Maatewoosi Wongeella 8:1-34
8 Ilaalu aaninni dirrihu gedensaanni lowo manni hoodesi haˈri.
2 Hatte yannara mittu dhiigu dhibbi amadinosi manchi isiwa daye guluphe* “Mooticha, hasiˈrittoro hursattoera* dandaattowe” yii.
3 Yesuusino angasi diriirse mancho amammade, “Hasiˈreemmona huri!”* yiisi. Manchuno bayichonko dhiigu dhibbisinni huri.*
4 Hakkiinni Yesuusi togo yii: “Tenne mittohono kulattokki gede qorophi; kayinni hadhe ateneeto kakkalaanchoho leellishi; kakkalaano huroottota affanno gede Muse hajajino kakkalono shiqishi.”
5 Yesuusi Qifirinaahoomi katama iillita mittu olantote hajajaanchi isiwa shiqe
6 togo yee huucciˈri: “Mooticha, soqqamaanchiˈya laanshaawe mine goxe no; qoleno isi lowo geeshsha shete no.”
7 Yesuusino “Daye hurseemmosina” yiisi.
8 Olantote hajajaanchino togo yii: “Mooticha, ani ati miniˈyara eatto gedee mancho diˈˈikkoommo; ikkollana koye heedhe mitto qaale coyiˈrittoro soqqamaanchiˈya huranno.
9 Aneno aleenni higge hajajjannori nooe; anerano hajajeemmo olanto nooe; mitto ‘Haˈri!’ yuummoro haˈranno; wole ‘Amo!’ yuummoro daanno; borojjichoˈyano ‘Konne assi!’ yuummoro assanno.”
10 Yesuusi tenne macciishshe dhagge assiˈre hoodesi hadhanni noore togo yii: “Halaale kuleemmoˈnena, Israeelete manni giddo togooti lowo ammana noosiha mitto manchono diafoommo.
11 Ikkollana lowo manni soojjaatinna galchiminni daye, gordu Gashshootira Abirihaami, Yisaaqinna Yaaqoobi ledo sagale itara ofollannota kuleemmoˈne.
12 Gordu Gashshooti ooso kayinni gobba tunsichoho fushshine tunganni; insano hakkiicho wiˈlitanno; hattono hinko gaˈmidhanno.”
13 Hakkiinni Yesuusi olantote hajajaancho, “Ammanakki gede ikkohena haˈri” yiisi. Soqqamaanchuno hakko lipheessi giddo huri.
14 Yesuusi Pheexiroosi minira mari woyite Pheexiroosi ballo biso iibbabbite goxxe noota lai.
15 Hakko daafira, Yesuusi angase amadita iibbabbo higgeennase kaˈe soqqantusi.
16 Hawarrita mannu agaaninte amaddinoha lowo manna isiwa abbi; isino busha ayyaanna mitto qaale calla coyiˈre fushshi; dhibbu waadannonsare baalano hursi.
17 Kuni ikkinohu Maganu masaalaanchu Isayyaasi widoonni “Isi xissonke adhi, dhibbankeno duqqi” yee coyiˈrinori woˈmanno gedeeti.
18 Yesuusi lowo manni doyisse noosita lae, rosaanosi baara widoonni fultanno gede hajaji.
19 Hakkiinni mittu seeru rosiisaanchi daye, “Rosiisaancho, haˈrattowa baala hoodekki haˈreemmo” yiisi.
20 Yesuusi kayinni togo yiisi: “Yeedaalate bale noonsa; iimi cearano minu noonsa; manchi Beettira kayinni umo worannowi nafa dinosi.”
21 Hakkiinni rosaanosi giddonni mittu “Mooticha, balaxe haˈre annaˈya madaadheemmona fajjie” yiisi.
22 Yesuusino, “Reyitinore reyitinori madaadhitona, ati ane hoode amo”* yiisi.
23 Hakkiinni Yesuusi haˈrara yowolo giddita rosaanosino gidditu.
24 Baaru aana hadhanni heedheenna lowo hambabalatte kaˈu; dambaluno yowolo egemmara rahi; Yesuusi kayinni hatte yannara goxe no.
25 Hakkiinni isiwa marte goxinoha kayisse, “Mooticha, goonfummona gatisinke!” yitu.
26 Yesuusi kayinni, “Kiˈne ammana xeˈinoˈneri, togo mayira waajjitinanni?”* yiinsa. Hakkiinni isi kae bubbenna baara ufi; bubbenna baaruno sammi yii.
27 Mannuno dhagge assiˈre togo yii: “Bubbenna baaru nafa hajajamannosihu kuni isi hiittoo manchooti?”
28 Yesuusi baara tayise fule Gedaarenoosi* yinanni qoqqowo dayita, agaaninte amaddinori lamu manchi waammate* mereerinni fulte Yesuusinni xaaddu. Insa lowo geeshsha qarrissannore ikkitino daafira mittu manchino hakkaanni hige disaˈˈanno.
29 Insano “Maganu Beetto, ninkera ate ledo mayi noonke? Yanna iillitukki shetisattonkera dayootto?” yite raartu.
30 Insawiinni shiimare xeertidhe manchaamete hoshsha hayisso ittanni no.
31 Agaaninteno, “Fushshattonkeha ikkiro, marre manchaamete hoshsha giddora eˈneemmo gede fajjinke” yite huuccidhusi.
32 Yesuusino “Hadhe!” yiinsa. Insano fulte manchaamenniwa hadhu; manchaamete hoshsha baalanti boonu gaminni bitintirtanni dirrite baaru giddo eˈe reyitu.
33 Allaalaasine kayinni xooqqe katama hadhe, agaaninte amaddino manni aana ikkinorenna wole baalankare mannaho odeessitu.
34 Hakkiinni katamu manni baalu Yesuusinni xaadara fuli; mannuno iso afiti qooxeessinsanni agure haˈranno gede huucciˈri.
Lekkaalliidi Qaagiishshuwa
^ Woy “kumbuule.”
^ Noo gedeenni tirriro, “keereensattoera.”
^ Noo gedeenni tirriro, “keeraaˈmi.”
^ Noo gedeenni tirriro, “keereensisi.”
^ Woy “hoodeˈya daa agurtooti.”
^ Woy “togo mayira waajjitine qece yitinanni?”
^ Woy “qaagooshshu waamma.”
