte yannara keeraano Anninsa Gashshootira arrishshote gede waraˈa yite xabbanno. Macca noohu macciishsho.
44 “Gordu Gashshooti gate maanxoonni jiro gedeeti; mittu manchi tenne jiro afiˈre maaxi; isi lowo geeshsha hagiidhino daafira haˈre noosire baala hire hakkonne gate hidhi.
45 “Qoleno gordu Gashshooti dancha ayirrado uduunnicho* hidhara hasiˈrannohu haˈre daddaˈlanno daddalaanchi gedeeti.
46 Hakku daddalaanchi mitto lowo waaga afiˈrinoha ayirrado uduunnicho afiˈri yannara bayichonko haˈre afiˈrinore baala hire hakkonne uduunnicho hidhi.
47 “Qoleno gordu Gashshooti baaru giddora tungeenna duuchunku gari qulxuˈme amaddino woshshaado gedeeti.
48 Woshshaadote qulxuˈme woˈmituta goshooshshe baaru qacce fushshitu; hakkiinni ofolte dancha dancha xinqite uduunneho wortu; busha kayinni huntu.
49 Alamete* gumulorano hatto ikkanno. Sokkaasine fulte bushuulle keeraanotewiinni baddanno;
50 qoleno goolu giirara tugganno. Insano hakkiicho wiˈlitanno; hattono hinko gaˈmidhanno.”
51 Isi “Konne baalanka coye wodanchitinoonni?” yee xaˈminsa. Insano “Ee” yitusi.
52 Hakkiinni togo yiinsa: “Hatto ikkiro, gordu Gashshooti daafira rosinohu dagate rosiisaanchi baalu, miinju minisinni haaronna akkala uduunnicho fushshannohu minu anni gedeeti.”
53 Yesuusi tenne lawishshuwa coyiˈre kaiti hakkiinni agure haˈri.
54 Ilamino gobba higihu gedensaanni xaadu mininsara rosiisinsa; hakkiinni insa dhagge assidhe togo yitu: “Kuni manchi tenne hayyo mamiinni afiˈri? Maalale loosate dandoo aye uyisi?
55 Isi hanaaxichu beetto diˈˈikkino? Amasi Maariyaami diˈˈikkitino? Roduuwisino Yaaqoobi, Yooseefi, Simooninna Yihuda diˈˈikkitino?
56 Meya roduuwisi baaluno dininke ledo heeˈranno? Isi tenne baala dandoo mamii afiˈriyya?”
57 Hakko daafira isinni kainohunni gufidhu. Yesuusi kayinni togo yiinsa: “Masaalaanchu gobbasiranna minesi agurranna wolewa baalawa ayirranno.”
58 Insa ammana noonsakkire ikkitino daafira, hakkiicho lowo maalale diloosino.
Lekkaalliidi Qaagiishshuwa
^ Woy “konni diri.”
^ Woy “sanaafice.” Paalestiinu gobbara anfanniho hilicci gumaati. Lophite 4 meetire balla ikkitanno haqqichooti.
^ Woy “alamete safonni” yaano ikkara dandaanno.
^ Woy “diru.”
^ Woy “diru.”
^ Woy “inqu.”
^ Woy “diru.”
