Maatewoosi Wongeella 23:1-39
23 Hakkunni gedensaanni Yesuusi gamba yiino manniranna rosaanosira togo yii:
2 “Seeru rosiisaanonna Farisootu umonsa moohisse Muse darga ofoltino.
3 Hakko daafira, kultannoˈnere baala asse; yitannore assitannokki daafira, insa assitannore kayinni assitinoonte.
4 Ayirranno duha usurte mannu qotira duhisiissanno; insa kayinni qubbichinsanni nafa kisa dihasidhanno.
5 Baalanka coye assitannohu mannu laˈˈansara yiteeti; lawishshaho insa quraama* gowisiisidhanno, hattono uddanonsa qacce seedisidhanno.
6 Jilu mine ayirrado darga ofolla, xaaddu minnara qole albaanni* ofolla baxxanno;
7 Gudumaaleho* mannu ayirrise keere haaˈransaranna Rosiisaancho* yine woshshinansara hasidhanno.
8 Rosiisaanchiˈne mitto ikkino daafira, kiˈne kayinni ‘Rosiisaancho’ yine woshshinoonkeˈne; kiˈne baalunku roduuwaho.
9 Qoleno Anniˈne mitto, isino gordoho nooha ikkino daafira uullate aana mittono anna yitine woshshitinoonte.
10 Massagaanchiˈne mitto, isino Kiristoosa ikkino daafira massagaancho yine woshshinoonkeˈne.
11 Isinni, mereeroˈne rooriidiha ikkinohu soqqamaanchoˈne ikka hasiissannosi.
12 Umosi gotti assannohu baalu shollanno; umosi heeshshi assannohu baalu kayinni ayirranno.
13 “Kiˈne lawisiisaano Seeru rosiisaanonna Farisootu, kiˈnera aanneˈe! Korkaatuno, mannu gordu Gashshoote eannokki gede waalcho cuffinanni; kiˈneno dieˈinanni, eˈara daggannoreno hooltinanni.
14 ——*
15 “Kiˈne lawisiisaano Seeru rosiisaanonna Farisootu, kiˈnera aanneˈe! Korkaatuno mitto mancho Ayihudete ammaˈno widira qoˈlate baarunna baattote aana doyitinanni; qoˈlitinihu gedensaanni kiˈnenni roore lame ero Gaannaame* eannoha assitinanni.
16 “Kiˈne ballootu massagaano, kiˈnera aanneˈe! ‘Mittu manchi qullaawu mininni xaariro qarru dino; qullaawu mini giddo noo culkinni xaariro kayinni xaarino xaaro wonsha hasiissannosi’ yitinanni.
17 Kiˈne ballootunna gowwootu! Culkunna culku qullaawanno gede assinohu qullaawu mini woyite hiikku rooranno?
18 Qoleno, ‘Mittu manchi kakkalote darginni xaariro qarru dino; kakkalote dargi aana noo kakkalonni xaariro kayinni xaarino xaaro wonsha hasiissannosi’ yitinanni.
19 Kiˈne ballootu! Kakkalotenna kakkalo qullaawa assinohu kakkalote dargi woyite hiikku rooranno?
20 Hakko daafira, kakkalote darginni xaarannohu baalu kakkalote darginninna aanasi noori baalunni xaaranni no;
21 qullaawu mininni xaarannohu baaluno, qullaawu mininni calla ikkikkinni qullaawa mine heeˈranno Maganinni xaaranni no;
22 qoleno, gordunni xaarannohu baalu Maganu zuufaanenninna tenne zuufaanera ofollinohunni xaaranni no.
23 “Kiˈne lawisiisaano seeru rosiisaanonna Farisootu, kiˈnera aanneˈe! Haˈnadunni,* malkatunninna* kemuunetenni* asaraate fushshitinanni; Seeru giddo nooha roore hasiisanno coye kayinni lashshi assitinanni; insano taashshote, maarotenna ammanamate. Asaraate fushsha hasiissannoˈneha ikkirono, hattenne kultine kore lashshi assa dihasiissannoˈne.
