Maatewoosi Wongeella 14:1-36
14 Hatte yannara Galiilu gashshaanchi Heeroodiisi Yesuusi duduwo macciishshe,
2 soqqamaanosira togo yii: “Kuni Cuuaancho Yohaannisiiti. Isi reyotenni kaino; tenne maalale loosa dandiinohu iseraati.”
3 Hakkuyira albaanni Heeroodiisi,* rodiisi Filiphoosi minaama Heeroodiyaadanni kainohunni Yohaannisi sansalatetenni usure usuru minira eessino.
4 Korkaatuno Yohaannisi duucha hige “Ise adhattora seeru difajjannohe” yiinosi.
5 Heeroodiisi iso shaa hasiˈrinoha ikkirono, mannu Yohaannisi masaalaanchu gede asse laˈˈanno daafira insa waajjino.
6 Ikkollana Heeroodiisi ilamino barra ayirrinsanni heeˈneenna Heeroodiyaada beetto mannu albaanni sirbitanni Heeroodiisi lowo geeshsha hagiirsiissu;
7 hakko daafira xaˈmidhure baala aasera xaari.
8 Iseno amase kultinose garinni, “Tenne sayinera worte Cuuaanchu Yohaannisi umo uyie” yitu.
9 Moote dadillinoha ikkirono, xaarino xaaroranna ledosi itanni noo mannira yee Yohaannisi umo uyinannise gede hajaji.
10 Hakko daafira usuru minira manna soye Yohaannisi umo mursiisi.
11 Umo sayinete worte abbite beettote uyitu; beettono amasera massitu.
12 Gedensoonni Yohaannisi rosaano dagge reeshsha haadhe massite madaartu; hakkiinni dagge Yesuusira kultu.
13 Yesuusi tenne macciishshiti callisi heeˈra hasiˈre, yowolo gidde hakkiinni agure baddowa haˈri; ikkollana mannu tenne macciishshe katammatenni fule iso faana gananni lekkatenni haˈri.
14 Yesuusi baaru qacce dayiti, lowo manna lae mararinsa; abbidhinoha dhiwamino mannano hursi.
15 Rosaanosi kayinni hashshita isiwa shiqqe togo yitu: “Heeˈnoommohu baddowaati; yannano hashshitino; hakko daafira qacha haˈre sagale hidhanno gede manna haˈrisi.”
16 Yesuusi kayinni “Haˈra dihasiissannonsa; ittannore kiˈne uyiyyensa” yiinsa.
17 Insano “Onte timanna lame qulxuˈmicho agurranna noonkeri dinowe” yitusi.
18 Isino “Hakkonne noore anewa abbe” yii.
19 Mannuno hayissote ofollanno gede hajaji. Hakkiinni ontenka timanna lamenta qulxuˈmicho haaˈre iima hige laˈˈanni maassiˈri; timma hiiqqaqqe rosaanosira uyi; rosaanosino mannaho iillishshu.
20 Baalunku itte duubbu; ittanna gatino giggilo 12 gimboola gamba assitu.
21 Sagale itino manni meentonna qaaqquulle kiirrikkinni 5,000 labballo ikkanno.
22 Hakkiinni bayichonko Yesuusi manna haˈrisa geeshsha rosaanosi yowolo giddite iso balaxxe baara widoonni saˈanno gede kulinsa.
23 Manna haˈrisihu gedensaanni huuccatto assiˈrara callisi ilaala fuli. Hashshi woyite isi hakkiicho callisi no.
24 Hatte yannara yowolo moola baattowiinni lowo xibbe meetire* xeertidhe no; bubbe insawa higge bubbissanni noo daafira dambalu lowo geeshsha qarrisinsa.
25 Ikkollana hashsha shoolki agarera* Yesuusi baaru aana lekkatenni haˈranni insawa dayi.
26 Rosaanosi isi baaru aana lekkatenni haˈranna laˈe lowo geeshsha masse, “Ayiddeˈya kuuˈˈu daannorichi maati?”* yitu. Qoleno waajjite raartu.
27 Ikkollana Yesuusi bayichonko “Massinoonte! Aneetina waajjitinoonte” yiinsa.
28 Pheexiroosi qole, “Mooticha, ateetiro wayi aana haˈranni atewa dayemmo gede hajajie” yiisi.
29 Isino, “Amo” yii. Hakko daafira Pheexiroosi yowolotenni dirre wayi aana lekkatenni haˈranni Yesuusiwa hige mari.
30 Ikkollana bubbete wolqa lae waajji. Itamara rahiti, “Mooticha, gatisie!” yee raari.
31 Yesuusi bayichonko angasi diriirse amade togo yiisi: “Ati ammana xeˈinohehu, mayira huluullamitto?”
32 Yowolo giddituhu gedensaanni bubbe bubbisa agurtu.
33 Yowolote giddo noori, “Halaalinta ati Maganu Beettooti” yitanni ayirrinye uyitusi.*
34 Hakkiinni baara tayisse saˈe Gensereexi yinanni gobba daggu.
35 Hakko heeˈranno manni Yesuusa ikkinota afiti, qooxeessaho noo gobba baalate sokka soyi; mannuno dhiwantinore baala isiwa haaˈre abbi.
36 Dhiwantinori uddanosi qacce calla kissara huuccidhusi; kissinori baaluno dhibbinsanni woˈmunni woˈma hurtu.
Lekkaalliidi Qaagiishshuwa
^ Heeroodiisi Antiphaasiiti.
^ Noo gedeenni tirriro, “lowo istaadiyoone.” Mitte istaadiyoone 185 meetireeti.
^ Tini yanna hashsha mite 9 saatenni kayisse 12 saate balla arrishsho fulta geeshsha noote.
^ Woy “haaqiiˈnanni heeˈnoommonso?”
^ Woy “kumbuultusi.”
