Soqqamaasinete Looso 16:1-40
16 Hakkiinni Phaawuloosi Derbenna Lisxira haꞌri; hakkiicho mittu Ximootewoosi yinanni rosaanchi no; amasi ammantino Ayihuditteeti; annisi kayinni Giriikichaho;
2 Lisxirahonna Iqooniyooni heedhanno roduuwi Ximootewoosi danchumma coyidhanno.
3 Phaawuloosi, Ximootewoosi ledosi adhe haꞌra hasiꞌrannota kuli; annisi Giriikicha ikkinota mannu baalu afino daafira, hakko qooxeessira heedhanno Ayihudootira yee iso masse barcinshiishi.
4 Insa katammate giddoonni higge saꞌanni hakko heedhannori baalu Yerusaalamete noo soqqamaasinenna cimeeyye hasaabbe wortino wodho agadhitanno gede kultunsa.
5 Hakkiinni songuwa ammanatenni jawaattanni, kiironsano barru baala lexxitanni hadhu.
6 Qoleno qullaawu ayyaani Iisiyu qoqqowira qaale kultannota hoolinonsa daafira, Firgiyunna Galaatiyu widoonni higge saꞌe hadhu.
7 Miisiya dirrituti Biitiiniyu qoqqowo eꞌara woꞌnaaltu; ikkollana Yesuusi ayyaani difajjinonsa.
8 Konnira Miisiyu widoonni* higge saꞌe Xiroaasi dirritu.
9 Phaawuloosi hakko hashsha mittu Meqedooniyu manchi albasiinni uurre, “Meqedooniya dagge kaaꞌlinke” yee huucciꞌranna ajuujatenni lai.
10 Phaawuloosi tenne ajuuja laihu gedensaanni, Maganu dancha duduwo dudumbammonsara woshshinonke yine hende hakkawoyintenni Meqedooniya haꞌnammora kaꞌnummo.
11 Konnira Xiroaasinni yowolo giddine doogote uurrinummokkinni Samotiraaqe giddicho haꞌnummo; layinki soodo kayinni Neyapoliisi katama marrummo;
12 hakkiinni kaꞌne Filiphisiyusi iillinummo; Filiphisiyusi Meqedooniyu qoqqowira qara katamaati; kuni katami Roomu gashshooti anga nooho; hakko katamira shiima barra keeshshinummo.
13 Sambatu barra mannu huuccatto assiꞌrara gamba yaanno bayichooti yine hendoommowa katamu waalchi gobbaanni lagu qacce marrummo; hakkiicho ofolline gamba yiino meento hasaawinsummo.
14 Tiyaaxirooni kataminni dagginoti, duume xiillitte uddano hirtannotinna Magano magansidhannoti Liidiya yinanni mancho macciishshitanni no; ise Phaawuloosi coyiꞌranni noore wodanchitanno gede Yihowa wodanase halashshe fani.
15 Isenna minise manni cuuamihu gedensaanni, “Ane Yihowara ammanantinote yitine heddinannieha ikkiro, daggine mineꞌya fooliishshidhe” yite eeggifattunke. Minisera eꞌneemmo gedeno wotto wortunke.
16 Mitto barra huuccattote dargira haꞌnanni heeꞌne battete ayyaaninni kiiltannote mitte soqqamaanchonni xaandummo. Ise kiilte mootoollasera lowo woxe gamba assitanno.
17 Tini mancho hoodenke hadhanni, “Kuni manni Woꞌmunkura Aliidi Magani borojjootaati; insa kiꞌnera gatote doogo dudubbanni nooꞌne” yitanni cancitu.
18 Ise lowo barra marro marro higge hatto yite cancitu. Konnira Phaawuloosi caaccaawe caaqqi yee lae hakko ayyaana togo yii: “Yesuusi Kiristoosi suꞌminni ise giddonni fulatto gede hajajeemmohe.” Battete ayyaanino hakkawoyintenni fuli.
19 Mootoollaseno abbitannonsa woxi gatinota affuti Phaawuloosinna Silaasi amadde goshooshshanni gashshaasinenniwa dikko massitu.
20 Hakkiinni insa roorrootunniwa haadhe hadhe togo yitu: “Kuri Ayihudooti katamanke lowo geeshsha cancishshanni no.
21 Qoleno ninke Roomu manni adhanna harunsa hasiissannonkekki bude rosiissanni no.”
22 Hakko noo manni baalu insara hanqe kai; roorrootuno uddanonsa mulqite kaꞌe dullunni gannanni gede hajajju.
23 Lowo geeshsha gantunsahu gedensaanni usuru minira eessite, agaraanchu insa seekke agaranno gede hajajju.
24 Agaraanchu hatto yine hajanjoonnisi daafira insa usuru mine giddoyidi kifile masse lekkansa haqqaho qole biqe usuri.
25 Ikkollana hashshu taalootira Phaawuloosinna Silaasi huuccatto assidhanninna faarsotenni Magano guwisidhanni no; wolu usuranyino tenne macciishshanni no.
26 Hedeweelcho baatto shafanteenna usuru mini tenqe yii. Waalchuwano bayichonko faꞌnantu; usuranyu baalu sansalateno tidhantu.
27 Agaraanchu baqqi yaanno woyite usuru mini waalchuwa faꞌnante noota afe, usuranyu fule bainoha laweennasi isonoo shaara bise fushshiꞌri.
28 Phaawuloosi kayinni qoonqosi naggi asse, “Ninke baalunku kowiicho heeꞌnoommona umokki galaaffattooti!” yee coyiꞌri.
29 Agaraanchuno caabbicho abbisiisiꞌre dodanni giddora eꞌꞌe, qece yee huxiꞌranni Phaawuloosinna Silaasi albaanni diriire uwi.
30 Insa gobbara fushshe, “Mootoollaꞌya, gateemmo gede maa asso?” yii.
31 Insano, “Atino minikki mannino gattinannina Mooticha Yesuusa ammani” yitusi.
32 Hakkiinni isiranna minesi noo mannira baalaho Yihowa qaale kultunsa.
33 Usuru mini agaraanchi hashsha hatte saatera masse madansa hayishshi. Hakkiinni isinna minisi manni baalu hakkawoyintenni cuuami.
34 Qoleno minisira masse hurbaate itisinsa; Magano ammanino daafira, isino minisi manni baaluno lowo geeshsha hagiidhi.
35 Soodita roorrootu, “Hakkoye manna tiri” yite kultasira olanto sokku.
36 Usuru mini agaraanchino sonkoonni sokka Phaawuloosira togo yee kuli: “Roorrootu manna sokke kiꞌne lamenka tirrona yitinona, xa fultine keerunni hadhe.”
37 Phaawuloosi kayinni togo yiinsa: “Ninke Roomu manna ikkine heeꞌneenna doogimale* mannu albaanni gante usuru minira eessitinonke. Xa kayinni mannu afikki maaxxe fushshite tuggankera hasidhino? Gimboommo, insa uminsa dagge fushshitonkena.”
38 Olantono konne coye roorrootaho marte kultu. Roorrootuno insa Roomu manna ikkitinota macciishshituti lowo geeshsha waajjitu.
39 Konnira dagge huuccidhunsa; usuru mininni haadhe fushshite katamunni fulte hadhanno gede ayirrinyunni xaꞌmidhu.
40 Insa kayinni usuru mininni fulte Liidiya minira hadhu; hakkiicho roduuwunni xaadde jawaachishshunsahu gedensaanni fulte hadhu.
