Maatewoosi Wongeella 20:1-34
20 “Gordu Gashshooti woyinete irshasi loosanno manna hasiˈrara gute kae haˈrinohu gatu anni gedeeti.
2 Loosaasinete ledo barraho mitte diinaare* baatansara coyiˈrame insa woyinete irshasi soyi.
3 Sase saate balla haˈri woyiteno dikkote looso hooge uurre nooha wole manna afi;
4 hakkiinni isi, ‘Hunkiiˈne waaga baateemmoˈnena kiˈneno woyinete irshaˈya hadhine loosse’ yiinsa.
5 Insano hadhu. Xaano lee saatenna honse saate balla fule hatto assi.
6 Jeefote 11 saate balla fule uurre nooha wole manna afe togo yiinsa: ‘Barra woˈma kowiicho looso tirtine uurritinoonnihu mayiraati?’
7 Insano, ‘Loosiisiˈrannonkeha hoongeeti’ yite qoltu. Isino ‘Hakkawoyiteetiro kiˈneno woyinete irshaˈya hadhine loosse’ yiinsa.
8 “Hawarrita woyinete irshi anni loosiisanno mancho togo yii: ‘Loosaasine woshshite gedensoonni daggurinni hanaffe umo dagguri geeshsha hunkiinsa waaga baati.’
9 Looso 11 saatenni hanaffuri mittu mittunku dagge mitte mitte diinaare adhitu.
10 Looso umo hanaffuri woxe adhitara daggu woyite insara roorsine baantanninsaha lawinonsa; ikkollana insarano mitte mitte diinaarella baantoonni.
11 Insa woxe adhitu woyite woyinete irshi annira gunguntanni
12 togo yitu: ‘Kuri gedeˈnite dagguri mitte saate calla loossino; ati kayinni insa barra woˈma daafurranninna arrishshote giirammanni honsoommori ledo taashshootto!’
13 Ikkollana isi insa giddonni mitto togo yii: ‘Jaala, baddaloommoheri mitturino dino. Coyiˈrammoommohu mitte diinaare baatammohera diˈˈikkino?
14 Qeechakki adhite haˈri. Kuri gedeˈnite daggurirano atera uyummo geeshshiha aa hasiˈroommo.
15 Woxiˈyanni hasiˈroommore assa didandeemmo? Woy ani shaqqado ikkoommo daafira dhiibbifatoottoni?’*
16 Konni garinni, gedensiidiri albiidire, albiidiri kayinni gedensiidire ikkitanno.”
17 Yerusaalame hadhanni heedheenna Yesuusi 12 rosaanosi calla bade doogote togo yiinsa:
18 “Kuneeti Yerusaalame haˈnanni heeˈnoommo; manchi Beetto kakkalaanote roorrootinna seeru rosiisaano angara sayinse uyinanni. Insano shinannisi gede yoo yitanno;
19 qoleno dagate sayisse uyitannosi; insano qacifattannosi, halangetenni gantannosi, hattono haqqaho suttannosi; isino sayikki barra kaˈˈanno.”
20 Hakkiinni Zebidewoosi ooso ama oosose ledo Yesuusiwa shiqqi yite guluphite* mitto coye huuccidhu.
21 Isino “Ma hasiˈrootta?” yiise. Iseno “Tenne lamenta oosoˈya Gashshootikkira mittu qiniitekkiinni mittu gurakkiinni ofoltanno gede assie” yite qoltu.
22 Yesuusi togo yee qoli: “Huuccidhinannire diegentinoonni. Ani muli yannara ageemmo finiinchinni aga dandiitinanni?” Insano “Ee dandiineemmo” yitusi.
23 Isino togo yiinsa: “Agate woyite finiinchiˈyanni aga dandiitinanni; ikkollana qiniiteˈyaanninna guraˈyaanni ofollinanni gede asseemmohu ane diˈˈikkoommo; konni dargira ofoltannori Anniˈya doorinoreeti.”
24 Gattinori tonnu tenne macciishshituti kuri lamu roduuwira hanqitu.
25 Yesuusi kayinni isiwa woshshe togo yiinsa: “Dagate gashshaano manninsara mootooˈmitannota, roorrootinsano kadde gashshitannonsata affinoonni.
26 Kiˈne mereero kayinni hattoo coyi dihasiisanno; mereeroˈne rooriidiha ikka hasiˈrannohu baalu soqqamaanchoˈne ikka hasiissannosi;
27 mereeroˈne albiidiha ikka hasiˈrannohu baaluno borojjichoˈne ikka hasiissannosi.
28 Manchi Beettino dayinohu soqqamaranna heeshshosi* lowo mannira* wodo asse aaraati ikkinnina soqqammasira diˈˈikkino.”
29 Iyyaarko hadhanni heedheenna lowo manni hoodesi haˈri.
30 Hakkiinni doogote qaccera ofolte noori lamu ille ballitino mannooti Yesuusi hakkaanni hige saˈˈanni noota macciishshite, “Mooticha, Daawiti Beetto mararinke!”* yite raartu.
31 Ikkollana mannu sammi yitanno gede ufinsa; insa kayinni wonanni roorsite raartanni, “Mooticha, Daawiti Beetto mararinke!”* yitu.
32 Yesuusino uurre woshshinsahu gedensaanni, “Maa assammoˈnera hasidhinanni?” yiinsa.
33 Insano, “Mooticha, illenke faninke” yitusi.
34 Yesuusino marare illensa amammadi; hakkawoyintenni illensa faˈniteenna galagalte laˈu; insano hoodesi hadhu.
Lekkaalliidi Qaagiishshuwa
^ Roomunnite birru saanteeti.
^ Noo gedeenni tirriro, “illekki bushshu?”
^ Woy “kumbuulte.”
^ Woy “lubbosi.”
^ Woy “lowo manni darga.”
^ Woy “maarinke.”
^ Woy “maarinke.”
