Yohaannisi Wongeella 6:1-71
6 Hakkunni gedensaanni Yesuusi Galiilu Baara yaano Xibiriyadoosi Baara tayise widoonni fuli.
2 Lowo manni Yesuusi dhiwantinore hurse loosino maalale laino daafira hoodesi haꞌranni no.
3 Konni daafira, Yesuusi ilaala fule rosaanosi ledo hakko ofolli.
4 Hatte yannara Ayihudootunnihu Faasiku ayyaani rahe no.
5 Yesuusi lowo manni isiwa hige daanna lae Filiphoosi, “Kuni manni itanno daabbo mamiinni hirro ikka?” yii.
6 Ikkollana isi hatto yiinohu giddosita afara yeeti ikkinnina assannore afe no.
7 Filiphoosino togo yee qolisi: “Mitto mittoho shiima shiima nafa iillishate lame xibbe diinaarenni* hirroonni daabbo diꞌꞌikkitanno.”
8 Hakkiinni rosaanosi giddonni mittu Simooni Pheexiroosi rodii Indiriyaasi togo yiisi:
9 “Onte hayixu timmanna lame shiimmaadda qulxuꞌme haaꞌrinohu mittu shiimu qaaqqi kowiicho no. Ikkollana kuni kageeshshi mannira hiitto ikke tuqanno?”
10 Yesuusino, “Mannu ofollanno gede asse” yii. Hakkiicho lowo hayisso noo daafira mannuno ofolli; labballu mito 5,000 ikkanno.
11 Yesuusi daabbo haaꞌre galatihu gedensaanni, hakko ofolle noo mannira iillishi; shiimmaadda qulxuꞌmeno hatto assi; insano hasidhu geeshsha adhitu.
12 Mannu ite duuwihu gedensaanni isi rosaanosi, “Mitturino baꞌꞌannokki gede gatino giggilo gamba asse” yiinsa.
13 Konnira, mannu onte hayixu timma iteenna gatino giggilo gamba assitu; gamba assitinohuno 12 gimboola woꞌma ikki.
14 Mannu isi loosino maalale laiti, “Alame daanno yini Masaalaanchi addinta isooti” yii.
15 Hakkiinni insa dagge amadde moohissasira heddinota afe, albinsanni hoꞌle galagale callisi ilaala haꞌri.
16 Hashshita rosaanosi baara dirritu;
17 hakkiinni yowolo giddite baara tayisse Qifirinaahoomi hadhara kaꞌu. Hatte yannara tunse nooha ikkirono Yesuusi insawa didayino.
18 Qoleno wolqaataame bubbe bubbissanni noo daafira baaru shafami.
19 Ikkollana insa laaqidhanni mite onte woy lee kiilo meetire* hadhuhu gedensaanni, Yesuusi baaru aana lekkatenni haꞌranni yowolote mulira iilla rahe nooha laꞌe waajjitu.
20 Isi kayinni, “Aneetina waajjitinoonte!” yiinsa.
21 Hakkiinni hagiidhite yowolote giddora haadhusi; yowolono insa hadhanni noowa rakke iillitu.
22 Layinki soodo baara widoonni gatino manni, hakkiicho mitte yowolono nookkita afi. Wona hakkiicho mitte shiima yowolo no; Yesuusi kayinni rosaanosi ledo hatte yowolonni dihaꞌrino; rosaanosi kayinni calluwinsa hadhino.
23 Ikkollana Xibiriyadoosinni daggino yowolla, Mootichu Magano galateenna mannu daabbo iti qooxeessa iillitu.
24 Konnira mannu Yesuusino rosaanosino hakkiicho nookkita afiti, yowollansa gidde Yesuusa hasara Qifirinaahoomi dayi.
25 Iso baara widoonni affuti, “Rosiisaancho, kawira mamoote dayitto?” yitusi.
26 Yesuusino togo yee qolinsa: “Halaale halaale yeemmoꞌnena, hassinanni heedhinoonniehu daabbo ittine duubbinoonni daafiraati ikkinnina maalale laꞌinoonni daafira diꞌꞌikkino.
