Maatewoosi Wongeella 9:1-38
9 Hakkunni gedensaanni, Yesuusi yowolo gidde baara tayise umisi katama* dayi.
2 Hakkiicho mannu rerete goxinoha mitto laanshaawino mancho isiwa haaˈre dayi. Yesuusino ammanansa lae laanshaawino mancho “Beettoˈya waajjitooti! Cubbokki maarroonnihena” yiisi.
3 Hatte yannara mite seeru rosiisaano wodaninsanni, “Kuni manchi Magano xonanni no” yite heddu.
4 Yesuusino giddonsata afe togo yiinsa: “Wodaniˈnenni bushare heddinannihu mayiraati?
5 ‘Cubbokki maarroonnihe’ yaatenna ‘Kaˈe haˈri’ yaate giddo shottannoti hiitteeti?
6 Ikkollana manchi Beettira uullate aana cubbo gatona yaate silxaane noosita affinara hasiˈreemmo.” Hakkiinni laanshaawino mancho “Kai, rerekki duqqite minikkira haˈri” yiisi.
7 Manchuno kae minisira haˈri.
8 Mannu tenne lae lowo geeshsha waajji; qoleno mannaho togoo silxaane uyino Magano ayirrisi.
9 Yesuusi hakkiinni kae haˈranni heeˈre, Maatewoosi yinanni manchi qaraxo qaranxanni darga ofolle nooha afe, “Hoodeˈya amo” yiisi. Isino kae hoodesi haˈri.
10 Hakkunni gedensaanni, Yesuusi Maatewoosi mine sagale itanni heeˈreenna, lowo qaraxaasinenna cubbaataammi dagge Yesuusinna rosaanosi ledo sagale ittu.
11 Farisootu kayinni tenne laˈe rosaanosi, “Rosiisaanchiˈne qaraxaasinetenna cubbaataammu ledo itannohu mayiraati?” yitu.
12 Yesuusino insa yitinota macciishshe togo yiinsa: “Xagisaanchu hasiisannohu dhiwantinoriraati ikkinnina fayyu mannira diˈˈikkino.
13 Konnira hadhine, ‘Ani hasiˈreemmoti maarote ikkinnina kakkalo diˈˈikkitino’ yaanno qaali mayyaatero huwatte. Korkaatuno ani dayoommohu keeraano ikkikkinni cubbaataamma woshshammoraati.”
14 Hakkiinni Yohaannisi rosaano Yesuusiwa dagge, “Ninkenna Farisootu duucha woyite xoommanna ate rosaano kayinni xoontannokkihu mayiraati?” yite xaˈmitu.
15 Hatte yannara Yesuusi togo yiinsa: “Mushurrichu ledonsa heeˈri geeshsha mushurrichu jaalla dadillitanno gede assannonsari mayi no? Ikkollana mushurricha insawiinni haaˈne hoollanni yanna dagganno; insa hakkawoyite xoontanno.
16 Akkala uddanora haaro hocco qaaffisiˈranno manchi dino; hatto assiro haaru hocci duuranno daafira uddanote dadhamme lexxitanno.
17 Qoleno mannu haaro woyine akkalu woyinete ogorira diwodhanno. Hatto assiro ogoru dhoohanno, woyine duˈnantanno, ogoruno baˈˈanno. Ikkollana mannu haaro woyine haaru woyinete ogorira wodhanno; hakko daafira lamunkuri dibaˈˈanno.”
18 Yesuusi konne coye kulanni heeˈreenna, mittu xaadu mini roorrichi isiwa daye guluphe* togo yii: “Qaaqqoˈya kawoote reyitukki digattino; ikkollana ati dagge anga aanaho worittosero galagalte heeshshote heedhanno.”
19 Hakkiinni Yesuusi kae, rosaanosi ledo manchu hoode haˈri.
20 Hadhanni heedheenna, mitte 12 diro mundee duˈnantannase shette heedhanno mancho, badheenni higge dagge uddanosi qacce kissu.
21 Ise hatto assitinohu, “Uddanosi calla nafa kisummaro hureemma” yite heddino daafiraati.
22 Yesuusino ise caaqqi yee lae, “Beettoˈya, waajjitooti! Ammanakki hursitinohena” yiise. Manchono hakkawoyintenni hurtu.
23 Yesuusi xaadu mini roorrichi qae iilliti, suusulle ufuufannonna wiˈlanni didanno manna lae,
24 togo yii: “Hanni gobbara fulle; qaaqqo goxxinollana direyitino.” Insa kayinni arrassitanni osoˈlitu.
25 Manna mininni fushshihu gedensaanni, Yesuusi ise noowa mare angase amadi; qaaqqono kaˈu.
26 Kuni duduwi hatte gobba woˈmate duduwami.
27 Yesuusi hakkiinni kae haˈranni heeˈreenna, lamu ballooti “Daawiti Beetto mararinke”* yite raartanni hoodesi hadhu.
28 Minira eihu gedensaanni ballootu isiwa daggu; Yesuusino “Ani illeˈne fanammora dandeemmota ammantinanni?” yee xaˈminsa. Insano, “Ee Mooticha” yite qoltu.
29 Hakkiinni isi illensa amammade “Ammanaˈne gede ikkoˈne” yiinsa.
30 Illensano faˈnantu; Yesuusino, “Konne coye mittu manchirano kultinoonte” yee seekke qorowisiisinsa.
31 Ikkollana insa fultuhu gedensaanni hakko qooxeessira baalaho isire dudubbu.
32 Insa hadhanni heedheenna, mannu agaaninte amaddinoha mitto danqicha mancho isiwa haaˈre dayi;
33 Yesuusi agaaninte fushshisihu gedensaanni danqichu manchi coyiˈri. Mannu tenne dhagge assiˈre, “Israeelete gobbara togoo coye laˈne diegenninoonni” yii.
34 Farisootu kayinni, “Isi agaaninte fushshannohu agaanintete roorrichi* wolqanniitilla” yitu.
35 Yesuusino xaadu minnansara rosiisanni, Maganu Gashshootiha dancha duduwo sabbakanninna baalunku gari dhibbanna xisso hursanni, katammatenna qachuwate haˈrami.
36 Yesuusi isiwa dayino manna lai yannara, allaalaanchu nookki geˈreewi gede madiˈrenna tugame noo daafira lowo geeshsha mararinsa.
37 Hakkiinni Yesuusi rosaanosira togo yiinsa: “Gidu lowoho; gide midanno manni kayinni shiimaho.
38 Konnira gatu Anni middannore soyanno gede huuccidhe.”
Lekkaalliidi Qaagiishshuwa
^ Kuni, Yesuusi Galiilaho soqqami yannara duucha woyite fooliishshiˈrannoho Qifirinaahoomi katamaati.
^ Woy “kumbuule.”
^ Woy “maarinke.”
^ Daawuloosiiti.
