Roomu Sokka 6:1-23
6 Ikkina mayineemmo? Maganu elto batidhanno gede cubbo loonsanni heeꞌno?
2 Deeꞌni! Cubbu giddonni keere fulloommori* xaate cubbu giddo hiitto ikkine heeꞌneemmo?
3 Woy Kiristoosi Yesuusi giddo cuuammoommori baalu isi reyo giddono cuuammoommota diaffinoonni?
4 Konnira Kiristoosi Annu ayirrinyinni reyotenni kainte gede, ninkeno haaro heeshsho heeꞌnammora isi reyo giddo cuuamme ledosi madaarammoommo.
5 Isite gedee reyo reyine isi ledo mitto ikkinummo geeshsha isite gedee kao kaꞌne isi ledo mitto ikkineemmotano dihuluullammeemmo.
6 Korkaatuno cubbaataame mannimmanke wolqiweeltanno gedenna xaate cubbu borojje ikkine heeꞌneemmokki gede, akkala mannimmanke isi ledo haqqaho sutantinota anfoommo.
7 Mayira yiniro, reyino manchi cubbisinni keere fulino.*
8 Qoleno Kiristoosi ledo reyinummoro isi ledo heeꞌneemmotano ammanneemmo.
9 Kiristoosi xa reyotenni kainotanna layinkimeeshsho reyannokkita anfoommo; xaate reyo isi aana dimookkanno.
10 Korkaatuno isi cubbo haaꞌre hoolara mitte hige, higge higgannokki reyo reyino; xa heeꞌranno heeshsho kayinni Maganoho heeꞌrannote.
11 Hatteente gede, kiꞌneno cubboho reyitinoonnihu, Kiristoosi Yesuusinni kayinni Maganoho heedhinoonnihu gede assitine hedde.
12 Konnira cubbu mannimmaꞌne yortora borojje ikkitinanni gede asse, reyitanno mannimmaꞌnera moohe heeꞌrara wodhitinoonte.
13 Mannimmaꞌne* bunshete uduunnicho* assitine cubboho shiqishshinoonte; hatteentenni reyotenni heeshshote saino manni gede assitine kiꞌneneeto Maganoho shiqishshe; mannimmaꞌneno* keeraanchimmate uduunnicho assitine Maganoho shiqishshe.
14 Korkaatuno kiꞌne eltote anga ikkinnina Seeru anga heedhinoonnikki daafira cubbu aanaꞌne moohara wodhitinoonte.
15 Xa mayineemmoyya? Seeru anga ikkikkinni eltote anga heeꞌnoommo daafira cubbo loonso yaateni? Horonta hatto yaa diꞌꞌikkino!
16 Borojje ikkitine hajajamate ayerano kiꞌneneeto shiqishshiniro, hakkunni hajajantinannihura borojje ikkitinoonnita diaffinoonni? Hakko daafira kiꞌne reyonniwa massanno cubbira woy keeraanchimmanniwa qolte massitanno hajajamara borojjeho.
17 Kiꞌne alba cubbu borojjeeti; xa kayinni uyinoonniꞌne rosira woꞌmu wodaninni hajajantinoonni daafira Maganoho galatu iillosi.
18 Ee, cubbu borojjimmanni wolaphitine keeraanchimmate borojje ikkitinoonni.
19 Ani manna baalaho leellanno garinni xawise coyiꞌranni noommohu maaliꞌne laafa ikkino daafiraati; alba busha coye assate mannimmaꞌne battetenna bunshete borojje assitine shiqishshininte gede, xa kayinni qullaawa coye assate mannimmaꞌne keeraanchimmate borojje assitine shiqishshe.
20 Cubbu borojje ikkitine heedhinoonni yannara keeraanchimmate looso loossinanni diqarrantinoonni.
21 Hatte yannara laaltinoonni gumi hiittoohoyya? Xa saalfachishannoꞌneho. Konni coyi gawalo reyote.
22 Xa kayinni cubbuwiinni wolaphitine Maganu borojje ikkitinoonni daafira, qullaambete doogora guma laaltinanni heedhinoonni; tenne doogo gawalo hegere heeshshooti.
23 Cubbunni afiꞌnanni damoozi reyote. Mootichinke Kiristoosi Yesuusi widoonni Maganu aanno baraarshi kayinni hegere heeshshooti.
Lekkaalliidi Qaagiishshuwa
^ Noo gedeenni tirriro, “cubboho reyinoommori.”
^ Woy “tidhamino; cubbosi gatona yinoonnisi.”
^ Noo gedeenni tirriro, “bisu kifillaꞌne.”
^ Noo gedeenni tirriro, “olu uduunne.”
^ Noo gedeenni tirriro, “bisu kifillaꞌneno.”
