Maatewoosi Wongeella 6:1-34
6 “Mannu laˈˈaˈnera yitine keeraanchimmate loosoˈne insa albaanni loossinannikki gede qorophe; hakkunni kaˈa gordu Anniˈnewiinni mittoreno diafidhinanni.
2 Konnira, mannu ayirrisansara yite xaadu minnaranna dooggate lawisiisaano assitannohu gede, buxanete mitore* uyitinanni woyite balaxxine xurumba ufuuffinoonte. Halaale yeemmoˈnena, insa loosinsa guma woˈma adhite kaˈino.
3 Ati kayinni buxanete mitore aatto woyite, qiniiticho angakki assitannore guracho angakki affoonke;
4 hatto ikkiro, buxanete mitore daheessite aa dandaatto. Dahaawinowa heeˈre laˈˈanno Annikki loosikki guma aannohena.
5 “Qoleno huuccatto assidhinanni woyite lawisiisaanote gede ikkitinoonte; insa mannu laˈˈansara yite xaadu minnaranna halaˈlado dooggara xaawate uurrite huucciˈra baxxanno. Halaale yeemmoˈnena, insa loosinsaha woˈma guma adhite kaˈino.
6 Ati kayinni huucciˈratto woyite holgikkira ei; hakkiinni saanqa cufidhe dahaawinowa heeˈranno Annakki huucciˈri. Dahaawinowa heeˈre laˈˈanno Annikki loosikki guma aannohena.
7 Huuccatto assidhinanni woyite, dagate gede yitinoonnita calla yitinoonte; insara, huuccatto seedissuro Maganu macciishshannoha lawannonsa.
8 Kiˈne kayinni insa gede ikkitinoonte; korkaatuno Anniˈne huuccidhinara albaanni nafa mayi hasiisannoˈnero afino.
9 “Hakko daafira kiˈne konni garinni huuccidhe:
“‘Iima heeˈrattohu Annanke, suˈmikki qullaawa ikko.*
10 Gashshootikki dayo. Fajjokki iima ikkitanni noonte gede, uullate aanano ikkito.
11 Techota barru sagale* uyinke;
12 ninke woleho cubbu asale gatona yineemmonte gede, ninkerano cubbinke asale gatona yiinke.
13 Bushuwiinni gatisinke* ikkinnina jifamate giddora eessitootinke.’
14 “Mannu sao gatona yitiniro, iimi Anniˈne kiˈne saono gatona yaannoˈne;
15 mannu sao gatona yaa gibbiniro kayinni, iimi Anniˈne kiˈne saono gatona diyaannoˈne.
16 “Xoontinanni woyite lawisiisaanote gede alba xawulushshi yitinoonte; insa mannu xoonte noota afansara yite alba bullitanno.* Halaale yeemmoˈnena, insa loosinsa guma woˈma adhite kaˈino.
17 Ati kayinni xoomatto woyite umo buudhi, albano hayishshiˈri;
18 hatto ikkiro xoomattohu mannu afahera yite ikkikkinni, dahaawinowa heeˈranno Annikkira yite callaati. Dahaawinowa heeˈre laˈˈanno Annikki loosikki guma aannohena.
19 “Bile* itte huntara, cilte baˈaranna mooraanchu hiiqqe eˈˈe moorara dandaannowa uullate aana jiro duuˈna agurre.
20 Hatteentenni bile itte huntara, cilte baˈaranna mooraanchu hiiqqe eˈˈe moorara dandaannokkiwa jiro iima duuˈne.
21 Korkaatuno wodanikki heeˈrannohu jirokki noowaati.
22 “Mannimmate caabbichi illete. Hakko daafira illekki mitto coye illachishshinota* ikkituro, mannimmakki woˈma waraˈa yitanno.
23 Illekki hamashshaame* ikkituro kayinni, mannimmakki woˈma tunsitanno. Giddokki noo xawaabbi tunsicho ikkiro, mannimmakki xiˈmo tunsicho ikkitanno.
24 “Lamu mootichira borojjicho ikka dandaannohu dino; mitto giwe mitto baxanno, woy mitto ayirrise mitto mishanno. Kawaa Maganoho kaˈaa Jirote borojjicho ikka didandiitinanni.
25 “Konnira, heeshshoˈne* daafira maa inteemmo woy maa angeemmo yitine, woy mannimmaˈne daafira maa uddiˈneemmo yitine yaada agurre yeemmoˈne. Heeshsho* sagale, mannimma uddano diroortanno?
26 Iimi cea seekkitine laˈe; insa wixa diwixidhanno, dimixxitanno, woy gootaaraho diduuˈnitanno; ikkollana iimi Anniˈne itisannonsa. Ikkina kiˈne cea diroortinanni?
27 Kiˈne giddo yaade dirisi aana mitte cigile lexxa dandaannohu nooni?
28 Qoleno uddidhinanniri daafira mayira yaaddinanni? Hanni dubbu daraaro lophitanno gara seekkitine laˈe; loossanni didaafurtanno, woy disuqqidhanno;
29 Ani yeemmoˈneti kayinni, Salamooni nafa konni baalu ayirrinyisinni tenne daraaro giddo mittete geeshsha dibiifino.
30 Kiˈne ammana xeˈinoˈneri, Maganu techo leelte gaˈa booso tugantannota dubbu muˈro togo asse uddisiisannoha ikkiro, kiˈne hakkiinni roorse diuddisiisannoˈne?
31 Konnira, ‘Maa inteemmo?’ woy ‘Maa angeemmo?’ woy ‘Maa uddiˈneemmo?’ yitine horonta yaaddinoonte.
32 Korkaatuno, konne coye baala afiˈrate wojji yitannoti dagate. Iimi Anniˈne kuni coyi baalu hasiisannoˈneta afino.
33 “Konnira balaxxine Maganu Gashshootenna keeraanchimmasi hasidhe;* kore baalankare uyinanniˈnena.
34 Hakko daafira, gaˈara umisihu yaachishanno coyi noosina, gaˈara horonta yaaddinoonte. Mittu mittunku barrira ikkanno geeshshi qarri noosi.
Lekkaalliidi Qaagiishshuwa
^ Woy “mutsuwaate.”
^ Woy “suˈmikki ayirro.”
^ Noo gedeenni tirriro, “daabbo.”
^ Woy “agarinke.”
^ Woy “insaneeto ditowaxxitanno.”
^ Bile hoccoota ittannote shiimmaadda lubbuwaati.
^ Woy “xunsite laˈannota.”
^ Noo gedeenni tirriro, “busha.”
^ Woy “lubboˈne.”
^ Woy “lubbo.”
^ Noo gedeenni tirriro, “hasiˈra agurtinoonte.”
