Maatewoosi Wongeella 27:1-66
27 Soodita kakkalaanote roorrootinna cimeeyye baalanti Yesuusa shitara mitteenni maˈlitu.
2 Iso usurtuhu gedensaanni, massite gashshaanchu Philaaxoosira sayisse uyitu.
3 Hakkiinni sayise uyisihu Yihudi, Yesuusa shinara yoo yinoonnita afiti gaabbi; sajjoonta birru saantuwa* abbe kakkalaanote roorrootiranna cimeeyyete qole
4 togo yii: “Keeraancho mancho* sayise oye cubbo loosoommo.” Insano, “Ninke mayi eessinkeyya? Hatti umikki hajaati!”* yitu.
5 Konnira isi birru saantuwa qullaawu mini giddo fince agure fuli. Hakkiinni haˈre qalxiˈre reyi.
6 Ikkollana, kakkalaanote roorrooti birru saantuwa haadhe togo yitu: “Kuni mundeete woxe ikkino daafira, qullaawu mini giddo woxe worranniwa wora dihasiissanno.”
7 Konnira amaalantuhu gedensaanni, wosinaho waammate darga ikkanno gede hakko woxinni dora gananno manchi baatto hirtu.
8 Hakko daafira, techo geeshsha hattenne baatto Mundeete Baatto yinanni.
9 Hatte yannara masaalaanchu Ermiyaasi togo yee coyiˈrinori woˈmi: “Israeelete ooso giddo mitu murtinoha mancho hirroonni waaga, yaano sajjoonta birru saantuwa haadhe,
10 Yihowa hajajinoe garinni dora gananno manchi baattora baattu.”
11 Yesuusi Philaaxoosi albira shiqi; Philaaxoosino, “Ati Ayihudete Mooteeti?” yee xaˈmisi. Yesuusino “Atinni yiittowe” yee qoli.
12 Kakkalaanote roorrootinna cimeeyye kassassusi woyite kayinni mittoreno didawarino.
13 Hakkiinni Philaaxoosi, “Insa ate meu coyira busha assitanni noohero dimacciishshootto?” yiisi.
14 Yesuusi kayinni cuqqi curuqqi diyiino; tini Philaaxoosira dhagge ikkitusi.
15 Diru kiiro Faasiku ayyaana ayirrinsanni woyite, gashshaanchu mannu tirransara hasiˈrannoha mitto usuranya tirate rosichi noosi.
16 Hatte yannara Barbaani yinannihu shittichu manchi usurame no.
17 Konnira insa mitteenni gamba yite heedheenna Philaaxoosi togo yiinsa: “Aye tirammoˈnera hasidhinanni? Barbaaninso Kiristoosa yinanni Yesuusa?”
18 Philaaxoosi hatto yiinohu, Yesuusa sayisse uyitinohu hinaasse ikkinota afeeti.
19 Qoleno isi yoote barcimira ofolle heeˈreenna minaamasi togo yite sokka sokku: “Isinni kainohunni ankarro haaqeete bararraaqanni galoommana hakkonne keeraancho mancho mittoreno assitooti.”
20 Ikkollana kakkalaanote roorrootinna cimeeyye Barbaani tirre Yesuusa shinanni gede xaˈmiˈrara manna kakkayissu.
21 Gashshaanchuno qole “Lamunku giddo hiikkonne tirammoˈnera hasidhinanni?” yiinsa. Insano “Barbaani” yitu.
22 Philaaxoosino “Kiristoosa yinanniha Yesuusa hiissoyya?” yiinsa. Insa baalunku “Haqqaho suti!” yite qoltu.
23 Isino, “Mayira? Isi assino bunshe maati?” yii. Insa kayinni, “Haqqaho suti!” yitanni ledde cancitu.
24 Philaaxoosi assanni noori canco ledanni noota agurranna woyyeessinori nookkita afiti, waa adhe mannu albaanni anga hayishshiˈranni togo yii: “Konni manchi mundeera ani dixaˈmameemmo. Xaˈmantinanniri kiˈne umoˈneeti.”
25 Mannu baalunkuno togo yee qoli: “Konni manchi mundee shedi ninkenna oosonke amadona.”
26 Hakkiinni Barbaani tirinsa; Yesuusa kayinni halangetenni gansiise haqqaho suntanni gede sayise uyi.
27 Hatte yannara gashshaanchu olanto Yesuusa haadhe gashshaanchu minira massitu; olanto baalano Yesuusa doyissitanno gede assitu.
28 Uddanosi mulqite duume xiillitte uddano uddisiissusi;
29 qoleno utu worraaqqa* seekkite umisira wortu; qiniiticho angasira leemmiichu siqqicho amadisiissu. Albasiinni guluphite “Ayihudete Moote, keereho?” yitanni qacifattusi.
30 Qoleno anja tuffusi; hattono leemmiichote siqqicho haadhe umo gantusi.
31 Qacifattusihu gedensaanni, duume uddano mulqite umisi uddano uddisiisse haqqaho suttara haadhe hadhu.
32 Hadhanni heedhe Simooni yinanniha Qereenu katami mancho affu. Konne mancho Yesuusa suntanniha qarru haqqa duhanno gede gadadissusi.*
33 Hakkiinni Golgoota yinanni bayicho iillitu; hatto yaa Umu Qooncho yaate;
34 hakkiicho woyine qaraarote ledo karsite agara uyitusi; isi kayinni qamase lae aga giwi.
35 Yesuusa haqqaho qolte gante suttuhu gedensaanni, uddanosi hixa tuqqite beeqqitu;
36 hakkiinni ofolte iso agartu.
