Roomu Sokka 13:1-14
13 Mannu* baalu aliidi gashshaanora maahoyye yee galo; korkaatuno silxaane baala afiꞌnannihu Maganuwiinniiti; gashshite noori quwu noota* silxaanensa afidhinohu Maganuwiinniiti.
2 Hakko daafira, silxaane noonsarira hajajama giwannohu baalu Maganu qixxaawo giwanno; tenne qixxaawo gibbannori qoricha adhitanno.
3 Gashshaasine busha assitannore ikkinnina dancha assitannore diwaajjishshanno. Konnira gashshaancho waajja hasiꞌrattokkiha ikkiro, woꞌmanka woyite danchare assi; hatto assittoro isi galatannohe;
4 korkaatuno isi ate kaaꞌlanno gede Maganu worino soqqamaanchooti. Gashshaanchu bise mulla diqodhinona busha assattoha ikkiro iso waajji. Isi busha assitannore qorichishe* rabbisannoho Maganu soqqamaanchooti.
5 Konnira hanqo waajjitine calla ikkikkinni tiiꞌꞌiꞌnera yitine maahoyye yitine gala hasiissannoꞌne.
6 Qaraxo murtinannihuno iseraati; korkaatuno insa woꞌmanka woyite manna baalaho soqqantannoreeti Maganu soqqamaanooti.
7 Baalunkura hasiisannore uuyye: qaraxo xaꞌmannohura qaraxo, giwire xaꞌmannohura giwire uuyye; waajjinasira hasiꞌrannoha waajje; ayirrinsasira hasiꞌrannoha ayirrisse.
8 Mimmitiꞌne ledo baxama agurranna ayerano asalu heeꞌroonkeꞌne; manna baxannohu baalu seera wonshino.
9 Korkaatuno, “Soorritooti, shitooti, moortooti, yortooti” yaanno seeranna wole baalanta hajajo “Olliichokki* umikki gede assite baxi” yitanno hajajo xaphi assite amaddino.
10 Baxillu olliichisira busha coye diassanno; hakko daafira manna baxannohu seera wonshino.
11 Heeꞌnoommo yanna affinoonni daafira konne coye asse; ammaꞌninummo yannanni roore xa gatonke gambissino daafira goxichunni baqqi yitinanni saate xaati.
12 Hashshu saꞌꞌaraati; barruno gambisino. Konnira tunsichu looso fushshine hunne xawaabbunniha olu uduunne uddiꞌno.
13 Barra xawaabbaho haꞌramanno manni gede danchu amanyootinni millinso ikkinnina jila jille ikkinannikkita ikka,* dimba, foorre, mancaꞌꞌa ikkito,* gibbonna hinaaso agurro.
14 Mooticha Yesuusi Kiristoosi uddidhe; maalu hasatto wonshiꞌrate mixo fushshidhinoonte.
Lekkaalliidi Qaagiishshuwa
^ Woy “lubbo.”
^ Silxaanensa deerri addi addiha ikkinotanna silxaanensa woꞌmanka woyite Maganu silxaanera woriidita ikkitinota leellishshanno.
^ Woy “hanqe.”
^ “Olliicho” yine tirroonnihu Giriikete Afii qaali, qachu manna calla ikkikkinni manna baala xawisannoha ikkara dandaanno.
^ Woy “makkala.”
^ Woy “saalimale ikkito.”