Baxillu jaalooma amaddininku boode yanna saꞌino; xa kayi mito coye huluullama hanaffinoonni. Jaaloomaꞌne suffinironso agurtiniro woyyanno? Konne birxicho qixxeessinoonnihu, lamente giddo mitte doodhitinanni gede kaaꞌlateeti.

Konni birxichira

•  Huluullo kalaqannore

•  Lamete giddo mitte doodha

•  Jaalooma agura doodhitiniro

 Mittu beettinna mitte beetto jaalooma amade mito geeshsha keeshshihu gedensaanni, mereeronsa lowo badooshshi noota huwatara dandaanno. Lawishshaho:

•   Mittu wayi gama ofolle boohaara baxanno; mittu kayinni ilaalla noowa lekkatenni milli yaa baxanno.

•   Mittu hasaawe hashuu diyaannoho; mittu kayinni sammiimaho.

•   Mittu awaawurannoho; mittu kayi ammanaminoho.

 Sasenti ikkito addi addita ikkitinota wodanche. Umiti banxanni coyi babbaxxinota leellishshannote; layinkiti akatu badooshshi noota leellishshanno; sayikkiti kayinni gallanni seeri babbaxxinota leellishshannote.

 Hanni hedde: Lamunku adhantiniha ikkiro, konni sasunku coyi (badooshshi) giddo dandee heeꞌrate roore ayirrannoꞌnehu hiikkoyeti? Kuri giddo lamunku duqqitine heeꞌrate sumuu yitinannihu heeꞌranno?

 Minaanninna minaama baxanno coyi woy akatinsa babbaxxinoha ikkiro nafa, adhamansa hagiirru noota ikka dandiitanno. Hige wonanni kuꞌu kuꞌuyi ledo sumuu yaanno yaa lamunku mitto gara ikkanno yaa diꞌꞌikkitino. Mito woyite, minaanninna minaama galtensa baxxannore baxa rosara, wole agurina kuꞌuyi akati kuꞌuyira kaaꞌlara nafa dandaanno. a

 Wole widoonni kayinni, galteꞌne ikkanno manchi kiꞌne galtinanni seerinni galannoha ikka hasiissannosi; wole yaattonni ammaꞌnote, amanyootunna garanna gara ikkinokki coyi daafira nooꞌne lao mitte ikka hasiissannose. Galtinanni seeri mitto ikka hoogiro, hatti baxillu jaaloomaꞌne agurate heda hasiissannoꞌneta leellishanno malaateeti.

 Lawishshaho, ammaꞌnote coyira sumuu diyitinoonni yine hendo. Mittu maxaafi togo yaanno: “Xiinxallo duucha higge leellishshinonte gede, addi addi ammaꞌno noonsa minaanninna minaamara adhamansa diigamase digattanno.”​—Fayting for Yuur Meereji.

 Qullaawu Maxaafi biddishsha: “Ammantinokkiri ledo maxxagantinoonte. . . . Xawaabbahonna tunsichoho mayi xaadi no?”—2 Qorontoosi 6:14.

 Qullaawu Maxaafi kulanno garinni, “adhantannore lowo qarri amadannonsa.” (1 Qorontoosi 7:28) Hakko daafira, xa baxillu jaalooma amaddine heedhinoonni yannara hakkuyi qarri giddo gamu iilliꞌnero, dhagge ikkoonkeꞌne.

 Shiimu coyira sumuu yaa hoogginoonni daafira calla, jaaloomiꞌne diseyanno yaa diꞌꞌikkitino. Heda hasiissannoꞌne xaꞌmo: Togoo coye gaꞌlabbotenni hasaabbine tira dandiitinanni? Adhantinanniha ikkiro, lamunkura tini dandoo hasiissannoꞌneti egennantinote.

 Qullaawu Maxaafi biddishsha: “Mimmitiꞌnera shaqqaddanna shooshaqoota ikke; . . . mimmitiꞌne sao agurre.”—Efesooni Sokka 4:32.

 Wole widoonni kayinni, duucha woyite nyerri yitinanniha ikkiro woy sumuu yaa hoogginoonni coyi jawa ikkiro, hatti lamunku mitteenni heeꞌrate maltinoonnikkire ikkitinoonnita leellishshannota ikkitara dandiitanno. Coyi hatto ikkiro, tenne ganaanni anfe gaabbantenni xa afa woyyate!

 Qara hedo: Baxillu jaalaꞌne huluullantinanni gede assannohu jawu coyi heeꞌriro woy adhamate qixxaawaꞌne huluullantiniro, togoo huluullo lashshi assitine saꞌinoonte!

 Qullaawu Maxaafi biddishsha: “Egennaamu manchi bushare afiro maaxamanno; hawanyu kayinni eꞌꞌe qarramanno.”—Lawishsha 22:3.

 Baxillu jaalooma agura lowo geya xissiissara dandiitanno. Ikkollana, lamunku giddo mittoho woy lamunkura, jaaloomiꞌne daafira huluullantinanni gede assinoꞌnehu jawu coyi heeꞌrironna hakku coyi huluulle higa giwiꞌnero, woyyitannoti jaaloomaꞌne agura ikkitara dandiitanno.

 Ikkina jaaloomaꞌne agurtinannihu ma garinniiti? Addi korkaati heeꞌriꞌnero ikkinnina, jaaloomaꞌne agurtinoonnita kulate mobayiletenni sokka soya woy silke bilbila hoogginiro woyyate. Hatteentenni, tenne jawa hajo injiitanno yannanna bayicho doortine hasaabbe.

 Qullaawu Maxaafi biddishsha: “Mimmitiꞌnera halaale coyidhe.”—Zakkaariyaasi 8:16.

 Baxillu jaaloomaꞌne agurtini yaa diqiniinoꞌne yaateni? Deeꞌni, hatto yaa diꞌꞌikkitino. Wonanni baxillu jaalooma amaddinoonnihu, mimmito laꞌine kaꞌine adhamate woy adhama hoogate doodhitinara ikkinota qaagge. Jaaloomaꞌne agurtinoonniha ikkiro nafa, konni jaaloominni konni kaꞌira kaaꞌlannoꞌnere lowore rosa dandiitinanni.

 Kiꞌneneeto togo yitine xaꞌme: ‘Konni jaaloominni umiꞌya daafira maa huwatoommo? Mine kalaqiꞌrammora albaanni rosa woy assa hasiissannoehu wodanchoommo coyi no? Wirro baxillu jaalooma amadummoro, albihunni woyyino garinni assa hasiꞌreemmo coyi maati?’