27 Baꞌanno sagalera ikkikkinni hegere heeshsho afiꞌnanni gede assitannote, manchi Beetti aannoꞌnete geeddanno sagalera loosidhe; korkaatuno Annu yaano Maganu umisi isi hatto assara fajjino.”*
28 Konnira insa, “Magano hagiirsiisanno looso loosate maa assino?” yitusi.
29 Yesuusino, “Magano hagiirsiisanno loosi isi soyinoha ammanate” yiinsa.
30 Hakkiinni insa togo yitusi: “Laꞌne ammanneemmohe gede mayi malaate leellishattonke? Maa loosatto?
31 ‘Ittanno gede iiminni sagale uyinonsa’ yine borreessinoonni garinni, albi annuwanke halalla mennaho yinanni sagale ittino.”
32 Yesuusino togo yiinsa: “Halaale halaale yeemmoꞌnena, iiminni dirritinota halaalaancho sagale uyinoꞌnehu Muse diꞌꞌikkino; Anniꞌya kayinni halaalaancho sagale iiminni aannoꞌne.
33 Korkaatuno Maganu aanno sagale, gordunni dirritannotenna alamete heeshsho uyitannote.”
34 Insano “Mooticha, woꞌmanka woyite tenne sagale uyinke” yitusi.
35 Yesuusi togo yiinsa: “Heeshsho uyitanno sagale aneeti. Anewa daannohu baalu horonta dihudiꞌranno; ane ammanannohu baaluno horonta digooꞌranno.
36 Ikkollana yuummoꞌnente gede, laꞌinoonnieha ikkirono diammantinoonnie.
37 Anniꞌya aannoehu baalu anewa daanno; anino anewa daannoha horonta fushshe dihuneemmo;
38 korkaatuno gordunni dayoommohu soyinoehu hedinore wonshammoraati ikkinnina umiꞌya hedo wonshammora diꞌꞌikkino.
39 Soyinoehu hedono, uyinoehu baalu giddonni mittuno baiekkinni goofimarchu barra reyotenni kayiseemmonsa gedeeti.
40 Korkaatuno Anniꞌya hedo, Beetto afinohunna iso ammanannohu* baalu hegere heeshsho afiꞌranno gedeeti; anino goofimarchu barra reyotenni kayiseemmosi.”
41 Hakkiinni, “Gordunni dirritino sagale aneeti” yiino daafira Ayihudootu isira gunguntu.
42 Togo yitu: “Kuni Yooseefi beetto Yesuusa diꞌꞌikkino? Annisinna amasi ninke anfoommore diꞌꞌikkino? Ikkina, ‘Gordunni dirroommo’ hiitto yaanno?”
43 Yesuusino qole togo yiinsa: “Kiꞌne kiꞌneneewa gunguma agurre.
44 Soyinoehu Anniꞌya abbikkinni* anewa daa dandaanno manchi dino; anino goofimarchu barra reyotenni kayiseemmosi.
45 Masaalaanote borrora, ‘Baalunku Yihowawiinni rossinore ikkitanno’ yine borreessinoonni. Anniꞌyawiinni macciishshinohunna rosinohu baalu anewa daanno.
46 Maganuwiinni dayinoha agurranna Anna lainohu mittu manchino dino; isi Anna laino.
47 Halaale halaale yeemmoꞌnena, ammanannohu baalu hegere heeshsho afiꞌranno.
48 “Heeshsho uyitanno sagale aneeti.
49 Annuwaꞌne halalla menna ittino; ikkollana reyitino.
50 Gordunni dirritino sagale itannohu baalu kayinni direyanno.
51 Gordunni dirritinoti heeshshote sagale aneeti. Tenne sagale itannohu baalu hegerera heeꞌranno; qoleno tini sagale mannu ooso* heeshshora yee eemmo maalaꞌyaati.”
