Maatewoosi Wongeella 26:1-75
-
Kakkalaano Yesuusa shitara gano gantu (1-5)
-
Mitte mancho Yesuusi umira shitto duntu (6-13)
-
Jeefote Faasikanna Yihudi Yesuusa sayise uyino gara (14-25)
-
Mootichu Hurbaate xintini (26-30)
-
Yesuusi, Pheexiroosi kaadannosita balaxe coyiꞌri (31-35)
-
Yesuusi Geetesemaane yinanniwa huuccatto assiꞌri (36-46)
-
Yesuusa amandi (47-56)
-
Yoo yinasira Sanihediriini shongo shiqinshi (57-68)
-
Pheexiroosi Yesuusa kaadi (69-75)
26 Yesuusi konne coye baala coyiˈre kaihu gedensaanni rosaanosi togo yiinsa:
2 “Lamu barri gedensaanni Faasika ayirrinsannita affinoonni; manchi Beettono haqqaho sutamara sayinse uyinanni.”
3 Hakkiinni kakkalaanote roorrootinna cimeeyye Qeyyaafa yinannihu kakkalaanote biili hoowera gamba yite,
4 Yesuusa amadatenna* shaate gano gantu.*
5 Ikkollana insa togo yitu: “Mannu cancamannokki gede, iso ayyaanu yannara amada dihasiissannonke.”
6 Yesuusi Biitaaniyaho Simooni yinannihu dhiigu dhibbi amadinosi manchi mine heeˈreenna,
7 mitte mancho albaasxiroosi yinanni gujuujjera lowo woxi shitto* haadhe isiwa shiqqu; isi sagale itanni heeˈreenna shitto umisira duntu.
8 Rosaanosi tenne laˈuti hanqite togo yitu: “Shitto mulla mayira hunanni heeˈnoonni?
9 Lowo woxira hirre woxe buxanete diuyinanni?”
10 Yesuusi insa maa hasaabbanni nooro afe togo yiinsa: “Mancho mayira qarrissinannise? Ise anera danchare assitinoe.
11 Buxane woˈmanka woyite kiˈne ledo heedhanno; ani kayinni woˈmanka woyite kiˈne ledo diheeˈreemmo.
12 Ise bisiˈyara shitto duntinohu ane waammate qixxeessateeti.
13 Halaale yeemmoˈnena, konne dancha duduwo alame woˈmate dudumbanniwa baalankawa tini mancho assitinoreno ise qaaggora kullanni.”
14 Hakkiinni Tonaalamu giddo mittu Asqorootu Yihuda yinannihu kakkalaanote roorrootiwa mare,
15 “Iso sayise uummoˈnero maa uyitinannie?” yii. Insano 30 birru saante* uyitasira sumuu yitu.
16 Konnira isi hatte yannanni kayise Yesuusa sayise aara injo hasiˈranni keeshshi.
17 Irsho Nookki Timi Ayyaanira umi barra rosaano Yesuusiwa shiqqe togo yitu: “Faasiku hurbaate mama qixxeessinammohera hasiˈratto?”
18 Isino togo yiinsa: “Katama hadhine ewelo yinanni mancho togo yiiyye: ‘Rosiisaanchu togo yiino: “Yannaˈya* iillitino; rosaanoˈya ledo Faasika ate mine ayirriseemmo.”’”
19 Konnira rosaano Yesuusi hajajinonsa gede assitu; Faasikaho hasiisannore baalano qixxeessitu.
20 Hashshita Yesuusi 12 rosaanosi ledo hurbaateho ofolli.
21 Hurbaate ittanni heedheenna isi, “Halaale yeemmoˈnena, kiˈne giddo mittu sayise aannoe” yii.
22 Insa tennera lowo geeshsha dadillite mittu mittunku iso, “Mooticha hakku aneetini?” yitu.
23 Isino qole togo yii: “Sayise aannoehu ane ledo saanete anga wore tima qasiˈranni nooho.
24 Hige manchi Beetti balanxe isi daafira borreessinoonni garinni reyanno; manchi Beetto sayise aannohura kayinni aanneˈe! Hakku manchi ilama hoogoommero woyyannosihu baino.”
25 Sayise aasira kae noohu Yihudi qole, “Rosiisaancho, hakku aneetini?” yii. Yesuusino “Atinni yiittowe” yiisi.
26 Sagale ittanni heedheenna Yesuusi tima haaˈre, maassiˈrihu gedensaanni hiiqqaqqe rosaanosira aanni, “Hiiˈe, itte. Kuni maalaˈyaati yaate” yiinsa.