24 Kiˈne ballootu massagaano, bookkicho ximbiibbine fushshitinanni, gaala kayinni egemmitinanni!
25 “Kiˈne lawisiisaano seeru rosiisaanonna Farisootu, kiˈnera aanneˈe! Korkaatuno, kiˈne gobbayido biiffe giddoyido xurtino birciqqonna saane gedeereeti; giddoˈne hafuurrenna quwa saˈino yorto woˈmitino.
26 Ati ballichu Farisichi, balaxxe birciqqonna saane giddoyido hayishshi; hatto ikkiro gobbayidono biiffanno.
27 “Kiˈne lawisiisaano seeru rosiisaanonna Farisootu, kiˈnera aanneˈe! Korkaatuno, giddo reyino manni miqqanna batte baala woˈmite heedheenna gobbayido kayinni noora ganne biifinsoonni waamma labbinanni.
28 Laˈˈannoˈnehura gobbayido keeraano labbinanni; giddoˈne kayinni kaphunna bunshe* woˈmitino.
29 “Kiˈne lawisiisaano seeru rosiisaanonna Farisootu, kiˈnera aanneˈe! Korkaatuno, masaalaanote moogga seekkitinanni, keeraanote waammano* biifissinanni;
30 qoleno togo yitinanni: ‘Alba annuwanke waro heeˈnoommoro masaalaanote mundee dunate insa ledo dikarsammeemmo.’
31 Hakko daafira, masaalaano shituri ooso ikkitinoonnita kiˈne umiˈne farcidhinoonni.
32 Konnira, annuwaˈne hanaffinore kiˈne umo fushshe.
33 “Kiˈne hamasu, buutete ooso, Gaannaamete qoricha hiitto ikkitine gattinanni?
34 Konnira masaalaano, egennaammanna rosiisaano kiˈnewa soyeemmo. Insa giddo mito shitinanni, hattono haqqaho suttinanni; mito qole xaadu minnaˈnera halangetenni gantinanni, hattono katamunni katama shorritinanni;
35 Konninni kainohunni, keeraanchu manchi Aabeeli mundeenni kayisse qullaawu mininna kakkalote dargi mereero shitinoonnihu Baraakiya beetti Zakkaariyaasi mundee geeshsha uullate aana duntinoonnite keeraanote mundee baalate xaˈmantinanni.
36 Halaale yeemmoˈnena, konni coyi baalunni kainohunni tini ilama qorichishantanno.
37 “Ati Yerusaalame, Yerusaalame, masaalaano shaattatinna atewa sonkoonnire kinnatenni awwaalattati, lukkicho caacurrese qoolise giddora gamba assidhannohu gede anino oosokki mitteenni gamba assammora meˈˈe hige hedummo! Kiˈne kayinni gibbinoonni.
38 Xaate mineˈne* kiˈnera facci assine agurranni.*
39 Konnira kuleemmoˈnena, ‘Yihowa suˈminni daannohu maassaminoho’ yitina geeshsha xaate horonta dilaˈinannie.”
Lekkaalliidi Qaagiishshuwa
^ Ayihudete labballi, busha kissannonkekki gede yite albahonna angate usudhitannoho Seeru giddonni shoole gafa amadinorichooti.
^ Woy “dancha bayicho.”
^ Woy “dikkote.”
^ Noo gedeenni tirriro, “Rabbii.”
^ Tini kiiro mite Qullaawu Maxaafi tirora nooha ikkirono, angatenni galchinoonnite hundite qara qara Giriikete Afii borrora dinoote.
^ Yerusaalamete gobbaanni ishine giirranni bayichooti.
^ Woy “haˈnashshunni.”
^ Woy “insilaaletenninna.”
^ Sagale coommishate wodhinanni qimameeti.
^ Woy “seera diiga.”
^ Woy “keeraanonnita qaagooshshu waammano.”
^ Qullaawa mineeti.
^ “Ona ikke gatannoˈne” yaano ikkitara dandiitanno.
