Wedellootu baasa yaaddanno gede assannonsa coyi giddo mittu, anninsanna amansa adhamansa diigate. Dadillittorono beedho afiꞌratto gede maa assa dandaatto?

Konni birxichira

•  Assa hasiissannohekkiha sase coye

•  Assa hasiissannoheha sase coye

•  Darawokki yitinore

 Assa hasiissannohekkiha sase coye

 1. Ateneeto busha assa

 “Mitte higge amaꞌya, isenna anniꞌya mereero noo qarri baalu ani ilamumma woyite hanafinota kultinoe; hakko daafira adhamansa diigantanno gede assoommati aneeti yee hedoomma.”—Dayana.

 Tenne qaagi: Annikkinna amakki adhamansa diiganno gede assoottohu ate diꞌꞌikkootto. Insa adhamansa diiganni noohu mereeronsa kalaqamino qarrinni kainohunniiti. Kuni qarri kalaqamanno gede assoottohu ate diꞌꞌikkootto; qarransa tirattohuno diateeti. Qarransa hasaawe tirate woꞌnaala hasiissannonsari insaati.

 2. Koma woy koffeenya amaxxe keeshsha

 “Anniꞌya amaꞌyara ammanama hoogino daafira, isira lowo geeshsha hanqoomma. Iso bashsho gede ammaꞌnate lowo yanna hasiissannoe.”—Riyana.

 Tenne qaagi: Annikkinna amakki ikkito lowo geeshsha giirtinohehanna hanqissinoheha ikkara dandaanno; hige mayira hanqittono diyinannihe. Kayi koffi yite keeshsha atera dancha diꞌꞌikkitino. Manninatekkinna surrekki gawajjitara dandiitanno. Koma amada, hadho ange kaꞌne wolu manchi dhiwamanno yine agarate gedeeti yinannihu iseraati. a

 3. Dancha maate xintiꞌra dandaattota huluullama

 “Anino anniꞌya assire assammakka yee waajjoomma. Mine assiꞌre ooso ilummaro, anino anniꞌyanna amaꞌya adhama diigantanno gede assi coye assammakka yee yaadoomma.”—Jesika.

 Tenne qaagi: Annikkinna amakki adhama qiniitinokki daafira ate adhamano diqiniitanno yaa diꞌꞌikkino. Isinni annikkinna amakkira iillinorinni danchare rosattora dandaatto. Lawishshaho, hiittoo akati noo galte adha hasiissannohero albinni roore huwatattora dandaatto. Annikkinna amakki adhama diigamase, dancha galte ikkate hasiissanno akatta lossiꞌratto gede kakkayissahera dandiitanno.

 Assa hasiissannoheha sase coye

 1. Giddokkita fushshite coyiꞌri. Giddonsa noo koffeenya fushshe coyiꞌrannokki manni duucha woyite umonsa gawajjannore assanno; lawishshaho, ago quwa sayise agara woy jingilli assitanno xagga adhara dandaanno. Hattoo coyi giddora eattonte, konni woroonni noore assi:

 Annakkinna amakki hasaawisi. Annikki woy amakki woy lamunku insa coyi giddora eessitanni nooheha ikkiro, tini gawajjitanni noohe gara wodanaaꞌmite kayi mitte giddonni xawisse kulinsa. Insa xaadde hasaawisa ayirritannoheha ikkiro, mittoho woy lamunkura sokka borreessite soya dandaatto.

 Ammaꞌnatto jaalira hasaaphi. Hasaaphitanna macca wore macciishshanno jaala afiꞌra umise wodana fooliishshiishshara dandiitanno. Qullaawu Maxaafi yaannonte gede, “jaalu woˈmanka woyite jaalaholla; roduuno qarru barra iillanno.”—Lawishsha 17:17.

 Kalaqaanchikkira hasaaphi. ‘Huuccatto macciishshanno Magani’ Yihowa woꞌmanka woyite kuꞌlattore macciishshannohe. (Faarso 65:2) Qullaawu Maxaafi togo yaanno: “Kiꞌnere malannohu isootina, qarrisannoꞌnere baala isi aana tuqqe.”—1 Pheexiroosi 5:7.

•   Annikkinna amakki giddo wodanaaꞌmite hasaawisa dandaattohu hiikkoyeti?

•   Konne qarra dandiite saꞌꞌatto gede kaaꞌlahera dandaannohu ammaꞌnatto jaali (darawokkino ikko jawano ikko) no?

•   Maganoho badde kulte hasaapha hasiꞌratto coyi maati?

 2. Haaro heeshshokki rosate woꞌnaali

 Annikkinna amakki adhama diigantino daafira, wolewa hadhe heeꞌra, haaro rosu mine ea, woy haaro jaalla kalaqiꞌra hasiissinoheha ikkara dandaanno. Miinjiꞌne deerrino soorramara dandaanno. Tini baala caacceessitaheranna yaachishshahera dandiitannoti egennantinote; qoleno heeshshokki umo lekkicho soorrantinoha lawahera dandaanno. Soorramino coyi quwa sae ayirrannohekki gede kaaꞌlannoheri maati? Haaro heeshshokki rosa dandaatto gara illachishate woꞌnaali.

•   Annikkinna amakki adhama diigamasenni heeshshokki giddo soorraminohu jawu coyi maati?

•   Hakkoye coye rosate maa maa assa dandaatto?

 3. Jawaantekki lashshi assitooti

 Annunna ama adhama diigansa baasa yaachishshannoha ikkirono, meessi jawaante xabbe leeltannonke gedeno assitara dandiitanno. Isinni wole haaro dandoo lossiꞌratto gedeno faro fantahera dandiitanno. Jeremii 13 dirihu heeꞌreenna annisinna amasi adhamansa diigino; isi togo yiino: “Anniꞌyanna amaꞌya adhamansa diigansa, baxummokki gikki yeemmo gede assitinoe. Mine bayiru aneeti; hakko daafira amaꞌya albinni roore kaaꞌlanna maaꞌne rodooꞌyano irkisa hasiissinoe.”

•   Annikkinna amakki adhama diigantino daafira huwatoottoti giddokki noo jawaante maati?

•   Wole hiikkoye akatanna dandoo lossiꞌra hasiꞌratto?