Maatewoosi Wongeella 21:1-46
21 Yerusaalame iilla rakkutanna Ejedhete Ilaali aana noota Beetefaage iillituta Yesuusi lame rosaanosi soyi;
2 togo yiinsa: “Kooee laˈinanni qacha marre; hakkiicho martinanni heedhinenni usurantino harricho darmichose ledo affinannina tirtine anewa abbe.
3 Xaˈmannoˈnehu heeˈriro ‘Mootichu hasiˈrino daafiraati’ yiiyye. Hakkawoyite isi bayichonko soyanno.”
4 Kuni ikkinohu masaalaanchu togo yee coyiˈrinori woˈmanno gedeeti:
5 “Tsiyooni beetto togo yiiyye: ‘Kuneeti mootekki jooga ikke harricho gulufe, ee harrichote qaaqqo darmicho gulufe atewa daanno.’”
6 Rosaanosino hadhe Yesuusi hajajinonsa gede assitu.
7 Harrichonna darmichose haadhe abbitu; uddannansano harrete aana worteenna Yesuusi aanansa* ofolli.
8 Rooru manni uddannansa doogote kari; wolu manni kayinni haqqete sinna murmure doogote kari.
9 Qoleno, albasiinninna badhesiinni haˈranni noohu lowo manni togo yaanni qeexaaˈli: “Magano, Daawiti Beetto gatisattosi gede huucciˈneemmohe!* Yihowa suˈminni daannohu maassaminoho! Iima heeˈrattohu, gatisattosi gede huucciˈneemmohe!”
10 Yesuusi Yerusaalame iilli yannara katamu woˈmu, “Kuni ayeti?” yaanni hembeelami.
11 Mannuno, “Kuni Galiilu gobbanni Naazireetete kataminni dayinoho masaalaancho Yesuusaati” yii.
12 Yesuusi qullaawa mine eˈˈe qullaawu mini giddo hirtanninna hidhitanni noore baala fushshe shorri; woxe soorritannori xarapheeyyenna lemboola hirtannori wombarrano galche uullate gani.
13 Qoleno togo yiinsa: “Mineˈya ‘Huuccattote mineeti’ yinanni yine borreessinoonni; kiˈne kayinni mulqiˈraanote goda assitinoonni.”
14 Qullaawa mine heeˈreenna ballootunna naafootu isiwa daggu; isino hursinsa.
15 Kakkalaanote roorrootinna seeru rosiisaano isi assinoha dhagge ikkanno coyenna qaaqquullu qullaawu mini giddo “Daawiti Beetto gatisattosira huucciˈneemmohe” yite cancitanna laˈe hanqite
16 togo yitusi: “Kuri qaaqquulli yitannore macciishshitto?” Yesuusino togo yiinsa: “Ee macciishshoommo. ‘Oosotenna qaaqquullu afiira galata qixxeessootto’ yaannoha horonta dinabbabbinoonni?”
17 Hakkiinni insa hakko agure katamunni fule Biitaaniya haˈre hashsha hakko gali.
18 Soodo guto galagale katama higanni heeˈre hudiˈri.
19 Doogote balasete haqqicho lae hatte haqqichowa mari; ikkollana daro agurranna aanase mittoreno afinokki daafira togo yii: “Layinkita guma laaltooti ati.” Balasete haqqichono bayichonko mooltu.
20 Rosaanosi tenne laˈe dhagge assidhe, “Tini balasete haqqicho hiikkite anga aana mooltu?” yitu.
21 Yesuusi qole togo yiinsa: “Halaale yeemmoˈnena, ammana heedhuˈneronna huluullama hoogginiro ani tenne balasete haqqicho assummota assitinanniha calla ikkikkinni konne ilaala ‘Kawiinni kaˈe baaru giddo uwi’ yitiniro nafa yitinita ikkanno.
22 Ammana heedhuˈnero huuccidhinannire baala afidhinanni.”
23 Qullaawa mine eˈˈe rosiisanni heeˈreenna kakkalaanote roorrootinna cimeeyye isiwa dagge togo yitu: “Konne coye assattohu mayi silxaanenniiti? Tenne silxaane uyinohehu ayeti?”
24 Yesuusino qole togo yiinsa: “Anino mitto coye xaˈmeemmoˈne. Kultiniero anino konne coye asseemmohu mayi silxaanenniitiro kuleemmoˈne.
