Maatewoosi Wongeella 22:1-46
22 Yesuusi lede togo yee lawishshunni kulinsa:
2 “Gordu Gashshooti, beettisi sargera jila jilino moote gedeeti.
3 Isi sargete jilira koyisantinore woshshitara borojjootasi soyi; insa kayinni daa dihasidhino.
4 Isino galagale wole borojjootasi togo yee soyi: ‘Woshshamino mannira, “Kuneeti sagale qixxeessoommo; handaˈyanna coontino saadaˈya gorroommo; baaluri qixxaawino. Hakko daafira jilaho amme yiino” yiiyye.’
5 Insa kayinni woshshatto lashshi assite, mitu gatinsara, mitu daddalinsara hadhu;
6 wolootu kayinni borojjootasi amadde beebba assidhe shitu.
7 “Mooteno lowo geeshsha hanqe, olantosi soye shiture shee gudi; katammansano giiri.
8 Hakkiinni isi borojjootasi togo yii: ‘Jilu qixxaawino; woshshantinori kayinni tennera maltinore diˈˈikkitino.
9 Hakko daafira katama massitanno doogga fultine, affiniha baala jilaho woshshe.’
10 Konni garinni, borojjootu doogga fulte bushano danchano affu manna baala gamba assitu; woshshame dayino mannino jilu mine woˈmi.
11 “Moote wosina laˈˈara ei woyite, mitto sargete uddano uddiˈrinokki mancho afi.
12 Konnira iso, ‘Jaala, sargete uddano uddiˈrittokki hiitto ikkite eitto?’ yiisi. Manchohono yaannori baisi.
13 Hakkiinni moote soqqamaanosi togo yii: ‘Anganna lekka usurtine gobba tunsichoho fushshitine tugge. Hakkiicho wiˈlona, hinkono gaˈmiˈrona.’
14 “Woshshaminohu lowoho, dooraminohu kayinni shiimaho.”
15 Hakkiinni Farisootu hadhe coyiˈranno coyinni amaddasira maˈlitu.
16 Hakko daafira rosaanonsa Heeroodiisi manni ledo togo yite sokku: “Rosiisaancho, ati halaalaancho ikkoottota, Maganu doogo halaalunni rosiisattota, mannu naadahera yite mittoreno assattokkitanna manna aana laˈe mallaadattokkita anfoommo.
17 Hanni kulinke, atera maa lawannohe? Qeesaarira giwire aa hasiissannonso dihasiissanno?*
18 Yesuusi kayinni bunshensa afe togo yii: “Kiˈne lawisiisaano, mayira jiffinannie?
19 Hanni giwiru saante leellishsheˈˈe.” Insano mitte diinaare* abbitu.
20 Isino togo yiinsa: “Tenne saante aana noo misile ayete? Aanaho borreessinoonni suˈmino ayeho?”
21 Insano “Qeesaariho” yitu. Hakkiinni isi togo yiinsa: “Hatto ikkiro Qeesaariha Qeesaarira, Maganunniha kayinni Maganoho uuyye.”
22 Insa tenne macciishshituti dhagge assidhe iso hakko agurte hadhu.
23 Hakko barranni, reyiniro dikaˈnanni yitanno Saduqooti dagge iso togo yite xaˈmitusi:
24 ‘Rosiisaancho, Muse togo yiino: “Mittu manchi ooso ilikki reyiro, rodiisi minaamasi ragiˈre rodiisi sircho sayisa hasiissannosi.’
25 Ninkewa lamalu roduuwi no. Bayiriidihu seenne adhe ooso ilikkinni reyenna minaamasi rodiisi ragiˈri.
26 Layinkihuno sayikkihuno, lamalkihu geeshsha ise ragidhe ooso iltukki reyitu.
27 Insa baalu reyituhu gedensaanni manchono reyitu.
28 Ise baalunku adhitino daafira, reyotenni kaˈnanni woyite lamalunku giddo hiikkunnita ikkitanno?”
29 Yesuusi togo yee qolinsa: “Kiˈne Qullaawa Borrono Maganu wolqano affinoonnikki daafira sodhinoonni;
30 korkaatuno, reyotenni kaˈnanni woyite labballu diadhitanno, seennuno mine diassiˈranno; insa iimi sokkaasine gede ikkitanno.
31 Maganu reyotenni kaˈˈate daafira kiˈnera togo yee coyiˈrinore dinabbabbinoonni?
32 ‘Ani Abirihaami Maganooti, Yisaaqi Maganootinna Yaaqoobi Maganooti.’ Isi lubbote noori Maganooti ikkinnina reyitinori Magano diˈˈikkino.”
33 Mannu tenne macciishshiti rosiisino roso dhagge assiˈri.
34 Farisootu, Yesuusi Saduqoota haadhe coyidhannore hoogganno gede assinota macciishshituti, gamba yite daggu.
35 Insa giddonni mittu Seeru egennaami jife laˈˈasira togo yee xaˈmi:
36 “Rosiisaancho, Seeru giddo baalanta roore hajajo hiitteeti?”
37 Isino togo yiisi: “‘Maganokki Yihowa woˈmu wodanikkinni, woˈma lubbokkinninna woˈma hedokkinni* baxi.’
38 Baalanta roortannotinna umi hajajo tenneeti.
39 Tenne labbannoti layinki hajajo, ‘Olliichokki* umikki gede assite baxi’ yitannote.
40 Seerunna masaalaanote rosi baalu xintaminohu tenne lamente hajajo aanaati.”
41 Farisootu mitteenni gamba yite heedheenna Yesuusi togo yee xaˈminsa:
42 “Kiˈne Kiristoosi* daafira mayitinanni? Isi aye beettooti?” Insano, “Daawiti beettooti” yitusi.
43 Isino togo yee xaˈminsa: “Hatto ikkiro Daawiti qullaawu ayyaaninni iso hiitto ikke Mooticha yiiyya?
44 Korkaatuno Daawiti, “Yihowa Mootichiˈyara, ‘Diinnakki lekkakkira woroonni qolammo geeshsha qiniiteˈyaanni ofolli’ yiinosi yee coyiˈrino.”
45 Daawiti iso Mooticha yiina, Kiristoosi hiitto Daawiti beetto ikkannoyya?”
46 Isira mittoreno dawara dandiinohu dino; hakko barrinni kayise worbe iso xaˈmo xaˈminohuno dino.
Lekkaalliidi Qaagiishshuwa
^ Woy “garahonso digaraho?”
^ Roomunnite birru saanteeti.
^ Woy “surrekkinni.”
^ “Olliicho” yine tirroonnihu Giriikete Afii qaali, qachu manna calla ikkikkinni manna baala xawisannoha ikkara dandaanno.
^ Woy “Buuraminohu.”
