Roomu Sokka 7:1-25
7 Roduuwa, Seeru mittu manchi aana wolqa afiꞌrannohu hakku manchi lubbote noo geeshsha calla ikkinota diaffinoonni? (Coyiꞌranni noommohu Seera afino manniraati.)
2 Lawishshaho, mine assidhino mancho minaannise lubbote noo geeshsha isi ledo seerunni usurantinote; minaannise reyanno woyite kayinni minaannise seeriwiinni tidhantanno.
3 Hakko daafira, minaannise lubbote heeꞌreenna wolu manchita ikkituro soorritino yinannise. Minaannise reyiro kayinni, isi ledo usurinose seeriwiinni tidhantanno daafira wolu manchita ikkituro soorritino diyinannise.
4 Konnira roduuwaꞌya, kiꞌneno woluyire yaano reyotenni kainohu Kiristoosire ikkitinanni gede, isi mannimma widoonni Seeraho reyitinoonni;* kuni ikkinohu Maganoho guma laalleemmo gedeeti.
5 Korkaatuno alba maalu hasatto garinni heeꞌnoommo yannara, Seeru xawo fushshinoti cubbu yorto reyote guma laallammora mannimmanke* giddo loossanni no.
6 Xa kayinni Seeru amade millo miliqqo hoꞌlannonkekki daafira Seeruwiinni keere fulloommo;* hakko daafira borreessinoonnihu akkalu Seerinni ikkikkinni, haaru garinni qullaawu ayyaaninni Maganoho borojje ikka dandiineemmo.
7 Ikkina xa mayineemmoyya? Seeru cubbohoni? Deeꞌni! Halaale coyiꞌniro Seeru hoogoommero cubbu maatiro diafeemmo. Lawishshaho, Seeru “Yortooti” yaa hoogoommero yorto maatiro diafeemmo.
8 Ikkollana cubbu tenne Seeru hajajo widoonni faro afiꞌre duuchunku gari yorto giddoꞌya heedhanno gede assino; Seeru nookki yannara cubbu reyinoho.
9 Seeru nookki waro heeshshote noommo. Seeru hajajo dagguta kayinni cubbu galagale heeshshonniha ikki; ani kayinni reyummo.
10 Heeshshonniwa massitaera hendoonniti Seeru hajajo reyonniwa massitinoe.
11 Korkaatuno cubbu Seeru hajajo fantino faro widoonni hige soꞌrisiisinoe; qoleno tenne hajajo widoonni shiinoe.
12 Hakko daafira, Seeru qullaawaho; hajajono qullaawate, keeraanchotenna danchate.
13 Ikkina kuni danchuri anera reyo abbinoe yaateni? Deeꞌni, hatto yaa diꞌꞌikkino! Reyo abbinoehu cubboho; cubbu mayimma leeltanno gede, danchuri widoonni hige anera reyo abbinoehu cubboho; Seeru hajajono cubbu mageeshshi geeshsha busha ikkinoro leellishshino.
14 Seeru ayyaanaamo ikkinota anfoommo; ani kayinni cubboho hiramoommoho shama maalaati.
15 Maa assanni noommoro diwodancheemmoho. Assa hasiꞌreemmore agure giweemmore asseemmo.
16 Assa hasiꞌreemmokki coye asseemmoha ikkiro, Seeru danchaho yaanni noommo.
17 Ikkollana konne coye assannohu giddoꞌya noo cubbooti ikkinnina ane diꞌꞌikkoommo.
18 Korkaatuno giddoꞌya yaano maaliꞌya giddo mittuno danchu coyi nookkita afoommo; dancha coye assate halcho nooe; konne coye assate wolqa kayinni dinoe.
19 Assa hasiꞌreemmoha dancha coye diasseemmo; assa hasiꞌreemmokkiha busha coye kayinni asseemmo.
20 Assa hasiꞌreemmokki coye asseemmoha ikkiro, konne coye assanni noommohu ane ikkummokki giddoꞌya heeꞌranno cubbooti yaate.
21 Kuni Seeri giddoꞌya annate noota huwatoommo; ani gara ikkinore assa hasiꞌreemmo woyite ledoꞌya noori kayinni bushareeti.
22 Giddoyidi mannimmaꞌya Maganu seerinni lowo geeshsha hagiidhitanno;
23 mannimmaꞌya* giddo kayinni surreꞌya seeri ledo qasamannohunna mannimmaꞌya* giddo noohu cubbu seerira usuranya asse aannoehu wolu seeri noota laoommo.
24 Ani isi hiittoo qarraataamooti! Tenne reyowa massitannoe mannimmawiinni ayi gatisannoe?
25 Yesuusi Kiristoosi widoonni gatisannoe Magani galatamo! Ani surreꞌyanni Maganu seerira borojjichoho; maaliꞌyanni kayinni cubbu borojjichooti.
Lekkaalliidi Qaagiishshuwa
^ Woy “Seeruwiinni keere fultinoonni.”
^ Noo gedeenni tirriro, “bisu kifillanke.”
^ Noo gedeenni tirriro, “amade millo miqqo hoolinonke seerira reyinoommo.”
^ Noo gedeenni tirriro, “bisu kifillaꞌya.”
^ Noo gedeenni tirriro, “bisu kifillaꞌya.”
