Maatewoosi Wongeella 28:1-20
28 Sambatu saihu gedensaanni, lamalate umi barra* duuˈmo saaqqanna Megidelitte Maariyaaminna wole Maariyaami waamma laˈˈara dayi.
2 Hatte yannara Yihowa sokkaasinchi iiminni dirrino daafira, baatto lowo geeshsha huxidhu; sokkaasinchuno daye kincho gongoˈmishe aanaho ofolli.
3 Danisi belequ gede xawanno; uddanosino kaadete gede waajjote.
4 Agaraasine sokkaasincho waajjite qece yite reyino manchi gede ikkitu.
5 Sokkaasinchu meento togo yii: “Waajjitinoonte, hasidhinanni heedhinoonnihu haqqaho suntiha Yesuusa ikkinota afoommona.
6 Isi kowiicho dino; balaxe coyiˈrinonte gede reyotenni kaino. Amme, madaarroonnisi darga laˈe.
7 Rakkine martine isi reyotenni kainota rosaanosira kulle. ‘Isi kiˈne balaxe Galiila saˈˈanno. Hakkiicho iso laˈinanni’ yitine kullensa. Kulummoˈnere habbinoonte.”
8 Hakko daafira, meentu waajjillunninna lowo hagiirrinni rosaanosira kulara waammatewiinni rahe dodanni haˈri.
9 Yesuusi insanni xaade “Keeru kiˈne ledo ikko!” yiinsa. Insano shiqqi yee lekkasi amade ayirrinye uyisi.*
10 Hakkiinni Yesuusi togo yiinsa: “Waajjitinoonte! Hadhine, Galiila saˈanno gede roduuwiˈyara kullensa; hakkiicho laˈannoena.”
11 Meentu haˈranni doogo heeˈreenna, agaraasinete giddo mitu katama marte ikkinore baala kakkalaanote roorrootira kultu.
12 Kakkalaanote roorrootino, cimeeyyete ledo gamba yite amaalantuhu gedensaanni waamma agartino olantora lowota birru saantuwa* uyite
13 togo yitu: “‘Hashsha ninke gonxe heeˈneenna rosaanosi dagge reeshsha moortino’ yiiyye.
14 Kuni duduwi gashshaanchunniwa iilliro iso ninke ammansiinseemmona kiˈne yaaddinoonte.”
15 Konnira insa birru saantuwa adhite hajanjoonninsa gede assitu; tenne xagge techo barri geeshsha Ayihudete manni shaa asse hasaawanno.
16 Tonaamittunku rosaano kayinni, Yesuusi ledo xaaddara isi kulinonsawa Galiilaho noo ilaala hadhu.
17 Rosaanosi iso laˈuti ayirrinye uyitusi;* mitu kayinni huluullantu.
18 Yesuusino insawa shiqqi yee togo yiinsa: “Silxaane baala gordohono baattoteno uyinoonnie.
19 Konnira hadhine, daga baalante giddonni manna rosaanoˈya asse; Annu, Beettunna qullaawu ayyaani suˈminni cuuˈensa;
20 hajajoommoˈnere baala agadhitanno gedeno rosiissensa. Kuneeti, alamete* gumulo geeshsha barru baala ani kiˈne ledo noommo.”
Lekkaalliidi Qaagiishshuwa
^ Xaa yannara ninke Sambataho yineemmohu Ayihudootaho lamalate umi barraati.
^ Woy “kumbuulisi.”
^ Birra yinanni siwiila tumme seekkinoonni saantuwaati.
^ Woy “kumbuultusi.”
^ Woy “diru.”