52 Hatte yannara Ayihudootu, “Kuni manchi maalasi intammora hiitto asse aannonke?” yite insa insanaawa heewisantu.
53 Konnira Yesuusi togo yiinsa: “Halaale halaale yeemmoꞌnena, manchi Beetti maala ita hoogginironna mundeesi aga hoogginiro heeshsho dinoꞌne.*
54 Maalaꞌya itannohuranna mundeeꞌya agannohura baalaho hegere heeshsho noosi; anino goofimarchu barra reyotenni kayiseemmosi;
55 korkaatuno, maaliꞌya halaalaancho sagaleeti; mundeeꞌyano halaalaancho agattooti.
56 Maalaꞌya itannohuranna mundeeꞌya agannohura baalaho ane ledo mittimma heedhannosi; anerano isi ledo mittimma heedhannoe.
57 Heeshshonnihu Anniꞌya soyinoe garinni, anino Anniꞌyanni heeshshote heeꞌreemmonte gede, maalaꞌya itannohuno anenni heeshshote heeꞌranno.
58 Gordunni dirritino sagale tenneeti. Tini sagale annuwaꞌne ittute gedeeta diꞌꞌikkitino; hatte sagale itturi reyitino. Tenne sagale itannohu baalu kayinni hegerera heeꞌranno.”
59 Isi konne coye coyiꞌrinohu Qifirinaahoomi xaadu mine* rosiisanni heeꞌreeti.
60 Rosaanosi giddonni haammatu konne coye macciishshite, “Kuni biso shorodhi assanno coyeeti; ayi dandee macciishshanno?” yitu.
61 Yesuusi kayinni rosaanosi tenne daafira gunguntanni noota afe togo yiinsa: “Kuni coyi gufisannoꞌnehoni?
62 Manchi Beetti alba heeꞌrannowa haꞌranna laꞌinanni woyite mayitinaraatiyya?
63 Heeshsho aannohu ayyaanaho; maalu kayinni kaaꞌlannori dino. Ani kulummoꞌne qaali ayyaanahonna heeshshote.
64 Ikkollana kiꞌne giddo mitu ammantannokkiri no.” Yesuusi hatto yiinohu ammantannosikkiri ayeootironna sayise aannosihu ayetiro balaxe afino daafiraati.
65 Hakkiinni isi togo yiinsa: “Anniꞌya fajjinoha agurranna anewa daara dandaannohu dino yoommoꞌnehu iseraati.”
66 Konninni kainohunni rosaanosi giddonni batinyu agurte daggino coyiwa higgu; hatte yannanni kayisse isi hoode haꞌra agurtu.
67 Hakkiinni Yesuusi Tonaalamenta soqqamaasine, “Kiꞌneno haꞌra hasidhinannini?” yiinsa.
68 Simooni Pheexiroosi togo yee qolisi: “Mooticha, ayenkewa haꞌneemmo? Atera hegere heeshsho qaali noohe.
69 Ati Qullaawa Maganu Soqqamaancho ikkoottota ammannoommo; qoleno anfoommo.”
70 Yesuusino togo yee qolinsa: “Kiꞌne tonaalamenka doorummohu dianeeti? Ikkollana kiꞌne giddo mittu suꞌma hunannoho.”*
71 Hatto yiinohu, Asqorootichu Simooni beetti Yihudi daafira kulateeti; korkaatuno Yihudi Tonaalamu giddo mitto ikkirono Yesuusa sayise aannohu isooti.
Lekkaalliidi Qaagiishshuwa
^ Roomunnite birru saanteeti.
^ Noo gedeenni tirriro, “mite 25 woy 30 istaadiyoone ikkitanno.”
^ Noo gedeenni tirriro, “maattama gane fajjino.”
^ Woy “iso ammanannota loosunni leellishannohu.”
^ Noo gedeenni tirriro, “goshooshikkinni.”
^ Noo gedeenni tirriro, “alamete.”
^ Noo gedeenni tirriro, “umiꞌnenni heeshsho dinoꞌne.”
^ “Mannu gamba yiinowa” yaano ikkitara dandiitanno.
^ Woy “Daawuloosiiti.”