27 Hakkiinni finiincho haaˈre Magano galatihu gedensaanni togo yee uyinsa: “Baalunku kawiinni agge;
28 Tini lowo manni cubbo agursiisate duˈnantannote qaalu gondoori mundeeˈyaati yaate.”
29 Kayinni kuleemmoˈnena, Anniˈya Gashshootira kiˈne ledo haaro woyine agammo geeshsha tenne woyine layinkimeeshsho horonta diageemmo.”
30 Jeefote galatu faarso faarsituhu gedensaanni, Ejedhete Ilaala hadhu.
31 Hakkiinni Yesuusi togo yiinsa: “‘Allaalaancho ganeemmo; geˈreewu hoshshano billaallitanno’ yine borreessinoonni daafira, konne hashsha kiˈne baalunku anenni kainohunni gufidhinanni.
32 Ikkollana reyotenni kaummohu gedensaanni kiˈne balaxe Galiila saeemmo.”
33 Pheexiroosi kayinni togo yiisi: “Atenni kainohunni wolootu baalu gufidhurono, ani horonta digufiˈreemmo!”
34 Yesuusino togo yiisi: “Halaale yeemmohena, konne hashsha lukkichu ganikki sase higge kaadattoe.”
35 Pheexiroosino togo yiisi: “Reya hasiissuero nafa ate ledo reyemmo ikkinnina, horonta dikaadeemmohe.” Wole baalanti rosaanono hatto yitu.
36 Hakkiinni Yesuusi insa ledo Geetesemaane yinanni base daye rosaanosi togo yiinsa: “Ani kooiicho haˈre huuccatto assiˈrammo geeshsha, kiˈne kowiicho ofolle.”
37 Pheexiroosinna lamenta Zebidewoosi ooso ledosi haaˈre haˈri; hakkiicho dadillunna lowo yaaddo amaddusi.
38 Hakkiinni Yesuusi togo yiinsa: “Yaaddo shitanni nooe.* Kowiicho heedhine ane ledo baqqi yitine agadhe.”
39 Hakkunni gedensaanni insawiinni shiima geeshsha haˈre alba hige kumbuule togo yee huucciˈri: “Annaˈya dandaamannoha ikkiro kuni finiinchi anewiinni saona. Kayinni ane hedo gede ikkikki ate hedo gede ikkona.”
40 Rosaanosiwa higi woyite goxxe noore afe Pheexiroosi togo yii: “Ane ledo mitte saate nafa baqqi yitine agadha hooggini?”
41 Jifamate giddora eˈinannikki gede baqqi yitine agadhe, hattono agurtinikkinni huuccidhe. Hige ayyaanu qixxaawaho, maalu* kayinni daafuraamoho.”
42 Xaano layinkimeeshsho haˈre togo yaanni huucciˈri: “Annaˈya, kuni finiinchi agummokki saˈˈannokkiha ikkiro, ati hedootto gede ikkona.”
43 Galagale dayi woyiteno mugichu amadeennansa goxxe noore afi.
44 Xaano insa agure haˈre sayikkimeeshsho wona yiita yaanni lede huucciˈri.
45 Hakkiinni galagale rosaanosiwa hige togo yiinsa: “Tini gonxanninna fooliishshiˈnanni yanna diˈˈikkitino! Kuneeti manchi Beetto cubbaataammu angara sayinse uyinanni saate iillitino.
46 Kaˈe haˈnona. Kuneeti sayise aannoehu dayinona.
47 Yesuusi coyiˈranni heeˈreenna, Tonaalamu wido ikkinohu Yihudi kae dayi; kakkalaanote roorrootinna cimeeyye sokkinohu bisenna dulla adhinohu lowo manni ledosi no.
48 Sayise aannosihuno “Hasidhinannihu ani sunqeemmohona iso amadde” yee malaate kulinonsa.
49 Hakkiinni isi Yesuusiwa mare “Rosiisaancho keereho?” yee kimmi asse sunqisi.
50 Yesuusi kayinni “Jaala, kawira dayoottohu mayiraati?” yiisi. Hakkunni gedensaanni mannu mare Yesuusa amade usuri.
51 Ikkollana Yesuusi ledo noori giddo mittu bise fushshiˈre kakkalaanote biili borojjichira macca gane tayisi.
52 Hakkiinni Yesuusi togo yiisi: “Bise fushshidhannori baalu bisetenni gooffannona, bisekki bayichose qoli.
53 Konni lipheessi giddo Anniˈya 12 Leegiyoone* saˈanno sokkaasine soyannoe gede huucciˈra dandeemmokkiha lawihe?
54 Ikkollana, hatto assummoro Qullaawa Borro konni garinni ikka hasiissannosi yitannori hiitto ikke woˈmanno?”
55 Yesuusi hatte yannara mannaho togo yii: “Mulqiˈrannoha amandannihu gede bisenna dulla adhitine dagginihu ane amaddinaraati? Barru baala qullaawu mini giddo ofolle rosiisoommo; kiˈne kayinni hakkawoyite diamaddinoonnie.