37 Iso kassansoonnihu mayiraatiro kultanno borro, “Kuni Ayihudete Moote Yesuusaati” yite borreessite isira umoonni wortu.
38 Hatte yannara lamu shittooti mittu qiniitesiinni mittu gurasiinni sutante no.
39 Hakkaanni hige saˈˈanno manni xonisi; hattono umo shafanni
40 togo yiisi: “Qullaawa mine diige sasu barri giddo mineemmo yaattohu, hanni umokki gatisi! Hanni ati Maganu Beetto ikkoottoro sutamootto haqqinni dirri!”
41 Seeru rosiisaanonna cimeeyyeno togo yitanni qacifattusi:
42 “Woloota gatisino; umosi kayinni gatisa didandiino! Israeelete Moote ikkinoro, hanni xa sutamino haqqi aaninni dirrona; ninkeno ammanneemmosina.
43 Isi Magano hexxino; ‘Ani Maganu Beettooti’ yiinona baxannosiha ikkiro hanni xa gatisosi.”
44 Wole agurina ledosi haqqaho sutante noori nafa hakko garinni qacifattinosi.
45 Barra lee saatenni kayise honse saate geeshsha, gobba baala tunsitu.
46 Honse saate balla Yesuusi lowo huuronni, “Eeli, Eeli, laama sabaqitani?” yii; hatto yaa “Maganoˈya, Maganoˈya, mayira agurittoe?” yaate.
47 Hakko uurrite noori giddo mitu tenne macciishshituti, “Kuni manchi Eeliyaasi woshshiˈranni no” yitu.
48 Hakkawoyitenni insa giddo mittu dodanni mare haanxicho haaˈre, shiishshino woyine giddo cuue leemmichote siqqichora wore agara uyisi.
49 Insa giddonni mitu kayinni, “Aguri! Hanni Eeliyaasi daye gatisannasi laˈneemmona” yitu.
50 Yesuusi xaano lowo huuronni raari; hakkiinni reyi.*
51 Hatte yannara qullaawu mini dukko* alinni eeli geeshsha lamewa dadhantu; hattono baatto huxidhu; kinnano daddadhantu.
52 Hakkiinni waamma* faˈnanteenna reyitino* qullaawootihu lowo reeshshi fuli;
53 batinyu mannino lai; (Yesuusi reyotenni kaihu gedensaanni waammate qooxeessinni dayino manni Yerusaalame* ei.)*
54 Ikkollana olantote hajajaanchinna ledosi Yesuusa agarte noori baattote huxanonna ikkanni nooha wole coye laˈuti lowo geeshsha waajjite “Addinta kuni Maganu Beettooti” yitu.
55 Yesuusira soqqamanni Galiilunni kayise ledosi haˈrinohu lowo meenti hakko xeertote heeˈre laˈˈanni no;
56 insa ledo Megidelitte Maariyaami, Yaaqoobinna Yoosa ama Maariyaami, hattono Zebidewoosi ooso ama no.
57 Hawarrita, Yooseefi yinannihu mittu dureessu Armaatiyu katami manchi dayi; isino Yesuusi rosaanchooti.
58 Kuni manchi Philaaxoosiwa mare Yesuusi reeshsha aasira xaˈmiˈri. Philaaxoosino uyinannisi gede hajaji.
59 Yooseefino reeshsha haaˈre shalaalatenni loonsoonnihu haaru danchu imaaninni kafani;
60 hakkiinni kincho kurkure umisi qixxeessiˈrinotera haaro waammara* madaari. Hakkunni gedensaanni jawa kincho gongoˈmishe waammate* afoo cufe haˈri.
61 Megidelitte Maariyaaminna wole Maariyaami kayinni hakkiicho waammate albaanni ofolle no.
62 Kuni coyi ikkinohu Sambataho qixxaambanni barraati; layinki soodo, kakkalaanote roorrootinna Farisootu mitteenni gamba yite Philaaxoosiwa marte
63 togo yitu: “Mooticha, hakku kaphaanchu lubbote noo woyite ‘Sayikki barra kaeemmo’ yiinoti qulli yitinonke.
64 Hakko daafira, rosaanosi dagge reeshsha moortannokki gedenna mannaho ‘Reyotenni kaino’ yite dudubbannokki gede sayikki barri geeshsha waamma agarranni gede hajaji. Hatto ikka hoogiro, kuni gedensiidi kaphi albiha roore bushanno.”
65 Philaaxoosino togo yiinsa: “Agaraasine adha dandiitinanni. Hadhine affinoonni garinni agarsiisidhe.”
66 Konnira hadhe waamma kinchunni seekkite cuffe aanaho maattama gante agaraasine wortu.
Lekkaalliidi Qaagiishshuwa
^ Birra yinanni siwiila tumme seekkinoonni saantuwaati.
^ Noo gedeenni tirriro, “keeraancho mundee.”
^ Woy “Hakku ate qarraati.”
^ Woy “baˈlatto.”
^ Woy “qarru haqqa duhe baxikki hajajamanno gede assitusi.”
^ Woy “foola aguri.”
^ Woy “maggaarraji.”
^ Woy “qaagooshshu waamma.”
^ Noo gedeenni tirriro, “reyotenni goxxino.”
^ Noo gedeenni tirriro, “qullaawa katama.”
^ Gombote giddoonni noo hedo yannate gedensoonni ikkinore kultannote.
^ Woy “qaagooshshu waammara.”
^ Woy “qaagooshshu waammara.”
