Maatewoosi Wongeella 19:1-30
19 Yesuusi konne coye coyiˈre kaihu gedensaanni, Galiilunni kae Yordaanoosira widoonni noota Yihudu dannuwa dayi.
2 Lowo mannino hoodesi haˈri; isino hakkiicho dhiwantinore hursi.
3 Hakkiinni Farisootu isiwa dagge jiffe laˈasira yite togo yite xaˈmitu: “Mittu manchi kairira baalaho minaamasi fushshe haˈrisara seeru fajjanno?”
4 Isino togo yee qolinsa: “Kalaqaanchu umonni labbaahanna meyata asse kalaqinonsata dinabbabbinoonni?
5 Konni daafira manchu annasinna amasi agure minaamasi ledo quraanyamanno;* lamunku mitto maala ikkitanno.
6 Konnira, xaate insa mitto maalaati ikkinnina lame diˈˈikkino. Hakko daafira, Maganu waaxinore mittu manchino badoonke.”
7 Insano togo yitusi: “Ikkina Muse, fushshe haˈrisate woraqata oye haˈrisannose gede hajajinohu mayiraati?”
8 Isino togo yiinsa: “Muse minaamaˈne fushshitine haˈrissinara fajjinoˈnehu wodaniˈne kakkachinota laeeti ikkinnina umo hatto diˈˈikkino.
9 Ani kayinni yeemmoˈnena, foortukkinni* minaamasi fushshe haˈrise wole adhannohu baalu soorrannoho.”
10 Rosaanosino, “Minaanninna minaama coyi hatto ikkiro adhammikki heeˈra woyyate” yitusi.
11 Isino togo yiinsa: “Elto noonsare ikkituro ikkinnina, tini baalunku manni dandaannota diˈˈikkitino.
12 Korkaatuno, mureeyye ikkite ilantinori no; qoleno mannu qaare mureeyye assinori no; Gordu gashshootira yite insaneeto mureeyye assitinorino no. Konne coye adha dandaannohu heeˈriro adhona.”
13 Hakkiinni Yesuusi anga aanaho woransaranna* huuccansara shiimmaadda qaaqquulle isiwa abbitu; rosaanosi kayinni uffunsa.
14 Ikkollana Yesuusi togo yii: “Qaaqquulle agurre; anewa daggannota hooltinoonte; korkaatuno gordu Gashshooti insa gedee manniho.”
15 Isino angasi aanansa worihu* gedensaanni hakkiinni agure haˈri.
16 Hakkiinni mittu wedellichi isiwa daye, “Rosiisaancho, hegere heeshsho afiˈrate danchare maa assa hasiissannoe?” yiisi.
17 Isino togo yiisi: “Danchuri daafira ane mayira xaˈmattoe? Danchu Magano callaho. Hakko daafira, hegere heeshsho afiˈra hasiˈrittoro woˈmanka woyite Maganu hajajo agadhi.”
18 Wedellichuno, “Hiittenne hajajo?” yiisi. Yesuusino togo yii: “Shitooti, soorritooti, moortooti, kaphu naqaashshe ikkitooti,
19 annakkinna amakki ayirrisi, olliichokkino* umikki gede assite baxi.”
20 Wedellichuno, “Tini hajajo baala wonanni agadhe noommote; ikkina xeinoeri maati?” yiisi.
21 Yesuusino togo yiisi: “Guuta* ikka hasiˈrittoro hadhe noohere hirte woxe buxanete uyi; iima jiro afiˈrattona; hakkiinni dagge harunsie.”
22 Wedellichu konne coye macciishshiti, lowo jiro noosi daafira dadillanni haˈri.
23 Hakkiinni Yesuusi rosaanosira togo yiinsa: “Halaale yeemmoˈnena, dureessu manchira gordu Gashshoote ea lowo geeshsha qarra ikkitannosi.
24 Xaano lede kuleemmoˈnena, dureessu manchi Maganu Gashshoote eantenni gaalu marfete xullo giddoonni lulluqqa shottanno.”
25 Rosaanosi tenne macciishshite lowo geeshsha dhagge assidhe, “Hatto ikkiro aye gatannoyya?” yitu.
26 Yesuusi insa seekke laˈˈanni togo yiinsa: “Kuni mannaho didandaamannoreeti; Maganoho kayinni baalunku coyi dandaamanno.”
27 Hakkiinni Pheexiroosi qole togo yii: “Kuneeti ninke baalankare agurre hoodekki haˈnanni heeˈnoommo; ikkina afiˈneemmori maatiyya?”
28 Yesuusino togo yiinsa: “Halaale yeemmoˈnena, baalunku coyi haarooˈmanno yannara,* manchi Beetti ayirrado zuufaanesira ofollanno woyite kiˈne ane harunsitinoonniri 12 zuufaanera ofoltine 12nte Israeelete gaˈrera yoo yitinanni.
29 Qoleno ane suˈmira yee minna woy labballo roduuwa woy meya roduuwa woy anna woy ama woy ooso woy baatto agurinohu baalu xibbe ero adhanno; hegere heeshshono ragiˈranno.
30 “Ikkollana lowohu albiidi manni gedensiidiha, gedensiidihu kayinni albiidiha ikkanno.
Lekkaalliidi Qaagiishshuwa
^ Noo gedeenni tirriro, “qaˈmiˈranno.”
^ Giriikete Afiinni, poorniya.
^ Woy “maassiˈransaranna.”
^ Woy “maassiˈrinsahu.”
^ “Olliicho” yine tirroonnihu Giriikete Afii qaali, qachu manna calla ikkikkinni manna baala xawisannoha ikkara dandaanno.
^ Woy “woˈma.”
^ Woy “galagale kalaqamanno yannara.”