56 Ikkollana kuni baaluri ikkinohu masaalaanote maxaaffara* borreessinoonniri woˈmanno gedeeti.” Hatte yannara rosaanosi baalanti iso hunte xooqqu.
57 Yesuusa amadduri iso haadhe kakkalaanote biili Qeyyaafawa massitu; hakkiicho seeru rosiisaanonna cimeeyye gamba yite no.
58 Ikkollana Pheexiroosi Yesuusiwiinni xeertiˈre kakkalaanote biili Qeyyaafa hoowe geeshsha hoodesi haˈri; hoowete giddoonni eihu gedensaanni coyi gawalo laˈˈara mini soqqamaano ledo ofolli.
59 Kakkalaanote roorrootinna Sanihediriini shongo* woˈma Yesuusa shaate kaphu naqaashshe hasidhanni no.
60 Naqaashshe ikkara lowo manni dayinoha ikkirono, ammansiissanno taje diafidhino. Gedensoonni lamu manni naqaashshe ikke shiqe
61 togo yii: “Kuni manchi ‘Maganunniha qullaawa mine diige sasu barri giddo mina dandeemmo’ yiino.”
62 Hatte yannara kakkalaanote biili kae uurre togo yiisi: “Mitte dawarono diqolatto? Mannu mayyee kassasanni noohero dimacciishshootto?”
63 Yesuusi kayinni sammi yee giwi. Konnira kakkalaanote biili togo yiisi: “Ati Maganu Beetto Kiristoosaatironna teˈee kulattonke gede heeshshote Maganinni xaarsiiseemmohe!”
64 Yesuusino togo yiisi: “Atinni yiittowe. Ani kayinni yeemmoˈnena, xaa kaˈa manchi Beetti Wolqaataamu qiniiteenni ofolle gordu gomichinni daanna laˈinanni.”
65 Hakkiinni kakkalaanote biili uddanosi dare togo yii: “Maganowe xoni! Wole naqaashshe mayira hasiˈneemmo? Kune xonanna kiˈneno macciishshitinoonni.
66 Tennera kiˈne mayitinanni?” Insano, “Reya hasiissannosi” yite qoltu.
67 Hakkiinni albaho anja tuffusi, hattono tuntuˈmotenni gantusi. Wolootu qawaaddanni
68 togo yitusi: “Kiristoosa, hanni ati masaalaanchohoro ganihehu ayetiro kulinke.”
69 Pheexiroosi minu gobbaanni hoowete giddo ofolle heeˈreenna mitte soqqamaancho isiwa dagge “Atino Galiilu Yesuusi ledoho” yitu.
70 Pheexiroosi kayinni, “Maricho coyidhanni noottaronni diafoommo” yee mannu baalu albaanni kaadi.
71 Hoowete xullichira heeˈreenna wole beetto affe, hakko noo mannira “Kuni manchi Naazireetete Yesuusi ledoho” yitu.
72 Isi kayinni xaaranni, “Ati yaatta mancho diafoommo!” yee xaano kaadi.
73 Shiima yanna gedensaanni hakko uurrite noori dagge Pheexiroosi togo yitu: “Atino insa widiho; coyiˈratto gari leellishanni no.”
74 Hakkiinni isi, “Konne mancho diegennoommo” yee xaaranni isonooto rumi. Hakkawoyintenni lukkichu gani.
75 Hatte yannara Pheexiroosira Yesuusi “Lukkichu ganikki sase higge kaadattoe” yiinoti qulli yitusi. Hakkiinni gobbara fule hururame wiˈli.
Lekkaalliidi Qaagiishshuwa
^ Woy “usuratenna.”
^ Woy “aduntu.”
^ Noo gedeenni tirriro, “tanni yite suˈniitanno zayite.”
^ Birra yinanni siwiila tumme seekkinoonni saanteeti.
^ Woy “hirqinoonnie yanna.”
^ Woy “lubboˈya reyote geeshsha dadillitino.”
^ Mannu ooso cubbaataammanna guuntete xeˈne noonsare ikkitinota leellishanno.
^ Leegiyoone hundi waro Roomu olanto gaamooti. Mitte Leegiyoone giddo 4,000 kayisse 6,000 geeshsha ikkitanno olanto heedhanno. Kowiicho kuni qaali batinye leellishannoho.
^ Woy “qullaawa borrora.”
^ Ayihudenniho Aliidi Yoo Mineeti.
