Maatewoosi Wongeella 7:1-29
7 “Yoo yinanniˈnekki gede kiˈneno woleho yoo yaa agurre;
2 Maganu woleho yitinoonni yoo garinni kiˈnerano yoo yaannoˈne; woleho safartine uyitinanni safaraanchinni safarranniˈne.
3 Ikkina illekki giddo noo heelliicho agurte rodiikki ille giddo noo ishincho mayira laˈˈatto?
4 Woy illekki giddo heelliicho heedheenna rodookki, ‘Illekki giddo noo ishincho fushsheemmohe’ hiitto yaatto?
5 Ati lawisiisaanchu! Balaxxe ate ille giddo noo heelliicho fushshiˈri; hakkiinni rodiikki ille giddo noo ishincho fushshate xunsite laˈˈa dandaatto.
6 “Qullaawa coye woshshaho uyitinoonte woy ayirrado uduunnicho* manchaamete albaanni tugginoonte; hatto assitiniro manchaame ayirrado uduunnicho kakkadde huntanno, kiˈneno gawajjitannoˈne.
7 “Agurtinikki huuccidhe, uyinanniˈnena; agurtinikki hasidhe, afidhinannina; agurtinikki waalcho ganganne, fannanniˈnena;
8 huucciˈrannohu baalu adhannona; hasiˈrannohu baalu afiˈranno; waalcho ganganannohura baalahono fannannisi.
9 Kiˈne giddo qaaqqisi daabbo huucciˈriro kincho aannohu nooni?
10 Woy qulxuˈmicho huucciˈriro hamashsho aannosini?
11 Kiˈne bushuulle ikkitine heedhinenni oosoˈnera danchare aa egentinoonniha ikkina, iimi Anniˈne huuccidhannosirira dancha coye hiitto roorse diaanno?
12 “Mannu kiˈnera assaˈnera hasidhinannire baala kiˈneno insara assensa. Seeruno Masaalaanono yitannohu hattootina.
13 “Ruukkashshu waalchi widoonni higgine eˈe; baote widira massanno waalchi halaˈladoho, doogono halaˈladote; hakkaanni hige haˈranno mannino lowoho.
14 Heeshshote widira massanno waalchi ruukkashshoho, doogono ruukkashshote; ise afiˈranno mannino kiiro shiimaho.
15 “Kaphu masaalaano qorophe! Insa kiˈnewa geˈrechu lande uddidhe dagganno; giddoyido kayinni bibbiddanno hiyyeeyyeeti.
16 Insa guminsanni baddine affinanni. Mannu utu aaninni woyinete laalo woy kokkoˈlu aaninni balasete laalo xinqiˈrannoni?
17 Hatteente gede dancha haqqicho baala dancha guma laaltanno; busha haqqicho baala kayinni busha guma laaltanno.
18 Dancha haqqicho busha guma laala didandiitanno; busha haqqichono dancha guma laala didandiitanno.
19 Dancha guma laaltannokki haqqicho baala karre giirate tunganni.
20 Kaphu masaalaanono guminsanni baddine affinanni.
21 “‘Mootichaˈya, Mootichaˈya’ yaannoehu baalu gordu Gashshoote eannoha diˈˈikkino; gordu Gashshoote, iima heeˈranno Anniˈya fajjo wonshannohu callu eanno.
22 Hatte yannara batinyu manni togo yaannoe: ‘Mooticha, Mooticha suˈmikkinni masaalo dicoyiˈnummo? Suˈmikkinni agaaninte difushshinummo? Suˈmikkinni lowo maalale diloonsummo?’
23 Ani kayinni hatte yannara, ‘Horo diegennoommoˈne! Kiˈne bunshe assitinanniri, anewiinni faffe!’ yeemmonsa.
24 “Hakko daafira konne coyiˈroommore macciishshe wonshannohu baalu minesi kinchu aana miˈninoha egennaamo mancho lawanno.
25 Biite xeena gani, lolahuno dayi, bubbeno bubbisse hakkonne mine gantu, ikkollana minu kinchu aana xintamino daafira didiigamino.
26 Konne coyiˈroommore macciishshe wonshannokkihu qole, minesi shaafu aana miˈninoha gowwa mancho lawanno.
27 Biite xeena gani, lolahuno dayi, bubbeno bubbisse hakkonne mine gantu; minuno horo toate yinannikkita toi.”
28 Yesuusi konne coye coyiˈre kaihu gedensaanni mannu rosiisino gara dhagge assiˈri;
29 korkaatuno rosiisinonsahu seeru rosiisaanonsa gede ikkikkinni silxaane noosi manchi gede ikkeeti.
Lekkaalliidi Qaagiishshuwa
^ Woy “inquˈne.”
