Soqqamaasinete Looso 20:1-38
20 Cancu gaꞌlabbi yiita Phaawuloosi rosaano woshshiishe jawaachishinsahunna keerunni yiinsahu gedensaanni Meqedooniya haꞌri.
2 Saꞌꞌanno katammara heedhanno rosaano lowo geeshsha jawaachishanni Giriike iilli.
3 Hakkiicho sase agana keeshshi; ikkollana yowolotenni Sooriya haꞌrara kae heeꞌre Ayihudootu gano gantinosi daafira hedinore agure Meqedooniyu widoonni hige higara kai.
4 Beeriyunni dayinohu Phayiroosi beetti Sophaxiroosi, Teselonqenni dagginori Arisxirookoosinna Sikonduusi, Derbenni dayinohu Gayiyoosi, Ximootewoosi hattono Iisiyu qoqqowinni dagginori Tikiqoosinna Xiroofimoosi ledosi no.
5 Insa balaxxe hadhe Xiroaasi agarte noonke;
6 ninke kayinni Shiishinokki Timi Ayyaani saihu gedensaanni, yowolo giddine Filiphisiyusinni kaꞌne ontu barri giddo insa noowa Xiroaasi iillinummo; hakkiicho lamala barra keeshshinummo.
7 Lamalate umi barra sagale intammora gamba yine heeꞌneenna, Phaawuloosi layinki soodo haꞌranno daafira gamba yiino mannira qaale kulanni hashshu taalooti geeshsha keeshshi.
8 Gamba yine heeꞌnoommohu minu aana minnoonni minira lowo caabbiyye no.
9 Phaawuloosi coye seedisita maskootete aana ofolle nooha Awuxekiisi yinanniha mitto wedellicha mugichu amadisi; mugichu amadinosi daafira layinki fooqenni uwi; mannu mare kayisanno woyite reyino.
10 Hakkiinni Phaawuloosi dirre beettu aana gombisame iso hanqafe, “Lubbote noona cancitinoonte”* yii.
11 Phaawuloosi galagale minu aana minnoonni minira fule, mannu sagale itanno gede asse* isino iti. Hashsha hasaawanni gale hakkiinni kae haꞌri.
12 Beetto minira haadhe hadhu; reyotenni kaino daafirano lowo geeshsha sheshifattu.
13 Ninkeno markaawe giddine Phaawuloosi uyinonke biddishshi garinni balanxe Asoosi yinanniwa haꞌnummo; hatto assinoommohu Phaawuloosi Asoosi geeshsha lekkatenni daa hasiꞌrino daafira hakkiicho xaande iso markaawetenni haaꞌne haꞌnammora hendeeti.
14 Konnira isi ledo Asoosi xaande markaawetenni Mixiliini haaꞌne haꞌnummo.
15 Layinki soodo hakkiinni kaꞌne markaawetenni Kiyoosira albaanni noo darga marrummo; aane noo barra Saamoosi yinanniwa shiima geeshsha taxxi yinummo; hakkiinni layinki soodo Miliixini iillinummo.
16 Phaawuloosi Iisiyu qoqqowira horo keeshsha hasiꞌrinokki daafira, Efessooni sae haꞌrara hedino; korkaatuno dandiiro Phenxeqosxete Ayyaani barra Yerusaalame iillara muddame no.
17 Ikkollana Miliixini heeꞌre manna Efessooni soye songote cimeeyye woshshiishi.
18 Cimeeyyeno isiwa dagguta togo yiinsa: “Mite yee lekkaꞌyanni Iisiyu qoqqowo kaxxummo barrinni kayise, mereeroꞌne hiitto ikke heeꞌroommoro seekkitine affinoonni;
19 Ayihudootu gantinoe ganonni lowo qarri iillierono lowo geeshsha umoꞌya heeshshi asse hindiiddotenni Mootichaho soqqamoommo;
20 qoleno gudumaalehonna minunni mine haꞌre rosiisummoꞌne yannara kaaꞌlannoꞌnere baala kuloommoꞌne ikkinnina mittoreno badhera diqoꞌloommo.
21 Ayihudootuno Giriikootuno maaro adhite Maganunniwa higganno gedenna Mooticha Yesuusa ammantanno gede seekke farciꞌroommo.
22 Xa kayinni hakko mayi iillannoero afoommokkiha ikkirono, qullaawu ayyaanira hajajame* Yerusaalame haꞌranni noommo;
23 mareemmo katamma baalate usurameemmotanna qarru amadannoeta qullaawu ayyaani hige hige kulannoe.
24 Ikkollana qolchanshoꞌyalla gudummoro hattono Maganu eltoha dancha duduwo seekke farciꞌre Mootichu Yesuusiwiinni adhoommo soqqansholla umo fushshummoro heeshshoꞌya* horo dimarareemmo.*
25 “Maganu Gashshoote sabbakoommoꞌneri kiꞌne giddo mittuno galagaltine laꞌinanniekkita afoommo.
26 Mannu baalunku mundeera xaꞌmameemmokkita techo kiꞌne naqaashshe ikkeꞌꞌe;
27 togo yoommoꞌnehuno Maganu hedinore baala mittoreno badhera qoꞌlummokkinni kuloommoꞌne daafiraati.
28 Umiꞌneranna qullaawu ayyaani towaattinanni gede shoominoꞌne hoshsha baalate qorophe; hakkuno Maganu Beettisi mundeenni woxxinota songosi allaaltinanni gedeeti.
29 Ani haꞌrummohu gedensaanni kaajjadda hiyyeeyye mereeroꞌne eꞌannotanna hoshsha shaqqillunni towaattannokkita afoommo;
30 kiꞌne mereerinnino rosaano insawa qoꞌlitara shokkashsho coye coyidhannori kaꞌanno.
31 Konnira baqqi yitine agadhe; sase diro woꞌma hashshanna barra kiꞌne mitto mittonka hindiiddo giggishshiꞌranni amaalummoꞌneta qaagge.
32 Xaano ikkiro, Maganohonna eltote qaalisira kiꞌne eeggo oommo; kuni qaali, dhaawannoꞌnehonna qullaawootu baalu ledo ragge aannoꞌneho.
33 Ani mittu manchi birra, culka woy uddano yore diegennoommo.
34 Angaꞌyanni loose aneranna ledoꞌya noorira hasiisannore wonshoommota kiꞌnenni affinoonni.
35 Kiꞌneno jawaattine loossinanni wolqa hoogginore kaaꞌlitinanni gede, baalunku raginni leellishoommoꞌne; Mootichu Yesuusi umisi, “Adhannonkunni aannohu roore hagiirraamoho” yee coyiꞌrino qaale woꞌmanka woyite qaagge.
36 Konne coye coyiꞌre kaihu gedensaanni baalunku ledo guluphe huuccatto assiꞌri.
37 Hakkiinni insa baalunku lowo geeshsha wiꞌlitu; Phaawuloosino hanqaffe* kimmi assite sunqitusi;
38 roore dadillitinohu ‘Xaate albaꞌya dilaꞌinanni’ yee coyiꞌrino daafiraati. Hakkiinni markaawe noo geeshsha geegiissitusi.
Lekkaalliidi Qaagiishshuwa
^ woy “lubbosi giddo noona cancitinoonte.”
^ Noo gedeenni tirriro, “daabbo hiiqqaqqe.”
^ woy “qullaawu ayyaani kakkayiseennae.”
^ Woy “lubboꞌya.”
^ Woy “heeshshoꞌya assitannoeri dino.”
^ Noo gedeenni tirriro, “goowisira marmarante.”