25 Yohaannisi manna cuuate silxaane afiˈrinohu gordunniitinso mannuwiinniiti?” Insa kayinni togo yitanni insa insanaawa hasaabbu: “Gordunniiti yinummoro ‘Iso mayira ammana gibbiniyya?’ yaannonke.
26 ‘Mannuwiinniiti’ yinummoro kayinni baalunku Yohaannisi masaalaanchu gede asse laˈˈanno daafira manna waajjinoommo.”
27 Konnira insa Yesuusira, “Dianfoommo” yite qoltu. Yesuusino “Anino konne coye asseemmohu mayi silxaanenniitiro dikuleemmoˈne” yiinsa.
28 “Kiˈnera ma lawannoˈne? Mittu manchira lame ooso noosi. Kuni manchi bayiru beettisiwa mare, ‘Beettoˈya techo hadhe woyinete irsha loosi’ yii.
29 Beettuno, ‘Dihaˈreemmo’ yee qoli; gedensoonni kayinni gaabbe woyinete irsha haˈri.
30 Maaˈniidi beettisiwano mare wona kuˈunnira yiita yii. Beettuno, ‘Maahoyye anna, haˈreemmona’ yii; kayinni dihaˈrino.
31 Lamunku giddo annisi fajjo assinohu hiikkonneeti?” Insano, “Bayiriidiho” yitu. Yesuusino togo yiinsa: “Halaale yeemmoˈnena, qaraxaasinenna foortannori Maganu Gashshoote ea balaxxannoˈne.
32 Korkaatuno, Yohaannisi keeraanchimmate doogo leellishaˈnera dayino; kiˈne kayinni diammantinoonnisi. Qaraxaasinenna foortannori kayinni ammantinosi; kiˈne tenne laˈinihu gedensaanni nafa gaabbitine diammantinoonnisi.
33 “Wole lawishshano macciishshe: Woyine kaasiˈrinohu mittu qaete anni no; isi hatte woyine gaangeesse huxxa huxxi; hakkiicho woyine huuncinanni darga ume qixxeessi; hattono agarranni shae seekki; hakkiinni gate loossannorira guto oye wole gobba haˈri.
34 Woyinete laalo gamba assinanni yanna iillituta, qeechasi abbitara borojjootasi gate loossannoriwa soyi.
35 Ikkollana gatu loosaasine borojjootasi amadde mitto gantu, mitto shitu, mitto kinnatenni awwaaltu.
36 Xaano isi kiiro albirinni roortannore wole borojjoota soyi; insa kayinni kurino albire assitu gede assitu.
37 Jeefote ‘Beettoˈya ayirrissanno’ yee iso insawa soyi.
38 Gatu loosaasine beettosi laˈuti insa insanaawa, ‘Ragiˈrannohu isooti. Amme shine raggesi adhinona!’ yitu.
39 Konnira iso amadde woyinete irshinni goshooshshe fushshite shitu.
40 Hakko daafira, woyinete irshi anni daanno woyite kuri gatu loosaasine ma assannoha lawannoˈne?”
41 Kakkalaanote roorrootinna cimeeyyeno togo yitusi: “Insa bushuulle ikkitinohura shee gudanno; hakkiinni woyinete irsha guma yanna yannante uyitannosirira wole loosaasinera guto aanno.”
42 Yesuusino togo yiinsa: “Qullaawa Borro giddo, ‘Mine mintannori mishshe agurtino kinchi, qara xaawate kincho ikkino. Kuni dhaawate kinchi dayinohu Yihowawiinniiti; illenkerano maalalete’ yaannoha horonta dinabbabbinoonni?
43 Gordu Gashshoote kiˈnewiinni haaˈne guma laaltanno dagara uyinanni yeemmoˈnehu iseraati.
44 Qoleno konni kinchi aana uwannohu lowo geeshsha madiˈranno. Kuni kinchi aanasi uwannohu baalu kayinni cancanamanno.”
45 Kakkalaanote roorrootinna Farisootu tenne lawishshuwa macciishshituta, coyiˈranni noohu insa daafira ikkinota affu.
46 Insa amaddasira* hasidhinoha ikkirono, manna waajjitu; korkaatuno mannu iso masaalaanchu gede asse laˈˈanno.
Lekkaalliidi Qaagiishshuwa
^ “Aanansa” yiniti uddanna ikkitukki digattino.
^ Giriikete Afiinni, Hosaina.
^ Woy “usurtasira.”
